នរណា៖ ក្រុមហ៊ុននេះត្រូវបានបង្កើតឡើងដោយ លោក Jurgen Mossack ដែលបានកើតនៅក្នុងប្រទេសអាល្លឺម៉ង់ នៅក្នុងឆ្នាំ១៩៤៨ និងលោក Ramon Fonseca ដែលកើតនៅក្នុងប្រទេសប៉ាណាម៉ា នៅក្នុងឆ្នាំ១៩៥២។
នៅពេលណា៖ ក្រុមហ៊ុននេះត្រូវបានបង្កើតឡើងនៅក្នុងឆ្នាំ១៩៧៧ ហើយបានប្តូរឈ្មោះទៅជា Mossack Fonseca នៅក្នុងឆ្នាំ១៩៨៦ នៅពេលដែលលោកទាំងពីរសម្រេចចិត្តបញ្ជូលក្រុមហ៊ុនច្បាប់ទាំងពីរបញ្ចូលគ្នា។
ជាអ្វីទៅ៖ វាជាក្រុមហ៊ុនសាកលមួយដែលផ្តល់សេវាផ្នែកច្បាប់ ផ្នែកគ្រប់គ្រងកិច្ចសន្យានិងទ្រព្យសម្បត្តិ ដ៏ទូលំទូលាយមួយ។ ក្រុមហ៊ុននេះទទួលសេវាកម្មគ្រប់គ្រង និងចុះបញ្ជីក្រុមហ៊ុននានានៅក្នុងប្រទេសដទៃរួមមាន ប្រទេសស្វ៊ីស ចក្រភពអង់គ្លេស ហុងកុង កោះ British Virgin ប្រទេសម៉ាល់ត៍ ព្រមទាំងនៅក្នុងរដ្ឋ Nevada និងរដ្ឋ Wyoming ក្នុងសហរដ្ឋអាមេរិកផងដែរ។
នៅទីណា៖ ក្រុមហ៊ុននេះស្ថិតនៅក្នុងប្រទេសប៉ាណាម៉ា។
វត្តមានលើទីផ្សារសាកល៖ ក្រុមហ៊ុននេះត្រូវបានគេចាត់ទុកថាជាអ្នកផ្តល់សេវាកម្មក្រៅប្រទេសធំលំដាប់ទី៤។
ប្រតិកម្មទៅនឹងឯកសារសម្ងាត់បែកធ្លាយពីប្រទេសប៉ាណាម៉ាដែលគេហៅជាភាសាអង់គ្លេសថា Panama Papers៖ ក្រុមហ៊ុននេះបានបដិសេធធ្វើអត្ថាធិប្បាយលើការចោទប្រកាន់ជាក់លាក់ណាមួយ ដោយលើកហេតុផលថា ដើម្បីរក្សាកិច្ចការសម្ងាត់សម្រាប់អតិថិជនរបស់ខ្លួន។ ប៉ុន្តែក្រុមហ៊ុននេះនិយាយថា ខ្លួនបានប្រតិបត្តិការងារនេះដោយការទទួលខុសត្រូវ និងបានគោរពតាមពិធីការអន្តរជាតិ ដោយបានអះអាងថា៖ «ក្រុមហ៊ុនដែលយើងជួយចុះបញ្ជីឲ្យមិនបានធ្វើឡើងក្នុងគោលបំណងគេចពន្ធ លាងលុយកខ្វក់ ផ្តល់ហិរញ្ញប្បទានដល់ភេរវករ ឬក្នុងគោលបំណងខុសច្បាប់អ្វីមួយនោះទេ»។ ទោះជាយ៉ាងណា ក្រុមហ៊ុននេះបានបន្ថែមថា៖ «យើងមានការសោកស្តាយចំពោះការប្រើប្រាស់សេវាកម្មរបស់ក្រុមហ៊ុនយើងក្នុងផ្លូវខុស ហើយយើងនឹងចាត់វិធានការដើម្បីកុំឲ្យមានរឿងបែបនេះកើតឡើង»៕
ប្រែសម្រួលដោយ ប៊ុន ប៉េងហ៊ុយ
