នាយករដ្ឋមន្ត្រីវៀតណាមលោក Pham Minh Chinh បាននិយាយកាលពីថ្ងៃទី ១ ខែមីនាថា រដ្ឋាភិបាលវៀតណាម ចង់ចេញឱ្យបានឆាប់រហ័សនូវអាជ្ញាបណ្ណសម្រាប់ក្រុមហ៊ុន Starlink របស់លោក Elon Musk ដើម្បីផ្តល់ប្រព័ន្ធអ៊ីនធឺណិតតាមផ្កាយរណបនៅក្នុងប្រទេសនៅគម្រោងមេមួយ។ នេះបើយោងតាមទីភ្នាក់ងារសារព័ត៌មាន Reuters។
នាយករដ្ឋមន្ត្រីវៀតណាមលោក Pham Minh Chinh ដែលបាននិយាយជាមួយក្រុមហ៊ុនពាណិជ្ជកម្មសហរដ្ឋអាមេរិកជិត ៤០ ក៏បាននិយាយដែរថា វៀតណាមកំពុងចាត់វិធានការដើម្បីធ្វើឱ្យមានផលចំណេញពាណិជ្ជកម្មឡើងវិញជាមួយសហរដ្ឋអាមេរិក ដោយយោងដល់ការនាំចូលយន្តហោះ អាវុធឧស្ម័ន ទំនិញកសិកម្មនិងផលិតផលឱសថ។
រដ្ឋាភិបាលក្រុងហាណូយកំពុងព្យាយាមបញ្ចៀសពន្ធគយរបស់សហរដ្ឋអាមេរិកលើការនាំចេញដ៏ច្រើនរបស់ខ្លួន ដែលបានធ្វើឱ្យពាណិជ្ជកម្មនាំចេញដ៏ច្រើនលើសលុបកាលពីឆ្នាំទៅ ដែលកំពុងធ្វើឱ្យប្រទេសនៅតំបន់អាស៊ីអាគ្នេយ៍មួយនេះអាចទទួលគ្រោះថ្នាក់ពីការយកពន្ធគយទៅវិញទៅមក ដែលត្រូវបានគំរាមដោយលោកប្រធានាធិបតី Donald Trump។
រដ្ឋាភិបាលបាននិយាយនៅលើគេហទំព័ររបស់ខ្លួនដែលបានរាយការណ៍ពីការពិភាក្សាដែលលោកនាយករដ្ឋមន្ត្រី Chinh បានធ្វើជាមួយក្រុមហ៊ុនពាណិជ្ជកម្មសហរដ្ឋអាមេរិកថា៖ «លោកនាយករដ្ឋមន្ត្រីបានបញ្ជាឱ្យក្រសួងវិទ្យាសាស្ត្រនិងបច្ចេកវិទ្យាចេញអាជ្ញាបណ្ណជាបន្ទាន់ដល់ក្រុមហ៊ុនអ៊ីនធឺណិត Starlink លើមូលដ្ឋានសាកល្បង»។
កាលពីខែកុម្ភៈ សភាវៀតណាមបានអនុម័តផែនការបណ្តោះអាសន្នដើម្បីអនុញ្ញាតឱ្យក្រុមហ៊ុនអ៊ីនធឺណិតផ្កាយរណបផ្តល់សេវាកម្មនៅក្នុងប្រទេសវៀតណាម ខណៈដែលរក្សាការត្រួតត្រាសាខាក្រុ មហ៊ុនក្នុងស្រុក ដែលជាលក្ខខណ្ឌមុនដែលកំណត់ដោយលោក Musk។
ការណ៍នេះតំណាងឱ្យការផ្លាស់ប្តូរភ្លាមៗជំហររបស់វៀតណាមអំពីការគ្រប់គ្រងនៃក្រុមហ៊ុនអ៊ីនធឺណិតផ្កាយរណប ពេលដែលប្រទេសកុម្មុយនីស្តនេះរក្សាការកម្រិតដ៏តឹងតែងលើការត្រួតត្រារបស់បរទេសសម្រាប់ផ្នែកសេដ្ឋកិច្ចដ៏ច្រើនដែលខ្លួនចាត់ទុកជាបញ្ហារសើប។
មន្ត្រីសហរដ្ឋអាមេរិកម្នាក់ដែលបានចូលរួមជំនួបកាលពីថ្ងៃទី ១ ខែមីនា បាននិយាយថា ការពិភាក្សា«នឹងដោះស្រាយបញ្ហាដែលកំពុងរង់ចាំ»សម្រាប់ក្រុមហ៊ុនសហរដ្ឋអាមេរិកនៅក្នុងប្រទេសវៀតណាម។
លោកនាយករដ្ឋមន្ត្រី រៀបចំផែនការជួបដាច់ដោយឡែកជាមួយពាណិជ្ជករបរទេស នៅពេលបន្ទាប់ពីនោះ។ នេះបើក្រុមអ្នកវិនិយោគជាច្រើនប្រាប់ទីភ្នាក់ងារសារព័ត៌មាន Reuters នៅពេលដែលលោកព្យាយាមបំបាត់ការព្រួយបារម្ភដែលបណ្តាលមកពីការតានតឹងពាណិជ្ជកម្មសាកលលោកនិងផលប៉ះពាល់ដែលវាអាចមានលើប្រទេសវៀតណាម ដែលពឹងផ្អែកលើការនាំចេញ។
កិច្ចព្រមព្រៀងនាំចូលវៀតណាមឬ?
រដ្ឋាភិបាលបាននិយាយថាក្នុងចំណោមលទ្ធភាពនៃវិធានការដែលអាចកាត់បន្ថយផលសល់ពាណិជ្ជកម្មរបស់វៀតណាមជាមួយសហរដ្ឋអាមេរិកគឺក្រុមហ៊ុនអាកាសចរណ៍វៀតណាមទិញយន្តហោះដ៏ច្រើនរបស់ក្រុមហ៊ុន Boeing របស់អាមេរិក។
រដ្ឋាភិបាលបានយោងដល់កិច្ចព្រមព្រៀងក្រុមហ៊ុនអាកាសចរណ៍វៀតណាម ដែលបានធ្វើជាមួយក្រុមហ៊ុន Boeing ក្នុងឆ្នាំ ២០២៣ ក្នុងអំឡុងនៃដំណើរទស្សនកិច្ចទៅកាន់រដ្ឋធានីហាណូយរបស់អតីតប្រធានាធិបតីសហរដ្ឋអាមេរិកលោក Joe Biden ចំពោះការទិញយន្តហោះធន់ 737 Max ចំនួន ៥០ គ្រឿង។
រដ្ឋាភិបាលវៀតណាមបានរាយការណ៍កាលពីថ្ងៃទី ១ ខែមីនាថា កិច្ចព្រមព្រៀងនោះមានតម្លៃ ១១ ពាន់លានដុល្លារ ដោយមិនបញ្ជាក់ថា តើវារួមទាំងម៉ាស៊ីននិងគ្រឿងបម្លាស់ផ្សេងទៀតដែលជាធម្មតាបានទិញដាច់ដោយឡែក។ សេតវិមានបាននិយាយក្នុងឆ្នាំ ២០២៣ ថា តម្លៃនោះមាន ៧,៨ ពាន់លានដុល្លារ។
ក្រុមហ៊ុនអាកាសចរណ៍វៀតណាមមិនបានឆ្លើយតបភ្លាមៗដល់សំណើសុំអត្ថាធិប្បាយកាលពីថ្ងៃទី ១ ខែមីនា។
រដ្ឋាភិបាលនិយាយថា វៀតណាមបានពិភាក្សាពីលទ្ធភាពនៃការបញ្ចុះតម្លៃសម្រាប់យន្តហោះជាមួយក្រុមហ៊ុន Boeing ហើយក៏បាននិយាយរំលឹកដល់កិច្ចព្រមព្រៀងនៃក្រុមហ៊ុនអាកាសចរណ៍តម្លៃថោកវៀតណាមឈ្មោះ VietJet ដែលទើបបើកថ្មីបានទិញយន្តហោះរបស់ក្រុមហ៊ុន Boeing ធុន 737 MAXចំនួន ២០០ (២រយ) គ្រឿង។
កិច្ចព្រមព្រៀងនេះត្រូវបានចុះហត្ថលេខាជាលើកទី ១ ក្នុងឆ្នាំ ២០១៦ ហើយត្រូវបានសើរើពិនិត្យមើលឡើងវិញក្រោយមក ក៏ប៉ុន្តែយន្តហោះនៅមិនទាន់ផ្តល់ឱ្យនៅឡើយទេ ទោះជាយ៉ាងណាក៏ដោយ ក៏ក្រុមហ៊ុននោះបាននិយាយថាខ្លួនរំពឹងនឹងទទួលបានយន្តហោះមុនដំបូងកាលពីឆ្នាំទៅ។
រដ្ឋាភិបាលនិងពួកមន្ត្រីវៀតណាមបាននិយាយយោងដល់វិធានការជាច្រើនអស់ជាច្រើនសប្តាហ៍ដើម្បីដោះស្រាយផលសល់ពាណិជ្ជកម្មជាមួយសហរដ្ឋអាមេរិក ក៏ប៉ុន្តែ មិនមានកិច្ចព្រមព្រៀងសំខាន់ត្រូវបានប្រកាសនៅឡើយទេ។
រដ្ឋាភិបាលបាននិយាយថា ខ្លួនអាចនាំចូលផលិតផលកសិកម្មសហរដ្ឋអាមេរិកកាន់តែច្រើនឡើងហើយពួកមន្ត្រីបានសម្តែងម្តងហើយម្តងទៀតនូវចំណាប់អារម្មណ៍ក្នុងការទិញឧស្ម័នធម្មជាតិសហរដ្ឋអាមេរិកសម្រាប់ឧស្សាហកម្មឧស្ម័នធម្មជាតិ។
កិច្ចព្រមព្រៀងយោធាក៏ត្រូវបានពិភាក្សាជារឿយៗដែរ រួមទាំងការទិញយន្តហោះដឹកជញ្ជូនយោធាធុន C-130 Hercules របស់ក្រុមហ៊ុន Lockheed Martin៕
ប្រែសម្រួលដោយលោក ជឹង ប៉ូជីន
វេទិកាបញ្ចេញមតិ