សហរដ្ឋអាមេរិក«នឹងផ្តល់ឱ្យអ៊ុយក្រែននូវអ្វីដែលអ៊ុយក្រែនត្រូវការ»ដើម្បីបន្តប្រយុទ្ធក្នុងសង្គ្រាមរយៈពេល ៣២ខែ របស់ខ្លួនជាមួយរុស្ស៊ី។ នេះតាមរដ្ឋមន្ត្រីការពារជាតិសហរដ្ឋអាមេរិក លោក Lloyd Austin កាលពីថ្ងៃចន្ទ ក្នុងអំឡុងនៃដំណើរទស្សនកិច្ចមួយទៅកាន់រដ្ឋធានីកៀវ។
ក៏ប៉ុន្តែ លោកមិនបានផ្តល់ការចង្អុលបង្ហាញថា សហរដ្ឋអាមេរិកនឹងយល់ព្រមតាមការប្រាថ្នារបស់អ៊ុយក្រែនដើម្បីចូលជាសមាជិកអង្គការអូតង់ភ្លាមៗ ឬអនុញ្ញាតឱ្យកងទ័ពរដ្ឋាភិបាលក្រុងកៀវ ចាប់ផ្តើមវាយប្រហារដោយកាំជ្រួចមីស៊ីលចូលកាន់តែជ្រៅទៅក្នុងប្រទេសរុស្ស៊ីនោះទេ។
លោក Austin បាននិយាយទៀតថា សហរដ្ឋអាមេរិកនឹងប្រគល់ឱ្យអ៊ុយក្រែននូវអ្វីដែលអ៊ុយក្រែនត្រូវការ«ដើម្បីប្រយុទ្ធយកការរស់រាននិងសន្តិសុខរបស់ខ្លួន»។ លោកនិយាយទៀតថា វាជាការចាំបាច់ដែលសម្ពន្ធមិត្តលោកខាងលិចទប់ទល់ការឈ្លានពានរបស់រុស្ស៊ី។
លោក Austin បាននិយាយនៅក្នុងសុន្ទរកថាមួយនៅបណ្ឌិតសភាការទូតអ៊ុយក្រែនថា អនាគតរបស់អឺរ៉ុបស្ថិតក្នុងការគំរាមកំហែង។ កម្លាំងអង្គការអូតង់ស្ថិតក្នុងការគំរាមកំហែង។ សន្តិសុខរបស់អាមេរិកស្ថិតក្នុងការគំរាមកំហែង»។
លោកបានកត់សម្គាល់ថា សហរដ្ឋអាមេរិកបានបញ្ជូនជំនួយសន្តិសុខដែលមានទឹកប្រាក់ជាង ៥៨ពាន់លានដុល្លារឱ្យអ៊ុយក្រែន ចាប់តាំងពីការឈ្លានពាននៅខែកុម្ភៈ ឆ្នាំ២០២២ ហើយថា ប្រទេសជាង ១០ របស់សម្ពន្ធមិត្តលោកខាងលិចបានរួមវិភាគទាន ៥១ពាន់លានដុល្លារផ្សេងទៀត។
ក៏ប៉ុន្តែ លោកមិនបាននិយាយដល់«ផែនការជ័យជម្នះ»របស់ប្រធានាធិបតីអ៊ុយក្រែន លោក Volodymyr Zelenskyy ដែលអំពាវនាវឱ្យអ៊ុយក្រែនក្លាយជាសមាជិកភាពនៅក្នុងអង្គការអូតង់ ឬដែលសុំការអនុញ្ញាតឱ្យខ្លួនប្រើប្រាស់កាំជ្រួចមីស៊ីលវង់ប្រតិបត្តិការវែងផ្គត់ផ្គង់ដោយប្រទេសលោកខាងលិច ដើម្បីវាយប្រហារទីដៅយោធានៅផ្នែកខាងក្នុងជ្រៅនៃប្រទេសរុស្ស៊ី។
សហរដ្ឋអាមេរិកមានការភ័យខ្លាចថា ការវាយប្រហារទីតាំងចូលជ្រៅក្នុងប្រទេសរុស្ស៊ី នឹងធ្វើឱ្យមានហានិភ័យ ដែលអាចបណ្តាលឲ្យមានជម្លោះដោយផ្ទាល់រវាងសហរដ្ឋអាមេរិកនិងរុស្ស៊ី៕
