សមាជិកសភាសហរដ្ឋអាមេរិកបានស្វាគមន៍ការប្រកាសកាលពីថ្ងៃអង្គារថាអ៊ុយក្រែនបានយល់ព្រមដល់បទឈប់បាញ់គ្នារយៈពេល ៣០ថ្ងៃថា ជាជំហានមួយឆ្ពោះទៅកាន់សន្តិភាពនៅអឺរ៉ុប។
លោក Michael McCaul សមាជិកសភាខាងគណបក្សសាធារណរដ្ឋនិងជាអតីតប្រ ធានគណៈកម្មាធិការកិច្ចការបរទេសរបស់រដ្ឋសភាបានប្រាប់វីអូអេថា«ខ្ញុំមានការលើកទឹកចិត្តដែលភាគីទាំងអស់បានធ្វើឱ្យសម្រេចកិច្ចព្រមព្រៀងមួយ។ ខ្ញុំគិតថាលោកប្រធានាធិបតីឥឡូវនេះបានសម្រេចលុបចោលការផ្អឹបផ្នែកស៊ើបការណ៍សម្ងាត់និងអាវុធដែលជាបញ្ហាសំខាន់»។
សហរដ្ឋអាមេរិកបានប្រកាសកាលពីសប្តាហ៍មុនថាខ្លួននឹងបញ្ឈប់ជំនួយយោធានិងការចែករំលែកការស៊ើបការណ៍សម្ងាត់ជាមួយអ៊ុយក្រែន បន្ទាប់ពីមានការប៉ះពាក្យសម្តីគ្នានៅសេតវិមានរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីអ៊ុយក្រែនលោក Volodymyr Zelenskyy នៅថ្ងៃទី២៨ ខែកុម្ភៈមក។ បន្ទាប់ពីការប្រកាសនៃកិច្ចព្រមព្រៀងឈប់បាញ់គ្នាមក សហរដ្ឋអាមេរិកបាននិយាយកាលពីថ្ងៃអង្គារថាខ្លួន នឹងបន្តកិច្ចសហប្រតិបត្តិការជាមួយអ៊ុយក្រែន។
លោក Jason Crow សមាជិករដ្ឋសភាខាងគណបក្សប្រជាធិបតេយ្យបានប្រាប់វីអូអេថា«តាមការពិត ការណ៍នេះមិនដែលបានកើតមានឡើងក្នុងដំណាក់កាលដំបូងទេ។ ការណ៍នេះមិនត្រូវផ្អាកដែលធ្វើឲ្យមានផលវិបាកដល់ជីវិតពិតប្រាកដសម្រាប់ពលរដ្ឋអ៊ុយក្រែនដែលកំពុងប្រយុទ្ធដើម្បីសេរីភាពនិងដើម្បីប្រជាធិបតេយ្យនិងសម្រាប់សន្តិសុខជាតិ។ ដូច្នេះ វាជាសញ្ញាវិជ្ជមានមួយដែលត្រូវបានលុបចោលដោយរដ្ឋបាលនេះ»។
លោក McCaul បាននិយាយទៀតថា«ជំហានបន្ទាប់គឺលោកប្រធានាធិបតី Zelenskyy នឹងវិលត្រឡប់មកកាន់សេតវិមានវិញដើម្បីចុះហត្ថលេខាលើកិច្ចព្រមព្រៀងនៃកិច្ចសហប្រតិបត្តិការសេដ្ឋកិច្ច។ បន្ទាប់មក អ្វីៗនឹងបែរទៅកាន់លោក Putin វិញ»។
រុស្ស៊ីមិនបានយល់ព្រមដល់បទឈប់បាញ់គ្នាទេ ក៏ប៉ុន្តែ លោកប្រធានាធិបតី Trump បាននិយាយកាលពីថ្ងៃអង្គារថាលោកមានអ្នកតំណាងកំពុងធ្វើដំណើរទៅកាន់ទីក្រុងមូស្គូដើម្បីពិភាក្សាបញ្ហានេះ៕
