បណ្ដារដ្ឋមន្ត្រីការបរទេសមកពីក្រុមប្រទេស G-7 គ្រោងនឹងជួបប្រជុំគ្នាជាច្រើនថ្ងៃចាប់ពីថ្ងៃពុធនេះតទៅនៅក្នុងទីក្រុង Quebec ប្រទេសកាណាដា ដែលនៅក្នុងនោះក៏មានការប្រជុំផ្ដោតលើការគាំទ្រប្រទេសអ៊ុយក្រែនក្នុងការទប់ទល់នឹងការឈ្លានពានរបស់រុស្ស៊ីរយៈពេល ៣ ឆ្នាំកន្លងមកនេះផងដែរ។
ការពិភាក្សានេះបានធ្វើឡើងបន្ទាប់ពីសហរដ្ឋអាមេរិកបានសម្រេចបន្តឡើងវិញនូវការចែករំលែកព័ត៌មានសម្ងាត់និងការផ្ដល់ជំនួយយោធាដល់អ៊ុយក្រែន បន្ទាប់ពីមន្ត្រីជាន់ខ្ពស់នៃប្រទេសទាំងពីរបានជួបប្រជុំគ្នានៅក្នុងទីក្រុង Jeddah ប្រទេសអារ៉ាប៊ីសាអូឌីតមក។
បន្ទាប់ពីបានចរចាគ្នាអស់ជិត ៨ ម៉ោងមក អ៊ុយក្រែនបានប្រកាសកាលពីថ្ងៃអង្គារថាខ្លួនត្រៀមរួចរាល់ដើម្បីទទួលយកសំណើរបស់សហរដ្ឋអាមេរិកសម្រាប់«បទឈប់បាញ់បណ្ដោះអាសន្នជាបន្ទាន់រយៈពេល ៣០ ថ្ងៃ»នៅក្នុងសង្គ្រាមជាមួយរុស្ស៊ី។ ឥឡូវនេះ បទឈប់បាញ់នេះនៅរង់ចាំការយល់ព្រមពីរុស្ស៊ី។
អធិការបតីអាល្លឺម៉ង់លោក Olaf Scholz បានស្វាគមន៍សំណើបទឈប់បាញ់រយៈពេល ៣០ ថ្ងៃនេះ ដោយបានបញ្ជាក់នៅលើបណ្ដាញសង្គមអនឡាញ X នៅថ្ងៃពុធនេះថាវាជា«ជំហានដ៏សំខាន់និងត្រឹមត្រូវមួយឆ្ពោះទៅរកសន្តិភាពដ៏យុត្តិធម៌សម្រាប់អ៊ុយក្រែន»។
រុស្ស៊ីមិនទាន់បានបញ្ចេញមតិភ្លាមៗនៅឡើយទេអំពីសំណើបទឈប់បាញ់របស់សហរដ្ឋអាមេរិកនិងអ៊ុយក្រែននេះ។ ក្រសួងការបរទេសរុស្ស៊ីគ្រាន់តែបានបញ្ជាក់ថាការចរចាជាមួយមន្ត្រីអាមេរិកអាចធ្វើឡើងនៅក្នុងសប្ដាហ៍នេះ។
រដ្ឋមន្ត្រីការបរទេសអាមេរិកលោក Marco Rubio បានប្រាប់អ្នកកាសែតកាលពីយប់ថ្ងៃអង្គារថា អ៊ុយក្រែនបានចាត់វិធានការជាក់ច្បាស់ដើម្បីបញ្ចប់សង្គ្រាមនេះ។
លោក Rubio ថ្លែងថា៖«ឥឡូវនេះ យើងសង្ឃឹមថានឹងយកសំណើនេះទៅឱ្យរុស្ស៊ី ហើយយើងសង្ឃឹមថារុស្ស៊ីនឹងយល់ព្រមចំពោះសន្តិភាព។ ឥឡូវនេះការសម្រេចគឺនៅលើរុស្ស៊ី»៕
