ជើងហោះហើរសហរដ្ឋអាមេរិកដែលដឹកជញ្ជូនពលរដ្ឋឥណ្ឌាដែលត្រូវបានចោទប្រ កាន់ថា បានចូលក្នុងសហរដ្ឋអាមេរិកខុសច្បាប់បានចុះចតក្នុងរដ្ឋ Punjab ភាគខាងជើងកាលពីថ្ងៃពុធដែលជាជើងហោះហើរបែបនេះលើកដំបូងទៅកាន់ប្រទេសឥណ្ឌាចាប់តាំងពីរដ្ឋបាលរបស់លោកប្រធានាធិបតី Trump បានចាប់ផ្តើមបង្ក្រាបលើជនអន្តោប្រវេសន៍ខុសច្បាប់។
យន្តហោះយោធាមួយគ្រឿងដែលបានចុះចតនៅពេលមានសន្តិសុខដ៏តឹងតែងនោះបានដឹកជញ្ជូនអ្នកដែលត្រូវបញ្ជូនទៅកាន់ប្រទេសវិញចំនួន១០៤នាក់។ នេះបើតាមសេចក្តីរាយការណ៍របស់បណ្តាញព័ត៌មាន។ ពួកអាជ្ញាធរមិនបានបញ្ជាក់ពីចំនួនជនចំណាកស្រុកនោះទេ ក៏ប៉ុន្តែ បាននិយាយថាពួកជនដែលត្រូវបញ្ជូនទៅកាន់ប្រទេសវិញ នឹងទទួលបានការទទួលដ៏រាក់ទាក់។
រដ្ឋាភិបាលក្រុងញូដេលីដែលមិនចង់ធ្វើឱ្យមានការឈ្លោះប្រកែកអំពីបញ្ហាជនអន្តោ ប្រវេសន៍ខុសច្បាប់ជាមួយរដ្ឋាភិបាលក្រុងវ៉ាស៊ីនតោន បាននិយាយថា ខ្លួនបើកចំហដល់ការវិលត្រឡប់របស់ជនជាតិឥណ្ឌាដែលគ្មានក្រដាសស្នាមនៅក្នុងសហរដ្ឋអាមេរិក ប្រសិនបើសញ្ជាតិរបស់ពួកគេត្រូវបានផ្ទៀងផ្ទាត់។
លោកប្រធានាធិបតី Donald Trump បាននិយាយកាលពីសប្តាហ៍មុនថា នាយករដ្ឋ មន្ត្រីឥណ្ឌាលោក Narendra Modi បានបញ្ជាក់ប្រាប់លោកថា ឥណ្ឌានឹង«ធ្វើអ្វីៗឱ្យបានត្រឹមត្រូវ»នៅក្នុងការទទួលយកជនអន្តោប្រវេសន៍ត្រឡប់មកវិញ។ អត្ថាធិប្បាយរបស់លោកបានកើតមានឡើងបន្ទាប់ពីការសន្ទនាតាមទូរស័ព្ទជាមួយលោក Modi។
នៅក្នុងរដ្ឋធានីញូដេលី អ្នកនាំពាក្យក្រសួងការបរទេសលោក Randhir Jaiswal បានប្រាប់សន្និសីទកាសែតកាលពីថ្ងៃសុក្រថា ឥណ្ឌានិងសហរដ្ឋអាមេរិកមានការទាក់ទិនក្នុងដំណើរការនេះដើម្បីកំញើញការធ្វើចំណាកស្រុកខុសច្បាប់ហើយ«កិច្ចសហប្រតិ បត្តិការរវាងឥណ្ឌានិងសហរដ្ឋអាមេរិកមានភាពខ្លាំងនិងប្រសិទ្ធិភាពនៅក្នុងវិស័យនេះ។ ការណ៍នេះនឹងក្លាយជាភស្តុតាងមួយក្នុងពេលវេលាដែលនឹងមកដល់»។
ពាណិជ្ជកម្មនិងអន្តោប្រវេសន៍ត្រូវគេរំពឹងនឹងក្លាយជាបញ្ហាសំខាន់មួយក្នុងអំឡុងនៃជំនួបដែលអាចកើតមានឡើងនៅសប្តាហ៍ក្រោយរវាងលោកប្រធានាធិបតី Trump និងលោកនាយករដ្ឋមន្ត្រី Modi៕
វេទិកាបញ្ចេញមតិ