នៅក្រោមការដឹកនាំរបស់លោក ដូណាល់ ត្រាំ (Donald Trump) ប្រធានាធិបតីអាមេរិកជាលើកទីពីរនេះ កម្ពុជាត្រូវប្រឈមនឹងការទទួលយកជនអន្តោប្រវេសន៍ជាពលរដ្ឋខ្មែរ ដែលនឹងត្រូវបណ្តេញចេញពីទឹកដីអាមេរិក។
អ្នកនាំពាក្យរបស់រដ្ឋាភិបាលកម្ពុជាអះអាងថា កម្ពុជាត្រៀមខ្លួនជាស្រេចក្នុងការទទួលយកប្រជាពលរដ្ឋខ្មែរជិត ២ ពាន់នាក់ឱ្យមករស់នៅប្រទេសកំណើតវិញ។
រដ្ឋបាលរបស់លោក ដូណាល់ ត្រាំ មានគម្រោងបណ្តេញជនអន្តោប្រវេសន៍ខុសច្បាប់ចេញពីសហរដ្ឋអាមេរិកប្រមាណ ១លាន៤សែននាក់ ទៅប្រទេសកំណើតវិញ។ នៅក្នុងចំណោមមនុស្សជាង១លាននាក់នោះ មានជនជាតិខ្មែរប្រមាណ ១ ៧៤៧នាក់ ហើយប្រទេសជិតខាងកម្ពុជា ដូចជាឡាវ មានប្រមាណ ៤ ៨៥០នាក់ ថៃប្រមាណ ៦១៩នាក់ និងវៀតណាមប្រមាណ ៨ ៦៧៥នាក់។ នេះបើតាមរបាយការណ៍ដែលផ្សព្វផ្សាយដោយសារព័ត៌មានអាមេរិកឈ្មោះ Fox News។
ការបណ្តេញជនអន្តោប្រវេសន៍ខុសច្បាប់យ៉ាងច្រើនបែបនេះ ក៏ធ្លាប់កើតឡើងម្តងរួចមកហើយ ក្រោមការដឹកនាំរបស់លោក ដូណាល់ ត្រាំ កាលពីអាណត្តិមុន។
អ្នកនាំពាក្យរបស់រដ្ឋាភិបាល លោក ប៉ែន បូណា ថ្លែងថា កម្ពុជាត្រៀមខ្លួនជានិច្ច ដើម្បីទទួលប្រជាពលរដ្ឋខ្មែរដែលអាមេរិកគ្រោងបញ្ជូនមកកម្ពុជាវិញ។
លោកប្រាប់វីអូអេថា៖ «រាជរដ្ឋាភិបាល ត្រៀមសហការ ដើម្បីទទួលយកបងប្អូនប្រជាពលរដ្ឋខ្មែរយើងរូបណា ដែលរដ្ឋាភិបាលសហរដ្ឋអាមេរិក ចាប់បញ្ជូនត្រឡប់មកប្រទេសវិញ ពីព្រោះថាបងប្អូនទាំងនោះ គឺជាពលរដ្ឋខ្មែរ។ រាជរដ្ឋាភិបាលយកចិត្តទុកដាក់ចំពោះសុខទុក្ខបងប្អូនប្រជាពលរដ្ឋខ្មែរគ្រប់គ្នា ដោយមិនបោះបង់ចោលពលរដ្ឋខ្មែរ រូបណាម្នាក់ទេ។ នេះគឺជាអ្វីដែលរាជរដ្ឋាភិបាល បានធ្វើរួចមកហើយ យើងធ្លាប់បានទទួលប្រជាពលរដ្ឋខ្មែរ ជាហូរហែដែលរដ្ឋាភិបាលសហរដ្ឋអាមេរិកហ្នឹងបញ្ជូនមកប្រទេសវិញហ្នឹង»។
វីអូអេមិនទាន់អាចសុំការបញ្ជាក់ពីលោក ជុំ សុន្ទរី អ្នកនាំពាក្យក្រសួងការបរទេសកម្ពុជាបាននៅឡើយទេ។
រហូតមកដល់ពេលនេះ មិនទាន់មានព័ត៌មានជាក់លាក់អំពីពេលវេលាថាតើប្រជាពលរដ្ឋខ្មែរទាំងនោះនឹងត្រូវមកដល់ប្រទេសកម្ពុជាវិញ នាពេលណានោះទេ។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ កត់សម្គាល់ថា ការបញ្ជូនប្រជាពលរដ្ឋខ្មែរជិត ២ពាន់នាក់ ស្របពេលដែលស្ថានភាពរបស់ទីភ្នាក់ងារជំនួយអាមេរិក USAID កំពុងស្ថិតក្នុងស្ថានភាពមិនច្បាស់លាស់បែបនេះ នោះវានឹងធ្វើឱ្យបន្ទុកទាំងអស់ធ្លាក់ទៅលើរដ្ឋាភិបាលកម្ពុជា ព្រោះកន្លងមកការបញ្ជូនជនអន្តោប្រវេសន៍ខុសច្បាប់មកកម្ពុជា ត្រូវបានទីភ្នាក់ងារជំនួយអាមេរិក USAID ជួយគាំទ្រការធ្វើមាតុភូមិនិវត្តន៍ទាំងនោះ។
លោកថ្លែងថា៖ «ការអនុវត្តច្បាប់ វាជារឿងរបស់ប្រទេសនីមួយៗ ក៏ប៉ុន្តែបើយើងគិតអំពីបញ្ហាសិទ្ធិមនុស្ស និងបញ្ហាមនុស្សធម៌ និងសីលធម៌ អាហ្នឹងគួរតែពិនិត្យមើលឱ្យបានច្បាស់លាស់មុននឹងធ្វើការសម្រេចចិត្តក្នុងការបញ្ជូនវិលត្រឡប់ទៅប្រទេសដើមវិញ ជួនកាលអ្នកខ្លះ អាចនឹងរងការធ្វើទុក្ខបុកម្នេញពួកគេ មុននឹងពួកគេ ធ្វើការសម្រេចចិត្តធ្វើការភៀសខ្លួនទៅសហរដ្ឋអាមេរិក ហើយនៅពេលបញ្ជូនត្រឡប់ទៅវិញ អាចនឹងជួបបញ្ហានៃការធ្វើទុក្ខបុកម្នេញ ពាក់ព័ន្ធបញ្ហាសិទ្ធិមនុស្សផងដែរ»។
គួរបញ្ជាក់ថា អំឡុងពេលអ្នកស្រី Samantha Power នាយិកានៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) មកបំពេញទស្សនកិច្ចនៅកម្ពុជា កាលពីខែតុលា ឆ្នាំ២០២៤ គឺអ្នកស្រីបានប្រកាសកម្មវិធីថ្មីៗ និងផ្តល់ថវិកាបន្ថែមជាង ៣៨លានដុល្លារដល់កម្ពុជា។ នាពេលនោះ អ្នកស្រី Samantha Power ក៏បានលើកឡើងថាទីភ្នាក់ងារជំនួយអាមេរិក USAIDនឹងបន្តជួយគាំទ្រដល់ការធ្វើមាតុភូមិនិវត្តន៍របស់ប្រជាជនកម្ពុជាពីសហរដ្ឋអាមេរិកវិញ ក្នុងពេលដែលពួកគេធ្វើសមាហរណកម្មចូលក្នុងសង្គមកម្ពុជាវិញ និងកសាងនូវជីវភាពដែលមានលំនឹង និងប្រកបដោយភាពឯករាជ្យ។ នេះបើតាមសេចក្តីប្រកាសព័ត៌មានរបស់ USAIDកាលពីកន្លងទៅ។
ប៉ុន្តែសារព័ត៌មានអន្តរជាតិបានចុះផ្សាយជាបន្តបន្ទាប់ថា សហរដ្ឋអាមេរិកកំពុងតែរៀបចំដាក់បញ្ចូល USAID ទៅដាក់នៅក្រោមការគ្រប់គ្រងរបស់ក្រសួងការបរទេសអាមេរិក។ ក្រោយមានចំណាត់ការបែបនេះ មានការលើកឡើងថា អាមេរិកនឹងបញ្ចប់ជំនួយមនុស្សធម៌និងអភិវឌ្ឍន៍របស់ខ្លួនមកប្រទេសទាំងអស់នៅក្នុងពិភពលោក ក្នុងនោះមានប្រទេសកម្ពុជាផងដែរ៕
កម្ពុជាថាត្រៀមទទួលជនអន្តោប្រវេសន៍ខ្មែរជិត២ពាន់នាក់ ដែលរដ្ឋបាលលោក Trump គ្រោងបញ្ជូនចេញពីអាមេរិក
ភ្នំពេញ —
វេទិកាបញ្ចេញមតិ