អគ្គលេខាធិការអង្គការសហប្រជាជាតិ(អ.ស.ប) លោក Antonio Guterres បានរិះគន់ការបោះឆ្នោតនៅកម្ពុជានាពេលខាងមុខ ក្រោយគណបក្សភ្លើងទៀនដែលជាគណបក្សប្រឆាំងដ៏ធំក្នុងប្រទេស មិនត្រូវបានអនុញ្ញាតឱ្យចូលរួមការបោះឆ្នោតជាតិ ដែលនឹងធ្វើឡើង នៅថ្ងៃទី ២៣ ខែកក្កដា ឆ្នាំ ២០២៣។ នេះបើតាមអ្នកនាំពាក្យរបស់អង្គការសហប្រជាជាតិ លោក Stephane Dujarric ដែលបានប្រាប់អ្នកសារព័ត៌មានក្នុងសន្និសីទមួយនៅក្រៅប្រទេស។
អគ្គលេខាធិការអង្គការសហប្រជាជាតិ លោក Antonio Guterres បានសង្កត់ធ្ងន់ថា ការបោះឆ្នោតដែលមានការចូលរួមពីគ្រប់ភាគី មានពហុមតិ ហើយអ្នកបោះឆ្នោតអាចមានជម្រើសជ្រើសរើសតំណាងរបស់ពួកគេ «មានសារៈសំខាន់ ដើម្បីបង្កើតទំនុកចិត្តនៅក្នុងដំណើរការបោះឆ្នោត និងគាំទ្រលទ្ធភាពរបស់ប្រជាជនកម្ពុជាក្នុងការបង្ហាញអំពីសិទ្ធិប្រជាធិបតេយ្យរបស់ពួកគេ»។
បើតាមអ្នកនាំពាក្យរបស់ អ.ស.ប នៅក្នុងដំណើរទស្សនកិច្ចទៅកាន់ប្រទេសកម្ពុជា កាលពីឆ្នាំមុន អគ្គលេខាធិការអង្គការសហប្រជាជាតិបានលើកឡើងអំពីសារៈសំខាន់នៃការបើកលម្ហសិទ្ធិស៊ីវិល សេរីភាពរបស់អ្នកការពារសិទ្ធិមនុស្ស និងអង្គការសង្គមស៊ីវិល សម្រាប់អភិវឌ្ឍន៍ និងដំណើរការនៃការកសាងសន្តិភាពក្នុងប្រទេសកម្ពុជាឱ្យកាន់តែខ្លាំង។
អគ្គលេខាធិការអង្គការសហប្រជាជាតិបានបញ្ជាក់ជាថ្មីអំពីការប្តេជ្ញាចិត្តរបស់អង្គការសហប្រជាជាតិ ដើម្បីគាំទ្រប្រទេសកម្ពុជាដែលមានសន្តិភាព និងដើរតាមគន្លងប្រជាធិបតេយ្យ ដែលគោរពពេញលេញនូវសិទ្ធិមនុស្សរបស់ប្រជាពលរដ្ឋទាំងអស់។ នេះបើតាមអ្នកនាំពាក្យរបស់ អ.ស.ប។
អ្នកនាំពាក្យរដ្ឋាភិបាល លោក ផៃ ស៊ីផាន ប្រាប់វីអូអេនៅថ្ងៃព្រហស្បតិ៍នេះថា លោកអរគុណដល់ការយកចិត្តទុកដាក់របស់អង្គការសហប្រជាជាតិមកលើកម្ពុជា។ ប៉ុន្តែលោកស្នើឱ្យខាងអង្គការសហប្រជាជាតិគួរណាស់តែពិនិត្យមើលព័ត៌មានបន្ថែមទៀតឱ្យបានច្រើន មុននឹងរិះគន់ដំណើរការបោះឆ្នោតនៅកម្ពុជា។
លោកថ្លែងថា៖ «មន្ត្រីដែលបម្រើការងារនៅអង្គការសហប្រជាជាតិហ្នឹង ខ្ញុំសូមថ្លែងអំណរគុណហើយដែលគាត់លើកឡើង យកចិត្តទុកដាក់ចំពោះកម្ពុជា ក៏ប៉ុន្តែក៏សុំលើកទឹកចិត្តឱ្យគាត់តាមដានមើលគ្រប់ដំណើរការនៃកិច្ចអនុវត្តការងារដែលពាក់ព័ន្ធនឹងការប្រកួត ចុះឈ្មោះចូលរួមក្នុងការបោះឆ្នោតនេះឯង បាទ»។
លោក ផៃ ស៊ីផាន លើកឡើងការពន្យល់របស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលថា គណបក្សភ្លើងទៀនខ្វះឯកសារដើម រហូតដល់មិនអាចចុះឈ្មោះបាន។
កាលពីកន្លងទៅ គណបក្សភ្លើងទៀនបានអះអាងថា ខ្លួនបានព្យាយាមស្វែងរកដំណោះស្រាយដោយស្នើសុំសេចក្តីចម្លងដែលមានបញ្ជាក់នីត្យានុកូលកម្មនៃប្រកាសលេខ ១៩៣ ពីក្រសួងមហាផ្ទៃ ប៉ុន្តែមិនទទួលបានតាមការស្នើសុំ។ គណបក្សភ្លើងទៀនដែលទទួលបានសំឡេងគាំទ្រពីប្រជាពលរដ្ឋជាង ១លាន ៦សែននាក់ កាលពីពេលបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ ២០២២ នៅតែរក្សាជំហរ និងបង្ហាញថា ខ្លួនពិតជាចង់ចូលរួមការបោះឆ្នោតថ្នាក់ជាតិ និងមិនមានឧបាយកលឱ្យបរទេសគាបសង្កត់រដ្ឋាភិបាលឡើយ។
ក្រសួងការបរទេសកម្ពុជាធ្លាប់ចេញសេចក្តីប្រកាសព័ត៌មានមួយថា ការមិនអាចចុះបញ្ជីចូលរួមការបោះឆ្នោតបានរបស់គណបក្សភ្លើងទៀន គឺដោយសារតែគណបក្សនោះ «មិនយកចិត្តទុកដាក់ចំពោះច្បាប់ និងបទបញ្ញត្តិបោះឆ្នោត ក៏ដូចជាសេចក្តីជូនដំណឹងនានារបស់ គ.ជ.ប»។
ក្រសួងការបរទេសកម្ពុជាបញ្ជាក់ថា៖ «អវត្តមានរបស់គណបក្សនយោបាយមួយពីដំណើរការបោះឆ្នោត ដោយសារការធ្វេសប្រហែស មិនគោរពច្បាប់នោះ ពុំបានប៉ះពាល់ដល់ភាពសេរី ពហុបក្ស និងប្រជាធិបតេយ្យរបស់កម្ពុជាឡើយ ព្រោះអ្នកបោះឆ្នោតនៅតែអាចជ្រើសរើសដោយសេរីនូវគណបក្សនយោបាយមួយ ក្នុងចំណោមគណបក្សប្រកួតប្រជែងគ្នាយ៉ាងតិចចំនួន ១៨»។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី ១៦ ខែឧសភា ឆ្នាំ ២០២៣។
អវត្តមានរបស់គណបក្សភ្លើងទៀនបាននាំឱ្យអ្នកតាមដានលើកឡើងថា គណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន នឹងឈ្នះអាសនៈរដ្ឋសភាទាំង១២៥ ហើយកម្ពុជានឹងបន្តដឹកនាំដោយឯកបក្សរយៈពេល ៥ ឆ្នាំទៀត បន្ទាប់ពីការរំលាយគណបក្សសង្គ្រោះជាតិ កាលពីឆ្នាំ ២០១៧ ដែលធ្វើឱ្យគណបក្សជំទាស់មួយនេះមិនអាចចូលរួមការបោះឆ្នោតកាលពីឆ្នាំ ២០១៨៕
