ប្រមុខអង្គការសហប្រជាជាតិបាននិយាយកាលពីថ្ងៃចន្ទថាស្ថានការណ៍នៅតំបន់ហ្កាហ្សាដែលខ្ទេចខ្ទាំដោយសារសង្គ្រាមគឺពោរពេញដោយ «ភាពរន្ធត់និងភយន្តរាយ» និងបានព្រមានថាស្ថានភាពដែលជនជាតិប៉ាឡេស្ទីនកំពុងប្រឈមនៅទីនោះអាចមានទម្ងន់ស្មើនឹង «បទឧក្រិដ្ឋអន្តរជាតិដ៏ធ្ងន់ធ្ងរបំផុត»។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
នៅក្នុងសុន្ទរកថាដែលគេអានជំនួសរូបលោកនៅក្នុងសន្និសីទមួយក្នុងទីក្រុងគែរនៃប្រទេសអេហ្ស៊ីប ដែលត្រូវបានរៀបចំឡើងដើម្បីបង្កើនជំនួយមនុស្សធម៌ អគ្គលេខាធិការអង្គការសហប្រជាជាតិលោក Antonio Guterres បានជំរុញសហគមន៍អន្តរជាតិឲ្យ «កសាងគ្រឹះសម្រាប់សន្តិភាពប្រកបដោយនិរន្តរភាពនៅហ្កាហ្សានិងនៅទូទាំងតំបន់មជ្ឈិមបូព៌ា»។
សង្គ្រាមនៅហ្កាហ្សាបានផ្ទុះឡើងពេលក្រុមសកម្មប្រយុទ្ធហាម៉ាស់វាយប្រហារអ៊ីស្រាអែលនៅភាគខាងត្បូងកាលពីថ្ងៃទី ៧ ខែតុលា ឆ្នាំ ២០២៣ ដោយបានបណ្តាលឲ្យមនុស្ស ១.២០៨ នាក់ស្លាប់ ដែលភាគច្រើនគឺជាជនស៊ីវិល។ នេះបើយោងតាមការរាប់តួលេខផ្លូវការរបស់អ៊ីស្រាអែលដោយទីភ្នាក់ងារសារព័ត៌មាន AFP។
អ៊ីស្រាអែលបានធ្វើយុទ្ធនាការសងសឹកតបតទៅវិញដោយបានធ្វើឲ្យមនុស្ស ៤៤.៤២៩ នាក់ស្លាប់នៅហ្កាហ្សា។ នេះបើយោងតាមតួលេខពីក្រសួងសុខាភិបាលហ្កាហ្សា ដែលអង្គការសហប្រជាជាតិចាត់ទុកថាគួរឲ្យជឿជាក់បាន។
លោក Guterres បានគូសបញ្ជាក់ពីមហន្តរាយនៃជម្លោះនេះនិងតម្រូវការបន្ទាន់សម្រាប់សកម្មភាពអន្តរជាតិ។ លោកថ្លែងថា៖ «កង្វះអាហារូបត្ថម្ភមានគ្រប់ទិសទី ...ទុរ្ភិក្សនឹងមកដល់ឆាប់ៗ ខណៈប្រព័ន្ធសុខាភិបាលបានដួលរលំទៅហើយ»។
លោក Guterres បានបន្ថែមថា ហ្កាហ្សាឥឡូវនេះមាន «ចំនួនកុមារពិការដៃជើងខ្ពស់ជាងទីណាៗទាំងអស់ក្នុងពិភពលោក» ដោយ «កុមារជាច្រើនបានដាច់ដៃឬជើង ហើយត្រូវវះកាត់ដោយគ្មានសូម្បីតែថ្នាំស្ពឹក»។ លោកក៏បានរិះគន់ផងដែរលើការរិតត្បឹតដ៏ធ្ងន់ធ្ងរបំផុតលើការបញ្ជូនជំនួយចូលក្នុងតំបន់នោះ ដោយចាត់ទុកការដឹកជំនួយក្នុងកម្រិតបច្ចុប្បន្ននេះថា «មិនគ្រប់គ្រាន់ទាល់តែសោះ»៕
ប្រធាន UN ថាស្ថានការណ៍នៅហ្កាហ្សាពោរពេញដោយ «ភាពរន្ធត់និងភយន្តរាយ»
វេទិកាបញ្ចេញមតិ