យោធាអ៊ុយក្រែនបាននិយាយនៅថ្ងៃចន្ទនេះថា ខ្លួនបានបាញ់ទម្លាក់ដ្រូនចំនួន៩៣ គ្រឿងក្នុងចំណោមដ្រូនទាំងអស់១៤១គ្រឿងដែលកងទ័ពរុស្ស៊ីបានបង្ហោះក្នុងរយៈពេលមួយយប់នៅក្នុងការវាយប្រហារដែលបានដៅលើតំបន់នានានៅទូទាំងប្រទេស។
ការស្ទាក់បាញ់បានកើតមានឡើងនៅលើតំបន់ Cherkasy, Chernihiv, Dnipropetrovsk, Donetsk, Kharkiv, Kherson, Khmelnytskyi, Kirovohrad, Kyiv, Mykolaiv, Poltava, Sumy និង Vinnytsia។ នេះបើតាមកងទ័ពអាកាសរបស់អ៊ុយក្រែន។
អភិបាលតំបន់ Dnipropetrovsk លោក Serhiy Lysak បាននិយាយនៅលើបណ្តាញតេឡេក្រាមថា ការវាយប្រហាររបស់រុស្ស៊ីដែលរួមមានទាំងកាំភ្លើងធំនិងកាំជ្រួចមីស៊ីលបានធ្វើឱ្យខូចអគារដែលមានកម្ពស់៤ជាន់។
ក្រសួងការពារជាតិរុស្ស៊ីបានបញ្ជាក់នៅថ្ងៃចន្ទនេះថា ខ្លួនបានកម្ទេចដ្រូនអ៊ុយក្រែនជាង ៣០ គ្រឿង កាលពីយប់ថ្ងៃអាទិត្យ និងព្រឹកថ្ងៃចន្ទ។
អភិបាលតំបន់ Kaluga លោក Vladislav Shapsha បាននិយាយនៅលើតេឡេក្រាមថា ការធ្លាក់បំណែកមកពីដ្រូនដែលត្រូវបានកម្ទេចនោះបានបណ្តាលឱ្យមានអគ្គិភ័យនៅឯកន្លែងពាណិជ្ជកម្មមួយដែលត្រូវបានពន្លត់វិញភ្លាមៗ។
នៅក្នុងតំបន់ Belgorod លោកអភិបាល Vyacheslav Gladkov បាននិយាយថា ការវាយប្រហាររបស់ដ្រូនមួយបានត្រូវចំរថយន្តមួយគ្រឿងដែលធ្វើឱ្យស្ត្រីម្នាក់រងរបួស។ លោក Gladkov បាននិយាយទៀតថា ការវាយប្រហាររបស់អ៊ុយក្រែនក៏បានធ្វើឱ្យខូចខាតផ្ទះ៦ខ្នងដែរ។
ប្រព័ន្ធការពារដែនអាកាសរុស្ស៊ីក៏បានបាញ់ទម្លាក់ដ្រូនមួយចំនួនលើតំបន់ Bryansk, Kursk, Ryazan, Oryol និង Tatarstan៕
ព័ត៌មានខ្លះនៃសេចក្តីរាយការណ៍នេះត្រូវផ្តល់ដោយទីភ្នាក់ងារសារព័ត៌មាន AFP និង Reuters។
