- ដោយ VOA
ជនជាតិរុស្សីខ្លះនៅអាមេរិករងការវាយប្រហារដោយសារសង្គ្រាមរបស់លោក Putin នៅអ៊ុយក្រែន
សង្គ្រាមរបស់លោក Putin នៅអ៊ុយក្រែនកំពុងបង្កឲ្យជនជាតិរុស្ស៊ីមួយចំនួន ដែលរស់នៅសហរដ្ឋអាមេរិក រងគ្រោះដោយសារសកម្មភាពបំផ្លិចបំផ្លាញទ្រព្យសម្បត្តិផ្ទាល់ខ្លួន វប្បធម៌លុបបំបាត់ពីសង្គម ផលប៉ះពាល់ផ្នែកហិរញ្ញវត្ថុ។ អ្នកស្រី Veronica Balderas Iglesias នៃ VOA បានរាយការណ៍ថា ជនជាតិរុស្ស៊ីនៅអាមេរិកជាច្រើន ប្រឆាំងនឹងការឈ្លានពានរបស់រដ្ឋាភិបាលក្រុងមូស្គូ ហើយកំពុងទាមទារឲ្យមានសន្តិភាព។ លោក ចាប ចិត្រា ជូនសេចក្តីប្រែសម្រួលដូចតទៅ៕
ក្រុមប្រឹក្សាសន្តិសុខអង្គការសហប្រជាជាតិ នឹងជួបប្រជុំនៅថ្ងៃសុក្រនេះស្តីពីអាវុធជីវសាស្ត្រតាមសំណើរបស់រដ្ឋាភិបាលទីក្រុងមូស្គូ
ក្រុមប្រឹក្សាសន្តិសុខអង្គការសហប្រជាជាតិ នឹងកោះប្រជុំក្នុងគ្រាអាសន្ននៅថ្ងៃសុក្រនេះលើបទចោទប្រកាន់ស្តីពីការផលិតអាវុធជីវសាស្ត្រនៅក្នុងប្រទេសអ៊ុយក្រែនទៅតាមសំណើរបស់រដ្ឋាភិបាលក្រុងមូស្គូ ដែលភាពគួរឲ្យទុកចិត្តបានស្តីពីអាវុធគីមីនោះ បានត្រូវចោទសួរក្នុងសម័យប្រជុំស្តីពីប្រទេសស៊ីរី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ប្រទេសរុស្ស៊ី កាលពីថ្ងៃព្រហស្បតិ៍ បានចោទប្រកាន់សហរដ្ឋអាមេរិកពីការផ្តល់ថវិកាដល់ការស្រាវជ្រាវនៅក្នុងការអភិវឌ្ឍអាវុធជីវសាស្ត្រនៅក្នុងប្រទេសអ៊ុយក្រែនដែលបានប្រឈមការវាយប្រហារពីកងទ័ពរុស្ស៊ីរាប់ម៉ឺននាក់ចាប់តាំងពីថ្ងៃទី២៤ ខែកុម្ភៈមក។
ទាំងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងកៀវ បានច្រានចោលការចោទប្រកាន់នេះ ដោយសហរដ្ឋអាមេរិក និយាយថា ការចោទប្រកាន់នេះជាសញ្ញាថា រដ្ឋាភិបាលក្រុងមូស្គូ អាចប្រើអាវុធគីមីដោយខ្លួនឯងនៅពេលឆាប់ៗខាងមុខនេះ។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
- ដោយ AFP
កងកម្លាំងរុស្សីបានបាញ់ផ្លោងដាក់ទីក្រុងអ៊ុយក្រែនមួយទៀត ហើយរដ្ឋធានីកៀវក្លាយជាបន្ទាយសម្រាប់ការពារមួយ
ការបាញ់ផ្លោងរបស់រុស្ស៊ី បានត្រូវចំជនស៊ីវិលនៅទីក្រុងDniproភាគកណ្តាលនៃប្រទេសអ៊ុយក្រែននៅថ្ងៃសុក្រនេះខណៈដែលកងកម្លាំងរុស្ស៊ី កំពុងរុលខិតកាន់តែជិតទៅកាន់រដ្ឋធានីកៀវរបស់អ៊ុយក្រែនដែលមន្ត្រីនានានិយាយថា ទីក្រុងនេះត្រូវបានប្រែក្លាយទៅជាបន្ទាយដើម្បីការពារ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ជនស៊ីវិលរាប់ម៉ឺននាក់ បានជាប់គាំងនិងស្ថិតក្រោមការវាយប្រហារនៅក្នុងទីក្រុងនានារបស់អ៊ុយក្រែនដែលរួមមានទីក្រុងMariupolដែលស្ថិតក្នុងការឡោមព័ទ្ធ ក្រោយពីការចរចារលើកទី១រវាងប្រមុខការទូតរុស៊្សីនិងអ៊ុយក្រែនដែលបានបញ្ចប់ទៅកាលពីថ្ងៃព្រហស្បតិ៍ម្សិលមិញ ដោយពុំមានលទ្ធផលអ្វីនោះ។
នៅព្រឹកថ្ងៃសុក្រនេះ យន្តហោះចម្បាំងរុស្ស៊ី បានធ្វើអ្វីដែលហាក់ដូចជាការវាយប្រហារដោយផ្ទាល់ជាលើកដំបូងទៅលើទីក្រុង Dnipro ដោយបានសម្លាប់មនុស្សម្នាក់។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
- ដោយ Reuters
សហរដ្ឋអាមេរិក បង្កើនល្បឿនការផ្តល់អាជ្ញាបណ្ណដឹកជញ្ជូនកាំភ្លើង គ្រាប់រំសេវដល់ប្រទេសអ៊ុយក្រែន
សហរដ្ឋអាមេរិក កំពុងដំណើរការដ៏ឆាប់រហ័សទៅតាមសំណើមកពីពលរដ្ឋអាមេរិកាំងដើម្បីនាំចេញកាំភ្លើងនិងគ្រាប់រំសេវទៅឲ្យប្រទេសអ៊ុយក្រែន។ នេះបើតាមក្រសួងពាណិជ្ជកម្មសហរដ្ឋអាមេរិកកាលពីថ្ងៃពុធ ហើយត្រូវបានរាយការណ៍ដោយទីភ្នាក់ងារព័ត៌មាន Reuters។
ពលរដ្ឋអាមេរិកាំង កំពុងប្រមូលអាវុធសម្រាប់អ៊ុយក្រែន បន្ទាប់ពីប្រធានាធិបតីអ៊ុយក្រែនលោក Volodymyr Zelenskyy បានអំពាវនាវដល់ពលរដ្ឋរបស់លោកឲ្យការពារប្រទេសចេញផុតពីការឈ្លានពានរបស់កងកម្លាំងរុស្ស៊ីហើយបានសន្យាផ្តល់អាវុធដល់ពួកគេ។
ក្រសួងពាណិជ្ជកម្ម បានបញ្ជាក់ថា ខ្លួនបានដាក់ការត្រួតពិនិត្យការនាំចេញអាវុធលើប្រទេសរុស្ស៊ីដើម្បី«បន្ថយសមត្ថភាពរបស់រុស្ស៊ីក្នុងការបន្តការឈ្លានពានខាងយោធារបស់ខ្លួន» ហើយពលរដ្ឋអាមេរិកាំង ត្រូវមើលបទបញ្ញតិរបស់ក្រសួងពាណិជ្ជកម្មថាតើអាជ្ញាប័ណ្ណនេះ ត្រូវការដែរឬទេដើម្បីដឹកជញ្ជូនអាវុធទាំងនោះទៅកាន់ប្រទេសអ៊ុយក្រែន៕