- ដោយ Reuters
អង្គការសហប្រជាជាតិ៖ ជនស៊ីវិលជាង ៣៦០ នាក់ត្រូវបានសម្លាប់នៅអ៊ុយក្រែន
ជនស៊ីវិលយ៉ាងហោចណាស់ចំនួន ៣៦៤ នាក់ត្រូវបានបញ្ជាក់ថាត្រូវបានសម្លាប់នៅក្នុងប្រទេសអ៊ុយក្រែន ចាប់តាំងពីពេលដែលកងកម្លាំងរុស្ស៊ីបានឈ្លានពានប្រទេសនេះកាលពីថ្ងៃទី២៤ ខែកុម្ភៈមក ហើយជនស៊ីវិលចំនួន ៧៥៩ នាក់បានរងរបួស។ នេះបើយោងតាមការបញ្ជាក់របស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) កាលពីថ្ងៃអាទិត្យ។
ការិយាល័យនេះបានឲ្យដឹងទៀតថា តួលេខពិតប្រាកដនៃចំនួនជនស៊ីវិលដែលបានស្លាប់និងរងរបួសប្រហែលជាអាច «ខ្ពស់ជាងនេះច្រើន»៕
- ដោយ Reuters
លោក Putin ប្រាប់អ៊ុយក្រែនឲ្យឈប់ប្រយុទ្ធ
ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃអាទិត្យថា យុទ្ធនាការរបស់លោកនៅក្នុងប្រទេសអ៊ុយក្រែននឹងអនុវត្តទៅតាមផែនការ និងមិនបញ្ឈប់នោះទេ លុះត្រាតែរដ្ឋាភិបាលអ៊ុយក្រែនឈប់ប្រយុទ្ធ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
លោក Putin បានថ្លែងដូច្នេះ ស្របពេលដែលកិច្ចខិតខំប្រឹងប្រែងក្នុងការជម្លៀសប្រជាជនចំនួនប្រហែល ២ សែននាក់ចេញពីទីក្រុង Mariupol ដែលជាទីក្រុងរងការវាយប្រហារដោយគ្រាប់ផ្លោងរបស់រុស្ស៊ីយ៉ាងធ្ងន់ធ្ងរ បានបរាជ័យនៅក្នុងថ្ងៃទីពីរ។
មនុស្សភាគច្រើនដែលជាប់នៅក្នុងទីក្រុង Mariupol ដែលជាទីក្រុងកំពង់ផែរបស់អ៊ុយក្រែន កំពុងស្នាក់នៅក្នុងកន្លែងជ្រកពួនពីគ្រាប់ផ្លោង ដើម្បីគេចពីគ្រាប់ផ្លោងដែលកងកម្លាំងរុស្ស៊ីបានបាញ់ស្ទើរតែរាល់ថ្ងៃអស់រយៈពេលជាង ៦ ថ្ងៃមកហើយ។ ការបាញ់គ្រាប់ផ្លោងពីសំណាក់ទាហានរុស្ស៊ីនេះបានកាត់ផ្ដាច់ស្បៀងអាហារ ទឹក និងការផ្គត់ផ្គង់អគ្គិសនីនិងកម្ដៅ។ នេះបើយោងតាមការបញ្ជាក់របស់អាជ្ញាធរអ៊ុយក្រែន៕
ប្រធានាធិបតីអ៊ុយក្រែនថា រុស្ស៊ីត្រៀមទម្លាក់គ្រាប់បែកលើទីក្រុង Odessa របស់អ៊ុយក្រែន
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអាទិត្យនេះថា ប្រទេសរុស្ស៊ីមានផែនការទម្លាក់គ្រាប់បែកលើទីក្រុង Odessa របស់ប្រទេសអ៊ុយក្រែន។ លោក Zelenskyy បានបញ្ជាក់នៅក្នុងសេចក្ដីថ្លែងការណ៍មួយតាមកញ្ចក់ទូរទស្សន៍ថា ប្រសិនបើករណីនេះកើតឡើងមែន វា«នឹងក្លាយជាឧក្រិដ្ឋកម្មសង្គ្រាម...ឧក្រិដ្ឋកម្មជាប្រវត្តិសាស្ត្រ»។
លោក Zelenskyy បាននិយាយជាភាសារុស្ស៊ីសម្រាប់ផ្នែកខ្លះនៃសេចក្ដីថ្លែងការណ៍នេះ ដោយបានជំរុញប្រជាពលរដ្ឋរុស្ស៊ីឲ្យជ្រើសរើសរវាងជីវិតនិងទាសភាព «នៅពេលដែលវានៅអាចទៅរួចនៅក្នុងការយកឈ្នះលើអំពើអាក្រក់ដោយគ្មានការបាត់បង់ដែលមិនអាចកែប្រែបាន»។
ប្រធានាធិបតីរុស្ស៊ីលោក Vladimir Putin បាននិយាយកាលពីថ្ងៃសៅរ៍ថា ភាពជាប្រទេសរបស់ប្រទេសអ៊ុយក្រែនកំពុងប្រឈមនឹងហានិភ័យ ប្រសិនបើប្រទេសអ៊ុយក្រែននៅបន្តមាគ៌ាបច្ចុប្បន្នរបស់ខ្លួន។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
សហភាពអឺរ៉ុបដាក់ទណ្ឌកម្មលើមហាសេដ្ឋីមានបំផុតនៅរុស្ស៊ី
លោក Alexei Mordashov ដែលជាមហាសេដ្ឋីមានជាងគេបំផុតនៅក្នុងប្រទេសរុស្ស៊ី និងជាអ្នកមានភាគហ៊ុនច្រើនជាងគេបំផុតនៅក្នុងក្រុមហ៊ុន Severstal ដែលជាក្រុមហ៊ុនផលិតដែកថែបដ៏ធំបំផុតមួយរបស់រុស្ស៊ី ត្រូវបានសហភាពអឺរ៉ុបដាក់ចូលក្នុងបញ្ជីខ្មៅកាលពីសប្ដាហ៍មុន។ នេះបើយោងតាមសេចក្ដីរាយការណ៍របស់សារព័ត៌មាន USA Today។
លោក Mordashov ក៏ជាប្រធានក្រុមហ៊ុន Severgroup ផងដែរ។ សហភាពអឺរ៉ុបបានបញ្ជាក់ថា ក្រុមហ៊ុននេះគឺជាអ្នកគ្រប់គ្រងស្ថានីយ៍ទូរទស្សន៍នានាដែលជំរុញផ្សព្វផ្សាយគោលនយោបាយរបស់រដ្ឋាភិបាលរុស្ស៊ីនៅក្នុងការធ្វើឱ្យប្រទេសអ៊ុយក្រែនគ្មានស្ថិរភាព។
សហភាពអឺរ៉ុបក៏បានលើកឡើងផងដែរថា ធនាគារ Rossiya ដែលលោក Mordashov មានភាគហ៊ុនផងដែរនោះ គឺជា «ធនាគារផ្ទាល់ខ្លួន» របស់មន្ត្រីជាន់ខ្ពស់រុស្ស៊ីនានា ដែលទទួលបានប្រយោជន៍ពីការកាន់កាប់តំបន់ Crimea។ នេះបើយោងតាមសេចក្ដីរាយការណ៍របស់សារព័ត៌មាន USA Today។
កាលពីថ្ងៃទី ២៨ ខែកុម្ភៈ សហភាពអឺរ៉ុបបានប្រកាសដាក់ទណ្ឌកម្មប្រឆាំងនឹងអ្នកនាំពាក្យរដ្ឋាភិបាលរុស្ស៊ីលោក Dmitry Peskov និងមន្ត្រីរុស្ស៊ី ២៤ រូបផ្សេងទៀត ដែលមានដូចជាអ្នកនយោបាយ ពាណិជ្ជករ អ្នកគ្រប់គ្រងកំពូលៗ និងអ្នកសារព័ត៌មានដែលមានទំនាក់ទំនងជិតស្និទ្ធជាមួយនឹងប្រធានាធិបតីរុស្ស៊ីលោក Vladimir Putin។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
