លោកនាយឧត្តមសេនីយ៍ Keith Kellogg បេសកជនសហរដ្ឋអាមេរិកទទួលបន្ទុកកិច្ចការអ៊ុយក្រែននិងរុស្ស៊ី បាននិយាយនៅថ្ងៃពុធនេះថា សហរដ្ឋអាមេរិកយល់ពីភាពចាំបាច់ក្នុងការធានាសន្តិសុខសម្រាប់អ៊ុយក្រែន។ លោកថ្លែងដូច្នេះនៅពេលលោកធ្វើទស្សនកិច្ចនៅក្នុងប្រទេសអ៊ុយក្រែនដើម្បីពិភាក្សាជាមួយនឹងមន្ត្រីនៃប្រទេសនេះ។
លោក Kellogg បានប្រាប់អ្នកយកព័ត៌មាននៅក្នុងទីក្រុងកៀវថា លោកមកអ៊ុយក្រែនដើម្បី «ស្ដាប់» អំពីក្ដីបារម្ភរបស់ថ្នាក់ដឹកនាំអ៊ុយក្រែន និងត្រឡប់ទៅសហរដ្ឋអាមេរិកវិញដើម្បីប្រឹក្សាយោបល់ជាមួយនឹងលោកប្រធានាធិបតី Donald Trump។
លោក Kellogg បាននិយាយថា សហរដ្ឋអាមេរិកចង់ឲ្យមានការបញ្ចប់សង្គ្រាមនៅអ៊ុយក្រែនដោយហេតុថាវាល្អសម្រាប់តំបន់និងពិភពលោក។
ការពិភាក្សានេះបានធ្វើឡើងចំពេលដែលមានកិច្ចប្រឹងប្រែងការទូតជាច្រើនផ្ដោតលើសង្គ្រាមរបស់រុស្ស៊ីនៅអ៊ុយក្រែន ដែលក្នុងនោះរួមមានទាំងការទទួលជួបពិភាក្សារបស់ប្រធានាធិបតីបារាំងលោក Emmanuel Macron ជាមួយនឹងបណ្ដាមេដឹកនាំនៅអឺរ៉ុបនៅថ្ងៃពុធនេះសម្រាប់ការពិភាក្សាលើកទីពីរអំពីសង្គ្រាមនៅអ៊ុយក្រែននិងការគាំទ្ររបស់អឺរ៉ុបចំពោះអ៊ុយក្រែនផងដែរ។
លោក Kellogg ក៏បានជួបពិភាក្សាកាលពីដើមសប្ដាហ៍នេះជាមួយនឹងបណ្ដាមេដឹកនាំនៅអឺរ៉ុបផងដែរ ហើយកាលពីថ្ងៃអង្គារ រដ្ឋមន្ត្រីការបរទេសអាមេរិកលោក Marco Rubio បានជួបពិភាក្សាជាមួយនឹងរដ្ឋមន្ត្រីការបរទេសរុស្ស៊ីលោក Sergey Lavrov នៅក្នុងប្រទេសអារ៉ាប៊ីសាអ៊ូឌីត។
លោក Rubio បាននិយាយថា ទាំងអ៊ុយក្រែននិងរុស្ស៊ីត្រូវតែធ្វើសម្បទានដើម្បីសម្រេចឲ្យបាននូវសន្តិភាព។
ប្រធានាធិបតីអ៊ុយក្រែនលោក Volodymyr Zelenskyy បានជំទាស់ទៅនឹងការមិនបញ្ជូលលោកនៅក្នុងការប្រជុំដែលនេះជាជំហរមួយដែលលោក Trump បានរិះគន់៕
(ព័ត៌មានខ្លះសម្រាប់សេចក្តីរាយការណ៍នេះផ្តល់ដោយទីភ្នាក់ងារសារព័ត៌មានAP, AFP, និងReuters)
វេទិកាបញ្ចេញមតិ