រដ្ឋមន្ត្រីការបរទេសសហរដ្ឋអាមេរិកលោក Marco Rubioបាននិយាយកាលពីថ្ងៃអង្គារម្សិលមិញថាសហរដ្ឋអាមេរិកកំពុងធ្វើការឆ្ពោះទៅកាន់ដំណោះស្រាយប្រកបដោយ
«ភាពត្រឹមត្រូវ»និង«ចីរភាព»ដើម្បីបញ្ចប់សង្គ្រាម៣ឆ្នាំរបស់រុស្ស៊ីលើទឹកដីប្រទេសអ៊ុយក្រែន ក៏ប៉ុន្តែ គឺថាទាំងរដ្ឋាភិបាលក្រុងមូស្គូនិងក្រុងកៀវនឹងត្រូវធ្វើសម្បទានដើម្បីសម្រេចបានសន្តិភាពនេះ។
លោក Rubio បានធ្វើការវាយតម្លៃរបស់លោកបន្ទាប់ពីលោកនិងមន្ត្រីសំខាន់ៗផ្សេងទៀតបានជួបអស់ជាច្រើនម៉ោងនៅក្នុងប្រទេសអារ៉ាប់ប៊ី សាអូឌីតជាមួយរដ្ឋមន្ត្រីរុស្ស៊ីលោក Sergei Lavrovនិងពួកជំនួយការរបស់លោកនៅក្នុងការខំប្រឹងប្រែងលើកទី១ឆ្ពោះទៅកាន់ការបញ្ចប់សង្គ្រាមហើយនឹងធ្វើឱ្យប្រសើរឡើងនូវទំនាក់ទំនងរវាងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងមូស្គូដែលមានភាពតានតឺង។
លោក Rubio បានប្រាប់ពួកអ្នកយកព័ត៌មានថាថ្វីបើ មិនមានមន្ត្រីអ៊ុយក្រែនឬ អឺរ៉ុបបានស្ថិតនៅឯតុសម្រាប់ការចរចានោះក៏ដោយតែ«គោលដៅគឺបញ្ចប់សង្គ្រាមនៅក្នុងវិធីមួយដែលមានភាពត្រឹមត្រូវ ស្ថិតស្ថេរ ចីរភាពនិងអាចទទួលយកបានគ្រប់ភាគីទាំងអស់ដែលពាក់ព័ន្ធ»។
លោក Rubio បានប្រសាសន៍ទៀតថាលោកជឿថារដ្ឋាភិបាលក្រុងមូស្គូមានឆន្ទៈចូលរួមក្នុង«ដំណើរការដ៏ហ្មត់ចត់នេះ»ដើម្បីបញ្ចប់សង្គ្រាមដែលរុស្ស៊ីបានចាប់ផ្តើមដោយការឈ្លានពានពេញទំហឹងលើប្រទេសជិតខាងរបស់ខ្លួនកាលពី៣ឆ្នាំមុននៅសប្តាហ៍ក្រោយនេះ។
ទាហានរុស្ស៊ីនិងអ៊ុយក្រែនរាប់ម៉ឺននាក់ រួមជាមួយជនស៊ីវិលបានសម្លាប់នៅក្នុងការប្រយុទ្ធគ្នា ដែលជាជម្លោះដ៏អាក្រក់បំផុតនៅអឺរ៉ុបចាប់តាំងពីសង្គ្រាមលោកលើកទី២មក៕
