រោងចក្រអាមេរិកដែលធ្វើការលើផ្នែកកាត់ដេរមួយក្នុងស្រុកកំពង់ត្រឡាច ខេត្តកំពង់ឆ្នាំង បានបើកការដ្ឋានសាងសង់ទារកដ្ឋានកាលពីថ្ងៃព្រហស្បតិ៍ ដោយស្ថានទូតអាមេរិកបញ្ជាក់ថា នេះគឺជាការយកចិត្តទុកដាក់របស់រោងចក្រទៅលើកម្មករខ្មែរ។
ពិធីបើកការដ្ឋាននេះមានការចូលរួមពីរដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ លោក ហេង សួរ និងអ្នកស្រី Bridgette L. Walker ភារធារីស្ថានទូតសហរដ្ឋអាមេរិកប្រចាំកម្ពុជា។
ទារកដ្ឋាននេះមានទីតាំងស្ថិតក្នុងក្រុមហ៊ុនអ៊ីលីថិច Ealytex Garment នៅក្នុងភូមិផ្សារត្រាច ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។
អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ លោក កត្តា អ៊ន ថ្លែងថា ការបើកការដ្ឋានសាងសង់ទារកដ្ឋានក្រុមហ៊ុនអ៊ីលីថិច មិនមែនជាទារកដ្ឋានដំបូងនៅកម្ពុជាទេ នៅក្នុងការមើលថែទាំកូនៗតូចៗរបស់កម្មករនិយោជិត។ ទោះជាយ៉ាងណាក្តី ក៏លោកបានអំពាវនាវឱ្យនិយោជកបង្កើតទារកដ្ឋានមើលថែទាំកូនៗរបស់កម្មករនិយោជិតក្នុងប្រទេសកម្ពុជា។
លោកថ្លែងថា៖ «ក្រសួងការងារបានលើកទឹកចិត្តដល់និយោជកឱ្យធ្វើការបង្កើតទារកដ្ឋានក្នុងតំបន់រោងចក្ររបស់ខ្លួន ដើម្បីធានានិងផ្តល់ការមើលថែទាំដល់កូនៗរបស់កម្មករនិយោជិតយើងឱ្យបានល្អ ទាំងការថែទាំសុខភាព ទាំងការសិក្សា ទាំងការចំណីអាហារផ្សេងៗទាំងអស់ [...] ដូច្នេះហើយក្រសួងសូមអំពាវនាវបន្ថែមទៀតទៅដល់និយោជកទាំងអស់ សូមធ្វើការពិចារណានិងចូលរួមក្នុងការកសាងទារកដ្ឋានសម្រាប់បងប្អូនកម្មករនិយោជិតក្នុងការធានាផ្តល់ទំនុកចិត្ត និងការមើលថែទាំកូនៗរបស់បងប្អូនកម្មករនិយោជិតនៅទូទាំងប្រទេស»។
ចំណែកស្ថានទូតអាមេរិកប្រចាំនៅកម្ពុជាបានបង្ហោះសារនៅលើហ្វេសប៊ុករបស់ខ្លួនថា ទារកដ្ឋាននេះជាឧទាហរណ៍មួយទៀតនៃក្រុមហ៊ុនអាមេរិក ដែលទទួលបានជោគជ័យនៅកម្ពុជាក្នុងការអនុវត្តស្តង់ដារការងារខ្ពស់ រួមទាំងការផ្តល់ប្រាក់ឈ្នួល និងអត្ថប្រយោជន៍ត្រឹមត្រូវ។ ស្ថានទូតបញ្ជាក់ថា ទារកដ្ឋាននេះនឹងផ្តល់នូវបរិយាកាសការងារ ដែលមានសុវត្ថិភាព និងការថែទាំដល់កូនតូចៗរបស់កម្មករ៕
វេទិកាបញ្ចេញមតិ