មេបញ្ជាការកងទ័ពជើងគោកសហរដ្ឋអាមេរិកលោក Ronald P. Clark នៅថ្ងៃចន្ទ បានមកបំពេញទស្សនកិច្ចនៅកម្ពុជារយៈពេលពីរថ្ងៃ ដែលជាដំណើរទស្សនកិច្ចមួយត្រូវបានភាគីកម្ពុជាមើលឃើញថាដើម្បីកសាងទំនុកចិត្តនិងការជឿជាក់ក្នុងវិស័យការពារជាតិរវាងប្រទេសទាំងពីរ។ នេះបើយោងតាមសេចក្តីប្រកាសព័ត៌មានរបស់កងទ័ពជើងគោកកម្ពុជា ចុះថ្ងៃទី ២១ ខែកុម្ភៈ ឆ្នាំ ២០២៥។
ដំណើរទស្សនកិច្ចនេះនឹងធ្វើឡើងចាប់ពីថ្ងៃទី ២៤ ដល់ថ្ងៃទី ២៥ ខែកុម្ភៈ។ នៅក្នុងដំណើរទស្សនកិច្ចនេះ លោក Ronald P. Clark ជួបជាមួយលោកនាយករដ្ឋមន្រ្តី ហ៊ុន ម៉ាណែត លោក ទៀ សីហា រដ្ឋមន្រ្តីក្រសួងការពារជាតិ និងលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ។ នេះបើតាមសេចក្តីប្រកាសព័ត៌មានរបស់កងទ័ពជើងគោកកម្ពុជា។
លោក Ronald P. Clark ក៏នឹងមានជំនួបជាមួយលោក ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកកម្ពុជា នៅទីបញ្ជាការ បញ្ជាការដ្ឋានកងទ័ពជើងគោក ដែល«នឹងពិភាក្សាស៊ីជម្រៅក្នុងគោលបំណងពង្រឹងនិងពង្រីកកិច្ចសហប្រតិបត្តិការយោធា សំដៅកសាងទំនុកចិត្ត និងការជឿជាក់ក្នុងវិស័យការពារជាតិរវាងប្រទេសទាំងពីរ»។
បើតាមសេចក្តីប្រកាសរបស់កងទ័ពជើងគោកកម្ពុជា ដំណើរទស្សនកិច្ចនេះកើតមានឡើង ស្របពេលខួបលើកទី ៧៥ នៃទំនាក់ទំនងរវាងកម្ពុជានិងសហរដ្ឋអាមេរិក ហើយនេះជាលើកទី ២ នៃដំណើរទស្សនកិច្ចរបស់មន្រ្តីជាន់ខ្ពស់នៃកងទ័ពជើងគោកអាមេរិកមកកម្ពុជា។
វីអូអេមិនទាន់អាចសុំការអត្ថាធិប្បាយពីអ្នកស្រី ម៉ាលី សុជាតា អ្នកនាំពាក្យក្រសួងការពារជាតិបាននៅឡើយទេ។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណារ៉ា យល់ថា ប្រទេសទាំងពីរមានការជជែកគ្នា ដែលលោកមើលឃើញថា បំបាត់ភាពមន្ទិលសង្ស័យ ដូចជាការធ្វើទំនើបកម្មមូលដ្ឋានកងទ័ពជើងទឹករាម ដែលត្រូវបានផ្តល់ជំនួយដោយចិន និងកសាងដោយអ្នកជំនាញរបស់ចិន។ លោកបន្ថែមថា លោកប្រធានាធិបតី ដូណាល់ ត្រាំ (Donald Trump) កំពុងតែពង្រឹងសម្ព័ន្ធមិត្តរបស់លោកនៅតំបន់អាស៊ី។
លោកថ្លែងថា៖ «ហើយនៅកម្ពុជា ទោះបីមិនទាន់ទៅជាសម្ព័ន្ធមិត្តជិតស្និទ្ធ ប៉ុន្តែកម្ពុជាត្រូវបានសហរដ្ឋអាមេរិកមើលឃើញថា មានសម្ព័ន្ធមិត្តជិតស្និទ្ធជាមួយចិន។ អ៊ីចឹងបើសិនជាសហរដ្ឋអាមេរិកលូកមកកម្ពុជាច្រើន អ៊ីចឹងអាភាពលម្អៀង ឬទំនោរទៅចិនក៏អាចកាត់បន្ថយដែរ»។
លោក ឯម សុវណ្ណារ៉ា បន្ថែមថា បើសិនជានាយករដ្ឋមន្រ្តីកម្ពុជាលោក ហ៊ុន ម៉ាណែត ដែលបានសិក្សានៅសាលាយោធា West Point សហរដ្ឋអាមេរិកអាចធ្វើឲ្យកម្ពុជានិងអាមេរិកមានសមយុទ្ធរួមគ្នាឈ្មោះថា «ឆ្មាំអង្គរ» ឡើងវិញ នោះលោកមើលឃើញថាជាសញ្ញាណល្អសម្រាប់ទំនាក់ទំនងទ្វេភាគី។
ទំនាក់ទំនងរវាងកម្ពុជា និងអាមេរិកហាក់មានភាពរកាំរកូសជាបន្តបន្ទាប់។ កាលពីឆ្នាំមុន សហរដ្ឋអាមេរិកបានដាក់ទណ្ឌកម្មលើលោក លី យ៉ុងផាត់ សមាជិកព្រឹទ្ធសភារបស់គណបក្សប្រជាជនកម្ពុជា ពាក់ព័ន្ធនឹងការជួញដូរមនុស្ស ការបង្ខំឲ្យធ្វើពលកម្មដោយខុសច្បាប់និងការបោកប្រាស់តាមអនឡាញ។ ក្រសួងការបរទេសកម្ពុជាចាត់ទុកថា ការដាក់ទណ្ឌកម្មលើលោក លី យ៉ុងផាត់ ដែលជាទីប្រឹក្សារបស់លោកនាយករដ្ឋមន្រ្តី ហ៊ុន ម៉ាណែត «មានចេតនានយោបាយ និងផ្ទុយទាំងស្រុងពីស្មារតីនៃការពង្រឹងទំនាក់ទំនងទ្វេភាគី និងការជឿទុកចិត្តគ្នាទៅវិញទៅមក»រវាងប្រទេសទាំងពីរ។
ជាមួយគ្នានោះ ប្រទេសកម្ពុជាត្រូវបានគេមើលឃើញថា កាន់តែស្និទ្ធនឹងប្រទេសចិន ដែលបង្កក្តីបារម្ភដល់សហរដ្ឋអាមេរិក៕
វេទិកាបញ្ចេញមតិ