មន្រ្តីជាន់ខ្ពស់កម្ពុជានិងអាមេរិកបានពិភាក្សាគ្នាក្នុងការចាប់ផ្តើមធ្វើសមយុទ្ធរួមគ្នាដែលមានឈ្មោះថា «ឆ្មាំអង្គរ» ដែលផ្អាកតាំងពីឆ្នាំ ២០១៧ មក។
ការអះអាងនេះនៅក្នុងជំនួបរវាងនាយឧត្តមសេនីយ៍ ម៉ៅ សុផាន់ មេបញ្ជាការកងទ័ពជើងគោកកម្ពុជាជាមួយលោក រ៉ូណាល់ ខ្លាក (Ronald P. Clark) មេបញ្ជាការកងទ័ពជើងគោកសហរដ្ឋអាមេរិកប្រចាំប៉ាស៊ីហ្វិក ដែលបានមកបំពេញទស្សនកិច្ចនៅកម្ពុជា។
នៅក្នុងសេចក្តីប្រកាសព័ត៌មានមួយ លោក ម៉ៅ សុផាន់ បានគូសបញ្ជាក់អំពីសារៈសំខាន់នៃជំនួបសន្ទនានៅក្នុងវិស័យការពារជាតិ«ដើម្បីកសាងទំនុកចិត្ត និងការជឿជាក់គ្នាទៅវិញទៅមក»។ លោកបានប្ដេជ្ញាធ្វើការយ៉ាងជិតស្និទ្ធជាមួយអាមេរិកដើម្បីជំរុញមិត្តភាព ភាពជាដៃគូប្រកបដោយភាពស្ថាបនា តម្លាភាព និងផលប្រយោជន៍ទៅវិញទៅមក។ ភាគីទាំងពីរក៏បានពិភាក្សាអំពីការរៀបចំឡើងវិញសមយុទ្ធឆ្មាំអង្គរ។
គេមិនទាន់ដឹងនៅឡើយទេថា តើសមយុទ្ធនោះនឹងអាចចាប់ផ្តើមឡើងវិញនៅពេលណាឡើយ។
ចំណែកស្ថានទូតអាមេរិកប្រចាំនៅកម្ពុជាបានលើកឡើងថា មន្រ្តីអាមេរិកនិងកម្ពុជាបានពិភាក្សាស្វែងរកវិធីផ្សេងៗ ក្នុងការពង្រឹងទំនាក់ទំនងការពារទ្វេភាគីរវាងសហរដ្ឋអាមេរិក និងកម្ពុជា ដើម្បីលើកកម្ពស់សន្តិភាពនិងសន្តិសុខនៅតំបន់ឥណ្ឌូ-ប៉ាស៊ីហ្វិក។ កិច្ចពិភាក្សាក៏បានលើកឡើងពីការផ្លាស់ប្តូរការបណ្តុះបណ្តាលយោធាដែលផ្តោតលើការសង្គ្រោះគ្រោះមហន្តរាយ ការរក្សាសន្តិភាពរបស់អង្គការសហប្រជាជាតិ និងកិច្ចខិតខំប្រឹងប្រែងធ្វើឱ្យកម្ពុជាគ្មានគ្រាប់មីន។
ចំណែកលោកនាយករដ្ឋមន្រ្តី ហ៊ុន ម៉ាណែត បានបង្ហោះសារនៅលើហ្វេសប៊ុករបស់លោកថា ការផ្លាស់ប្ដូរដំណើរទស្សនកិច្ចជាញឹកញាប់រវាងកងទ័ពនិងកងទ័ពក៏ដូចជាការបន្ដកិច្ចសហប្រតិបត្តិការឡើងវិញលើសកម្មភាពមួយចំនួន «បានឆ្លុះបញ្ចាំងពីភាពរីកចម្រើននៃទំនាក់ទំនងប្រទេសទាំងពីរ»។
លោក ហ៊ុន ម៉ាណែត បានលើកទឹកចិត្តឱ្យកងទ័ពជើងគោកសហអាមេរិក និងបញ្ជាការដ្ឋានកងទ័ពជើងគោក កងយោធពលខេមរភូមិន្ទ បន្តទំនាក់ទំនងឱ្យកាន់តែជិតស្និទ្ធថែមទៀត ដើម្បីពង្រឹងនិងពង្រីកកិច្ចសហប្រតិបត្តិការរវាងកងទ័ពនៃប្រទេសទាំងពីរឱ្យកាន់តែល្អប្រសើរ។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណារ៉ា មើលឃើញថា ជំនួបរវាងមន្រ្តីកម្ពុជានិងមន្ត្រីអាមេរិកនឹងអាចបំបាត់ភាពមន្ទិលសង្ស័យ ដូចជាការធ្វើទំនើបកម្មមូលដ្ឋានកងទ័ពជើងទឹករាម ដែលអាមេរិកសង្ស័យថា ចិននឹងប្រើប្រាស់ដើម្បីពង្រីកអំណាចរបស់ខ្លួន។ លោកបន្ថែមថា បើសិនជានាយករដ្ឋមន្រ្តីកម្ពុជាលោក ហ៊ុន ម៉ាណែត ដែលបានសិក្សានៅសាលាយោធា West Point សហរដ្ឋអាមេរិក អាចធ្វើឱ្យកម្ពុជានិងអាមេរិកមានសមយុទ្ធរួមគ្នាឈ្មោះថា «ឆ្មាំអង្គរ» ឡើងវិញ នោះលោកមើលឃើញថា វាជាសញ្ញាណល្អសម្រាប់ទំនាក់ទំនងទ្វេភាគី៕
វេទិកាបញ្ចេញមតិ