លោកប្រធានាធិបតី សហរដ្ឋអាមេរិក ដូណាល់ ត្រាំ បានបង្ហោះសារជាសាធារណៈតាមប្រព័ន្ធទ្វីតទ័រ (Twitter) ប៉ុន្មាននាទីមុននេះ ដោយកោតសរសើរនិងអរគុណដល់ប្រទេសកម្ពុជាដែលបានទទួលអនុញ្ញាតឲ្យនាវា Westerdam ដែលគេភ័យខ្លាចឆ្លងមេរោគកូរ៉ូណា ហើយផ្ទុកអ្នកធ្វើដំណើរចម្រុះជាតិសាសន៍ជាង២០០០នាក់នោះ ចូលចតនៅខេត្តព្រះសីហនុ។
សាររបស់លោក ត្រាំ បានបញ្ជាក់ថា៖ «សូមអរគុណដល់ប្រទេសកម្ពុជាដ៏ស្រស់ស្អាត ដែលទទួលអនុញ្ញាតឲ្យនាវា Westerdam ចូលចតនៅកំពង់ផែរបស់កម្ពុជា។ សហរដ្ឋអាមេរិកនឹងចងចាំពីកាយវិការមនុស្សធម៌នេះ»។
លោក ត្រាំ បានបង្ហោះសារនេះ ក្រោយពេលដែលលោក នាយករដ្ឋមន្ត្រី ហ៊ុន សែន នៃប្រទេសកម្ពុជា បានអនុញ្ញាតនាវាដែលមានប្រទេសជាច្រើនភ័យខ្លាចឆ្លងមេរោគកូរ៉ូណា មិនឲ្យចូលចត តែកម្ពុជាបានអនុញ្ញាតឲ្យចូលចត កាលពីថ្ងៃសុក្រ ទី១៤ កុម្ភៈ ចំថ្ងៃបុណ្យទិវានៃសេចក្តីស្រឡាញ់។
លោកនាយករដ្ឋមន្ត្រី ហ៊ុន សែន បានបញ្ជាក់ថា ការទទួលនាវានេះគឺជាកាយវិការមនុស្សធម៌មួយរបស់កម្ពុជា។ លោកបានផ្តល់ផ្កាដល់អ្នកដំណើរ នៅពេលលោកស្វាគមន៍អ្នកដំណើរដែលចុះពីលើនាវា នៅខេត្តព្រះសីហនុផងដែរ។
នាវាកម្សាន្ត Westerdam ដឹកមនុស្សជាង ២០០០នាក់ ហើយដែលរដ្ឋាភិបាលចំនួនបួនបដិសេធមិនឲ្យចូលចតដោយសារបារម្ភថាអាចមានមេរោគកូរ៉ូណា។
អ្នកធ្វើដំណើរជាលក្ខណៈទេសចរណ៍នៅលើកប៉ាល់នោះ មានចំនួន១៤៥៥នាក់ និងក្រុមការងារកប៉ាល់ចំនួន ៨០២នាក់ ដែលមាន៤១ជាតិសាសន៍ ក្នុងនោះមានជនជាតិអាមេរិកផងដែរ។
ក្រសួងសុខាភិបាលកម្ពុជាបានលើកឡើងថា មានមនុស្ស២០នាក់នៅលើកប៉ាល់ Westerdam ដែលត្រូវបានរាយការណ៍ថា មានបញ្ហាសុខភាពដូចជា ផ្តាសាយ រាគរូស និងមានបញ្ហាក្រពះ និងពោះវៀនជាដើម។ បន្ទាប់ពីមន្ត្រីសុខាភិបាលបានយកវត្ថុសំណាកទៅពិនិត្យនៅឯវិទ្យាស្ថានប៉ាស្ទ័រ ក្រសួងសុខាភិបាល បានបញ្ជាក់កាលពីយប់ថ្ងៃព្រហស្បតិ៍ថា អ្នកដំណើរទាំងនេះមិនមានផ្ទុកវីរុសកូរ៉ូណានោះទេ៕
