អ្នកធ្វើដំណើរជាង ១០០នាក់ក្នុងចំណោមអ្នកធ្វើដំណើរចម្រុះជាតិសាសន៍ជាង ១០០០នាក់នៅលើនាវា Westerdam ត្រូវបានអនុញ្ញាតឲ្យឡើងគោកនៅវេលាម៉ោងជាង៧ព្រឹកថ្ងៃនេះ បន្ទាប់ពីរង់ចាំពេញមួយថ្ងៃម្សិលមិញ។
ថ្ងៃនេះរដ្ឋាភិបាលកម្ពុជាមានគម្រោងឲ្យអ្នកដំណើរ ៤០០នាក់ចាកចេញពីនាវា។ អ្នកដំណើរខ្លះនឹងទៅភ្នំពេញ ហើយអ្នកខ្លះបន្តដំណើរទៅប្រទេសខ្លួន និងអ្នកខ្លះទៀត នឹងស្នាក់នៅរាជធានីភ្នំពេញ មុនពេលធ្វើដំណើរបន្តទៀត។
នាវារបស់ក្រុមហ៊ុន Holland America Line នេះ ត្រូវបានរដ្ឋាភិបាលជប៉ុន កោះតៃវ៉ាន់ ហ្វីលីពីន និងថៃ បដិសេធមិនឲ្យចូលចត ដោយសារខ្លាចមានអ្នកផ្ទុកមេរោគកូរ៉ូណា COVID-19 នៅលើនាវា។
អ្នកដំណើរម្នាក់ជនជាតិអូស្រ្តាលី អ្នកស្រី Ann-Maree Melling អាយុ៦៦ឆ្នាំ ដែលធ្វើដំណើរជាមួយស្វាមីរបស់អ្នកស្រីបានប្រាប់ VOA ថា នេះជាលើកដំបូងដែលអ្នកស្រីបានមកប្រទេសកម្ពុជា។
អ្នកស្រីមានប្រសាសន៍ថា៖ «ខ្ញុំគិតថា មនុស្សនៅខាងក្រៅបារម្ភខ្លាំងជាងពួកយើង ពីព្រោះយើងត្រូវបានមើលថែយ៉ាងល្អ និងមានមានការត្រួតពិនិត្យសុខភាព»។
អ្នកស្រីថា អ្នកស្រីយល់ពីមូលហេតុនៃការបដិសេធមិនឲ្យនាវាចូលចតប្រទេសផ្សេងៗ។អ្នកស្រីបាននិយាយថា៖ «យើងមានការមិនសប្បាយចិត្តបន្តិចបន្តួច ប៉ុន្តែយើងយល់ច្បាស់ណាស់។ វាសំខាន់បំផុតគឺមានការប្រុងប្រយ័ត្ន»។
ប៉ុន្តែអ្នកស្រីបញ្ជាក់ថា អ្នកស្រីត្រូវបានពិនិត្យសុខភាពរួចហើយ និងមានក្រដាសបញ្ជាក់ថា មិនមានបញ្ហានោះទេ ដូច្នេះអ្នកស្រីអាចធ្វើដំណើរទៅទីណាក៏បាន។ អ្នកស្រីនឹងធ្វើដំណើរចេញពីខេត្តព្រះសីហនុតាមយន្តហោះទៅភ្នំពេញ ហើយស្នាក់នៅមួយយប់ថ្ងៃសុក្រនេះ មុននឹងចេញទៅប្រទេសអូស្រ្តាលីនៅថ្ងៃសៅរ៍តាមការហោះហើរទៅប្រទេសសិង្ហបុរី។
អ្នកស្រី Ann-Maree Melling បាននិយាយថា៖ «នាវានេះគឺអស្ចារ្យ យើងមានសំណាងណាស់នៅលើនាវា Westerdam»។
អ្នកស្រីបន្ថែមថា បើតាមគម្រោង នាវាមួយនេះមានបំណងធ្វើដំណើរទៅវៀតណាម ជប៉ុន កូរ៉េ ហ្វីលីពីន និងហុងកុង។
អ្នកស្រី Ann-Maree Melling និងស្វាមីត្រូវបានផ្តល់ផ្កាកូលាបម្នាក់មួយទង ដោយលោកនាយករដ្ឋមន្រ្តី ហ៊ុន សែន ដែលបានជិះឧទ្ធម្ភាគចក្រចុះលើផែក្បែរនាវា ហើយមានការមើលពីអ្នកធ្វើដំណើរតាមនាវាពីជាន់ទីមួយ។
ភាគច្រើននៃអ្នកនៅលើនាវាដែលឈរនៅជាន់ទីមួយដើម្បីមើលការចាកចេញរបស់អ្នកដំណើរមួយចំនួន គឺជាមនុស្សក្នុងវ័យចំណាស់។ អ្នកខ្លះមានកាន់ក្រមាខ្មែរ និងអ្នកខ្លះបង់កក្រមា។ អ្នកដែលឈរទាំងនោះ ភាគច្រើនជាអ្នកដំណើរមកពីបស្ចិមប្រទេសបានបន្ទរសំឡេងអបអរសាទរ នៅពេលលោកនាយករដ្ឋមន្រ្តីហ៊ុន សែន មកដល់ និងថ្លែងទៅកាន់ពួកគេ។
អ្នកធ្វើដំណើរម្នាក់ទៀត អ្នកស្រី វ៉ាន់ ប៉ីថិន អាយុ៦៤ឆ្នាំ ដែលជាខ្មែរកាណាដា ដែលមកដើរកម្សាន្តតាមនាវាជាមួយស្វាមី ប្អូនថ្លៃ បងប្អូនស្រីបង្កើត២នាក់ មានប្រសាសន៍ថា ស្ថានភាពក្នុងនាវាធម្មតានោះទេ តែអ្នកស្រីថា មានការបំប៉ោងព័ត៌មានឲ្យស្ថានភាពមើលពីខាងក្រៅថាធ្ងន់ធ្ងរ។
អ្នកស្រីបានថ្លែងប្រាប់ VOA ថា៖ «ធម្មតា អត់មានអ្នកណាគេ ពាក់ម៉ាស។ មិនដឹងថា ព័ត៌មានខាងក្រៅបំប៉ោងយ៉ាងម៉េច ខ្ញុំអត់ដឹងដែរ។ ក្នុងអាហ្នឹងអាស៊ីយើងរាប់ទាំងអស់ អត់បាន១០០នាក់ផង។ ហើយវាថា មានជនជាតិអាស៊ីមកពីចិនជិះក្នុងទឹកហ្នឹង១ពាន់នាក់»។
អ្នកស្រីបន្តថា ក្នុងនាវានោះ មានចិនហុងកុង៣នាក់ និងជនជាតិចិន មកពីប្រទេសផ្សេងៗ។ អ្នកស្រីបញ្ជាក់ថា៖ «អត់មានចិនមកពីចិនទេ»។
អាជ្ញាធរបានឲ្យដឹងថា តាមគម្រោង នៅថ្ងៃសុក្រនេះ អ្នកដំណើរជាង ៤០០នាក់នឹងត្រូវអនុញ្ញាតឲ្យចេញពីនាវា ហើយពួកគេត្រូវបញ្ជូនទៅអាកាសយានដ្ឋានអន្តរជាតិខេត្តព្រះសីហនុ តាមរថយន្តក្រុងដែលមានដាក់សញ្ញា «Welcome to Cambodia» ហើយធ្វើដំណើរទៅភ្នំពេញតាមជើងយន្តហោះ និងត្រៀមចេញទៅប្រទេសរៀងៗខ្លួន។
នៅព្រឹកថ្ងៃសុក្រនេះ លោកនាយករដ្ឋមន្រ្តី ហ៊ុន សែន បានថ្លែងថា អ្នកទាំងនោះអាចស្នាក់នៅនិងដើរលេងនៅកម្ពុជាបាន ហើយលោកអំពាវនាវកុំឲ្យមានការរើសអើងពួកគេ។ លោកបន្តថា ការចុះគោកពីនាវាអាចមានរយៈពេលពី៥ទៅ៧ថ្ងៃ។ លោកបន្តថា ការទទួលនាវានេះគឺជា កាយវិការមនុស្សធម៌មួយរបស់កម្ពុជា។
បើតាមសារបង្ហោះនៅលើទំព័រហ្វេសប៊ុករបស់ក្រុមហ៊ុន Holland America Line ដែលគ្រប់គ្រងនាវាកម្សាន្តនេះ ការដាក់អ្នកដំណើរចុះអាចចំណាយពេលពីរបីថ្ងៃ អាស្រ័យតាមជើងយន្តហោះដែលអ្នកដំណើរទាំងអាចជិះត្រឡប់ទៅប្រទេសរបស់ពួកគេវិញ។
នាវាកម្សាន្ត Westerdam ដែលដឹកមនុស្សជាង ២០០០នាក់ ហើយដែលរដ្ឋាភិបាលចំនួនបួនបដិសេធមិនឲ្យចូលចតដោយសារបារម្ភថា អាចមានមេរោគកូរ៉ូណា បានបោះយុថ្កាលើផ្ទៃសមុទ្រនៅក្នុងប្រទេសកម្ពុជាកាលពីព្រឹកថ្ងៃព្រហស្បតិ៍ ក្រោយទទួលបានការអនុញ្ញាតពីរដ្ឋាភិបាលកម្ពុជា។
នាវានេះមានគម្រោងសំចតឲ្យភ្ញៀវទេសចរណ៍ដើរកម្សាន្តនៅកោះតៃវ៉ាន់ និងជប៉ុនត្រូវរសាត់អណ្ដែត បន្ទាប់ពីនាវានេះចេញដំណើរពីហុងកុងនៅថ្ងៃទី១ ខែកុម្ភៈ។
អ្នកធ្វើដំណើរជាលក្ខណៈទេសចរណ៍នៅលើកប៉ាល់នោះមានចំនួន១៤៥៥នាក់ និងក្រុមការងារកប៉ាល់ចំនួន ៨០២នាក់។ អ្នកធ្វើដំណើរមានចម្រុះ៤១ជាតិសាសន៍។
ក្រសួងសុខាភិបាលកម្ពុជាបានលើកឡើងថា មានមនុស្ស២០នាក់នៅលើកប៉ាល់ Westerdam ដែលត្រូវបានរាយការណ៍ថា មានបញ្ហាសុខភាពដូចជា ផ្តាសាយ រាគរូស និងមានបញ្ហាក្រពះ និងពោះវៀនជាដើម ត្រូវបានមន្ត្រីសុខាភិបាលយកវត្ថុសំណាកទៅពិនិត្យនៅឯវិទ្យាស្ថានប៉ាស្ទ័រ។ ក្រសួងបានបញ្ជាក់កាលពីយប់ថ្ងៃព្រហស្បតិ៍ថា ពួកគេមិនមានផ្ទុកវីរុសកូរ៉ូណានោះទេ៕
