ប្រធានាធិបតីជាប់ឆ្នោត ដូណាល់ ត្រាំ បានជួយជាមួយបេក្ខជនម្នាក់ទៀតដែលអាចជារដ្ឋមន្រ្តីការបរទេសសហរដ្ឋអាមេរិកនៅថ្ងៃចន្ទនេះ ហើយក៏ជាបេក្ខជនម្នាក់ដែលទំនងធ្វើឲ្យមានការចោទសួរខ្លាំងៗពីព្រឹទ្ធសភាសហរដ្ឋអាមេរិកគឺលោក David Petraeus អតីតនាយក CIA ហើយនឹងជាឧត្តមសេនីយ៍ចូលនិវត្ត។
មុនពេលដឹកនាំទីភ្នាក់ងារ CIA លោក Petraeus ជាមេបញ្ជាការកំពូលរបស់សហរដ្ឋអាមេរិកនៅក្នុងប្រទេសអ៊ីរ៉ាក់ហើយបានដឹកនាំកងកម្លាំងរបស់អង្គការអូតង់នៅក្នុងប្រទេសអាហ្វហ្គានីស្ថាន។
ក៏ប៉ុន្តែ លោកបានត្រូវគេបង្ខំឲ្យលាចេញពីដំណែងពីនាយក CIA នៅក្នុងរឿងបាក់មុខមាត់នៅឆ្នាំ២០១២បន្ទាប់ពីការលេចធ្លាយព័ត៌មានសម្ងាត់ទៅអ្នកសរសេរប្រវត្តិរូបរបស់លោកដែលលោកមានស្នេហារលួចលាក់ជាមួយ។
ថ្វីបើប្រវត្តិពីអតីតកាលរបស់លោក Petraeusក៏ដោយ លោកត្រាំបានបញ្ជូនសារតាម Tweeter ថា លោកបានចាប់អារម្មណ៍លោកឧត្តមសេនីយ៍ចូលនិវត្តន៍។
ពួកមន្រ្តីខាងគណបក្សសាធារណរដ្ឋនិយាយថា លោកត្រាំក៏បានសម្រេចតែងតាំងសមាជិកគណៈរដ្ឋមន្រ្តីម្នាក់ទៀតគឺ រដ្ឋមន្រ្តីកិច្ចការសុខាភិបាលនិងមនុស្ស។លោកបានជ្រើសរើសលោក Tom Price តំណាងរាស្រ្តរដ្ឋ Georgia ដែលជាអ្នករិះគន់ដ៏សំខាន់ម្នាក់ដល់ច្បាប់ថែទាំសុភាពរបស់លោកប្រធានាធិបតីអូបាម៉ាដែលគេស្គាល់ជាទូទៅថា Obamacare។
លោកត្រាំបានសន្យាលប់ចោលច្បាប់ថែទាំសុខភាព Obamacare ទោះជាយ៉ាងណា ក៏ដោយ លោកបាននិយាយថា មានផ្នែកខ្លះនៃកម្មវិធីនោះដែលលោកជឿជាក់ថាត្រូវតែរក្សាទុក។
លទ្ធភាពនៃការតែងតាំងលោក Romney ជារដ្ឋមន្រ្តីការបរទេសកំពុងបណ្តាលឲ្យមានរឿងចម្រូងចម្រាសខ្លះនៅក្នុងក្រុមអន្តរកាលនិងក្នុងចំណោមពួកអ្នកគាំទ្រលោកត្រាំ។
លោក Mitt Romney អតីតអភិបាលរដ្ឋហើយនឹងជាបេក្ខជនប្រធានាធិបតីឆ្នាំ២០១២ បានរិះគន់លោកត្រាំក្នុងអំឡុងពេលនៃយុទ្ធនាការឃោសនាបោះឆ្នោតថាលួចបន្លំហើយបានបដិសេធពុំផ្តល់ការគាំទ្រលោកជាសាធារណៈ៕
