ទីភ្នាក់ងារព័ត៌មាន AP បានរាយការណ៍ថានៅពេលលោក Elon Musk កំពុងប្រឈមនឹងប្រតិកម្មខ្លាំងខាងនយោបាយនិងហិរញ្ញវត្ថុ លោកប្រធានាធិបតី Donald Trump បាននិយាយថាលោកនឹងទិញរថយន្ត Tesla មួយគ្រឿងមកពីក្រុមហ៊ុនរបស់លោក Musk ជាការបង្ហាញនូវការគាំទ្រមិនប្រក្រតីមួយមកពីលោកប្រធានាធិបតីដល់ទីប្រឹក្សាដ៏មានអំណាចបំផុតរបស់លោក។
ការណ៍នេះជាឧទាហរណ៍ថ្មីៗបំផុតថាតើលោក Trump បានបង្ហាញនូវភាពស្មោះត្រង់យ៉ាងដូចម្តេចដល់លោក Musk ដែលបានចំណាយប្រាក់យ៉ាងច្រើនលើយុទ្ធនាការនៃការត្រឡប់មកកាន់អំណាចរបស់លោកកាលពីឆ្នាំទៅហើយបានក្លាយជាឥស្សរជនសំខាន់មួយនៅក្នុងរដ្ឋបាលអាណត្តិទី២របស់លោក។
ប្រធានាធិបតីខាងគណបក្សសាធារណរដ្ឋរូបនេះបានប្រកាសកាលពីព្រឹកថ្ងៃអង្គារថាលោកនឹងទិញរថយន្ត Tesla ថ្មីមួយគ្រឿងជា«ការបង្ហាញនូវទំនុកចិត្តនិងការគាំទ្រដល់លោក Musk ដែលជាជនជាតិអាមេរិកាំងដ៏អស្ចារ្ស៍ពិតប្រាកដម្នាក់»។
ក្រុមហ៊ុនរថយន្តអគ្គិសនីរបស់លោក Musk ត្រូវបានជួបប្រទះការខាតបង់ដោយការលក់ធ្លាក់ចុះនិងតម្លៃភាគហ៊ុនធ្លាក់ចុះយ៉ាងខ្លាំង។ លោក Musk បន្តដឹកនាំក្រុមហ៊ុនរថយន្តនេះនិងបណ្តាញសង្គម X និងក្រុមហ៊ុនផលិតកាំជ្រួច SpaceX ខណៈដែលបម្រើការជាទីប្រឹក្សារបស់លោកប្រធានាធិបតី Trump លើការកែទម្រង់និងកាត់បន្ថយរដ្ឋាភិបាលសហព័ន្ធ។
លោកប្រធានាធិបតី Trump បានសរសេរនៅលើបណ្តាញសង្គមថាលោក Elon Musk បានប្រថុយប្រថាននឹងការខាតបង់ដើម្បីជួយប្រទេសជាតិរបស់យើង ហើយលោកកំពុងធ្វើការងារដ៏អស្ចារ្យ។ ក៏ប៉ុន្តែ ពួកឆ្វេងនិយមជ្រុលដូចដែលពួកគេធ្លាប់បានធ្វើ កំពុងព្យាយាមដោយខុសច្បាប់ហើយបានរួមគ្នាធ្វើពហិកាដល់ក្រុមហ៊ុន Tesla ដែលជាក្រុមហ៊ុនផលិតរថយន្តដ៏ធំបំផុតមួយរបស់ពិភពលោក ហើយពួកគេបានវាយប្រហារនិងធ្វើឱ្យគ្រោះថ្នាក់ដល់លោក Elon និងអ្វីៗដែលលោកមាន។
សេតវិមានមិនបានបរិយាយភ្លាមៗស្តីពីផែនការរបស់លោកប្រធានាធិបតី Trump ដូចជាថាតើការទិញនោះនឹងត្រូវធ្វើដោយរបៀបណាឬរថយន្តនោះនឹងត្រូវរក្សានៅទីណាទេ៕
វេទិកាបញ្ចេញមតិ