នៅថ្ងៃទី២ជាប់ៗគ្នា លោកប្រធានាធិបតីសហរដ្ឋអាមេរិក ដូណាល់ ត្រាំ បានថ្លែងយ៉ាងយូរអំពីសុវត្ថិភាពនៅតាមសាលារៀន ដោយគាំទ្រការផ្តល់អាវុធដល់គ្រូបង្រៀនដើម្បីបញ្ឈប់ការសម្លាប់រង្គាលនៅតាមសាលារៀន។
លោកប្រធានាធិបតីត្រាំបានប្រកាសថា៖ «ប្រសិនបើ យើងមិនសមត្ថភាពទេ ការបាញ់ប្រហារនឹងកើតមានឡើងម្តងហើយម្តងទៀត។ អស់លោក អ្នកមិនអាចជួលឆ្មាំការពារសន្តិសុខគ្រប់គ្រាន់ទេ»។
នៅពេលដែលសួរដោយ VOA ដើម្បីឆ្លើយតបដល់គ្រូបង្រៀនដែលនិយាយថា ពួកគេមិនចង់បានកាំភ្លើងនៅក្នុងថ្នាក់រៀនរបស់ខ្លួននោះ ប្រធានាធិបតីត្រាំបានឆ្លើយថា៖ «គ្រូបង្រៀនទាំងអស់នោះប្រាកដនឹងចង់បាន។ ហើយគ្រូបង្រៀនមិនចង់បានកាំភ្លើងមានចំនួនតិចទេ ក៏ប៉ុន្តែ គ្រូបង្រៀនច្រើនចង់បានកាំភ្លើង ហើយនៅពេលដែលលោក អ្នកធ្វើដូចនេះ អស់លោក អ្នកនឹងមានស្ថានភាពមួយដែលបញ្ហាដ៏គ្រោះថ្នាក់ភ្លាមៗនេះនឹងត្រូវបញ្ឈប់»។
កាលពីពេលព្រឹកនៅក្នុងកិច្ចប្រជុំក្នុងបន្ទប់ Roosevelt ប្រធានាធិបតីត្រាំបានស្នើថា ថ្នាក់រៀនរហូតដល់ទៅ៤០ភាគរយ ប្រហែលឃើញគ្រូបង្រៀនមានលក្ខណៈសម្បត្តិអាចបាញ់កាំភ្លើងបាន ហើយគ្រូបង្រៀនទាំងនេះនឹងទទួលបានរង្វាន់លើកទឹកចិត្តបន្តិចបន្តួចសម្រាប់លិខិតស្នាមកាន់កាប់កាំភ្លើង។
លោកប្រធានាធិបតីត្រាំបាននិយាយក្នុងអំឡុងនៃសម័យប្រជុំរយៈពេល៥៥នាទីជាមួយភ្នាក់ងារពង្រឹងច្បាប់ថា «ខ្ញុំចង់ឲ្យសាលារៀនបានទទួលការការពារដូចជាធនាគារបានទទួលការពារអញ្ចឹងដែរ»។
ជំនួបកាលពីថ្ងៃព្រហស្បត៍បានកើតមានឡើងបន្ទាប់ពីមានជួបតទល់មុខគ្នាប្រកបដោយការរំជួលចិត្តយ៉ាងយូរនៅសេតវិមានដែរ ជាមួយសិស្ស មាតាបិតានិងគ្រូបង្រៀនដែលបានរងផលប៉ះពាល់ដោយការបាញ់ប្រហារនៅឯវិទ្យាល័យកាលពីសប្តាហ៍មុនក្នុងទីក្រុង Parkland រដ្ឋ Florida ដែលអតីតសិស្សម្នាក់បានរងការចោទប្រកាន់ថា បានសម្លាប់មនុស្ស១៧នាក់៕
