ប្រធានាធិបតីសហរដ្ឋអាមេរិកលោក Donald Trump បានផ្តល់សញ្ញានៃលទ្ធភាពដាក់ទណ្ឌកម្មបន្ថែមលើប្រទេសរុស្ស៊ីចំពោះសង្គ្រាមរបស់ខ្លួនក្នុងប្រទេសអ៊ុយក្រែន។
នៅពេលសួរអំពីក្តីសង្ឃឹមខណៈដែលនិយាយទៅកាន់ពួកអ្នកយកព័ត៌មានកាលពីថ្ងៃអង្គារ លោក Trump បានឆ្លើយតបថា«ទំនងនឹងអ៊ីចឹង»។
លោក Trump បាននិយាយថា រដ្ឋបាលរបស់លោកបាននិយាយជាមួយប្រធានាធិបតីអ៊ុយក្រែនលោក Volodymyr Zelenskyy ហើយនឹងនិយាយជាមួយប្រធានាធិបតីរុស្ស៊ីលោក Vladimir Putin «នៅពេលឆាប់ៗខាងមុខនេះ»។
លោកប្រធានាធិបតី Trump បាននិយាយទៀតថា សហភាពអឺរ៉ុបគួរតែ«បង់ប្រាក់ច្រើនជាងអ្វីដែលពួកគេកំពុងបង់ប្រាក់នៅពេលឥឡូវនេះ»ដើម្បីផ្តល់ជំនួយដល់អ៊ុយក្រែន ខណៈដែលនិយាយមិនពិតថាសហរដ្ឋអាមេរិកបានរួមវិភាគទានច្រើនជាងសហភាពអឺរ៉ុប២០០ពាន់លានដុល្លារ»។
ចាប់តាំងពីរុស្ស៊ីបានចាប់ផ្តើមការឈ្លានពានដ៏ពេញទំហឹងរបស់ខ្លួនលើប្រទេសអ៊ុយ ក្រែនកាលពីខែកុម្ភៈ ឆ្នាំ២០២២មក សហរដ្ឋអាមេរិកបានសន្យាផ្តល់ប្រាក់ប្រហែល ១៧៥ពាន់លានដុល្លារជាមួយជំនួយសម្រាប់អ៊ុយក្រែន។ សហភាពអឺរ៉ុបនិយាយថាប្លុកនិងរដ្ឋសមាជិករបស់ខ្លួនបានផ្តល់ប្រាក់ប្រហែល១៤៥ពាន់លានដុល្លារជាជំនួយ។
លោក Trump និយាយទៀតថាអឺរ៉ុប គួរតែបង់ប្រាក់កាន់តែច្រើនឡើងពីព្រោះតែសង្គ្រាមនេះមានផលប៉ះពាល់សហភាពអឺរ៉ុបធំជាងសហរដ្ឋអាមេរិក។
ពួកមន្ត្រីអ៊ុយក្រែនបាននិយាយកាលពីថ្ងៃពុធថាប្រព័ន្ធការពារដែនអាកាសរបស់ខ្លួនបានបាញ់ទម្លាក់ដ្រូនរាប់សិបគ្រឿងក្នុងរយៈពេលមួយយប់ រួមទាំងនៅក្នុងតំបន់ Mykolaiv ជាទីកន្លែងដែលលោកអភិបាល Vitaliy Kim បាននិយាយថាបានធ្លាក់កម្ទេចកម្ទីបាក់បែកដែលបានធ្វើឱ្យខូចខាតអាគារ Apartment មួយខ្នងនិងធ្វើឱ្យមនុស្ស២នាក់រងរបួស៕
វេទិកាបញ្ចេញមតិ