រដ្ឋមន្ត្រីការបរទេសថ្មីសហរដ្ឋអាមេរិកលោក Marco Rubio បាននិយាយកាលពីថ្ងៃពុធថាផលប្រយោជន៍ជាតិដ៏សំខាន់ នឹងក្លាយជាបេះដូងនៃវិស័យការទូតអាមេរិកនៅពេលដែលលោកប្រធានាធិបតី Donald Trump បានចូលកាន់តំណែងអាណត្តិទី២ ដែលមានរយៈពេល៤ឆ្នាំនៅសេតវិមាន។
លោក Rubio ដែលជាគណៈរដ្ឋមន្ត្រីដំបូងរបស់លោក Trump ដែលបានទទួលការអនុម័តពីព្រឹទ្ធសភានិងចូលកាន់តំណែងបាននិយាយក្នុងសេចក្តីថ្លែងការណ៍បេសកកម្មថា ការចំណាយនិងការខិតខំទាំងអស់របស់សហរដ្ឋអាមេរិកលើកិច្ចការបរទេស«ត្រូវតែមានហេតុផលជាមួយនឹងចម្លើយដល់សំណួរសាមញ្ញបីគឺ៖ តើវានឹងធ្វើឱ្យប្រទេសអាមេរិកកាន់តែមានសុវត្ថិភាពដែរឬទេ?។ តើវានឹងធ្វើឱ្យប្រទេសអាមេរិកកាន់តែខ្លាំងឡើងដែរឬទេ?។ តើវានឹងធ្វើឱ្យប្រទេសអាមេរិកកាន់តែមានវិបុលភាពឡើងឬទេ?។
លោកបាននិយាយទៀតថា«ដើម្បីធ្វើឱ្យជឿនលឿនដល់ផលប្រយោជន៍ជាតិរបស់យើង យើងនឹងស្ថាបនាការបញ្ចូលរបៀបថ្មីកាន់តែច្រើនឡើង រហ័សរហួននិងផ្តោតលើក្រសួងការបរទេស។ ការណ៍នេះនឹងតម្រូវឱ្យមានការជំនួសបញ្ហាអាទិភាពខ្លះ កាត់បន្ថយបញ្ហាខ្លះ ហើយនឹងលប់ចោលការអនុវត្តខ្លះ»។
លោក Rubio អាយុ៥៣ឆ្នាំបានគាំទ្រការសន្យាកាលពីមុនរបស់លោក Trumpដើម្បីបញ្ចប់ជនចំណាកស្រុកដែលគ្មានក្រដាសស្នាមដ៏ច្រើនកុំឱ្យចូលសហរដ្ឋអាមេរិក។
លោក Rubio បាននិយាយទៀតថា«ក្រសួងការបរទេសនឹងលែងអនុវត្តសកម្មភាពណាដែលសម្របសម្រួលឬលើកទឹកចិត្តឱ្យមានការផ្លាស់ទីលំនៅដ៏ច្រើន។ ទំនាក់ទំនងការទូតរបស់យើងជាមួយប្រទេសផ្សេងទៀត ជាពិសេសនៅក្នុងតំបន់អឌ្ឍគោលខាងលិច នឹងផ្តល់អាទិភាពលើការការពារព្រំដែនប្រទេសអាមេរិក បញ្ឈប់ជនចំណាកស្រុកខុសច្បាប់និងដែលធ្វើឱ្យមានអស្ថិរភាព និងចរចាការការបញ្ជូនជនអន្តោប្រវេសន៍ខុសច្បាប់ទៅកាន់ប្រទេសរបស់ពួកគេវិញ។
លោក Rubio បាននិយាយបន្តទៀតថា ក្រសួងការបរទេសនឹងបញ្ចប់ការខំប្រឹងប្រែងណាមួយដើម្បីលើកកម្ពស់ភាពចម្រុះ សមភាពនិងបរិយាប័ន្ន ស្របជាមួយនឹងបទបញ្ជារបស់លោក Trump ដែលបានចេញនៅថ្ងៃទី១នៃអាណត្តិថ្មីរបស់លោក៕
វេទិកាបញ្ចេញមតិ