លោក Roger Stone ដែលជាសម្ព័ន្ធមិត្តដ៏យូរមកហើយរបស់ប្រធានាធិបតីអាមេរិកលោក Donald Trump កាលពីថ្ងៃអង្គារត្រូវបានចោទប្រកាន់៧ករណីនៅក្នុងតុលាការសហព័ន្ធក្នុងរដ្ឋធានីវ៉ាស៊ីនតោនពាក់ព័ន្ធទៅនឹងការបែកធ្លាយសារអេឡិចត្រូនិករបស់អតីតរដ្ឋមន្រ្តីការបរទេសអាមេរិកលោកស្រី Hillary Clinton ដែលជាគូប្រជែងរបស់លោក Trump កាលពីពេលបោះឆ្នោតប្រធានាធិបតីឆ្នាំ២០១៦។
លោក Stoneដែលមានអាយុ៦៦ឆ្នាំ ត្រូវបានចាប់ខ្លួនកាលពីសប្តាហ៍មុននៅឯគេហដ្ឋានរបស់លោកក្នុងរដ្ឋFloridaនៅអំឡុងពេលការវាយឆ្មក់របស់កងកម្លាំងFBI កាលពីពេលព្រលឹមស្រាងៗនោះ មិនបានសារភាពទទួលកំហុសលើការចោទប្រកាន់៥ករណីថា បានកុហកសភាអំពីតួនាទីរបស់លោកនៅក្នុងករណីបែកធ្លាយសារអេឡិចត្រូនិកឬE-mailsនៅលើគេហទំព័រ WikiLeaks និងមួយករណីទៀតគឺក្រោមបទចោទថាបានរំខានសាក្សី និងរាំងស្ទះដល់ការស៊ើបអង្កេតរបស់សភានៅក្នុងករណីឃុបឃិតរវាងយុទ្ធនាការបោះឆ្នោតរបស់លោកTrumpជាមួយនឹងប្រទេសរុស្ស៊ី។
ខុសពីជនជាប់ចោទផ្សេងទៀតក្នុងករណីបទព្រហ្មទណ្ឌនៅអាមេរិកលោក Stone បានបង្ហាញខ្លួននៅតាមសារព័ត៌មាននានា ដើម្បីអះអាងពីភាពស្អាតស្អំរបស់លោក និងនិយាយបង្អាប់ស្មាក្តីពិសេសលោក Robert Mueller ជាអ្នកដែលបានចោទប្រកាន់ប្រឆាំងនឹងលោក។
ការចោទប្រកាន់ប្រឆាំងនឹងលោកStone មិនបានចោទប្រកាន់ថាលោកបានជួយសម្របសម្រួលជាមួយប្រទេសរុស្ស៊ីឬជាមួយគេហទំព័រWikiLeaksអំពីការបែកធ្លាយសារអេឡិចត្រូឡិច ដែលអាជ្ញាធរអាមេរិកនិយាយថាត្រូវបានលួចយកពីគណបក្សប្រជាធិបតេយ្យដោយភា្នក់ងាររបស់រុស្ស៊ីនោះទេ។ លោក Stone បានប្រាប់សារព័ត៌មានABC កាលពីថ្ងៃអាទិត្យថា អ្វីដែលលោកបានធ្វើគឺទទួលបានព័ត៌មានដែលមានចុះផ្សាយតាមសាធារណៈតែប៉ុណ្ណោះ៕
