រយៈពេលបីថ្ងៃដំបូងនៃការឃោសនារកសំឡេងគាំទ្រសម្រាប់ការបោះឆ្នោតក្រុមប្រឹក្សាឃុំ-សង្កាត់ បាននាំឱ្យមានសុទិដ្ឋិនិយមចំពោះបរិយាកាសនយោបាយដោយសារតែអ្នកនយោបាយ បង្ហាញនូវភាពចាស់ទុំ ហើយអ្នកគាំទ្រហាក់មានការសណ្តោសគ្នាច្រើន។ នេះបើតាមការសង្កេតរបស់អ្នកឯកទេស។
លោកឱក សេរីសោភក្តិ៍អ្នកឯកទេសខាងផ្នែកអភិបាលកិច្ចល្អ បានបញ្ជាក់ក្នុងកម្មវិធីហេឡូ VOA នាថ្ងៃច័ន្ទថា គណបក្សសង្គ្រោះជាតិមានភាពទន់ភ្លន់ដោយយល់ពីព្រំដែនក្នុងការនិយាយស្តី ហើយជៀសវាងការឌឺដង និងពឹងផ្អែកលើការបោះឆ្នោតដោយត្រឹមត្រូវជាម៉ែត្រវាស់ស្ទង់កម្លាំងនយោបាយ។
លោក សោភក្តិ៍ បន្ថែមទៀតថា រីឯពាក្យសម្តីសម្លុតគំរាមកំហែងអំពីសង្គ្រាម ដែលគណបក្សកាន់អំណាចបាននិយាយនៅមុនពេលការឃោសនាចាប់ផ្តើម ហាក់មិនមានប្រសិទ្ធភាពជាមួយនឹងអ្នកបោះឆ្នោតវ័យក្មេងទេ ដោយសារពួកគាត់មិនខ្លាចរអាហើយថែមទាំងឌឺឱ្យទៅវិញទៀតផង។ លោកចាត់ទុកថា វាជាទម្លាប់របស់បក្សកាន់អំណាច ជាជាងថ្លែងសារនេះ ដើម្បីបន្ថែមទម្ងន់នយោបាយព្រោះប្រជាពលរដ្ឋមិនឱ្យតម្លៃទេ៕
