នាយករដ្ឋមន្ត្រីថៃ អ្នកស្រី Paetongtarn Shinawatra នៅថ្ងៃពុធនេះ នឹងចាប់ផ្តើមដំណើរទស្សនកិច្ចរយៈពេល៤ថ្ងៃទៅកាន់ប្រទេសចិន ដែលរំពឹងថានឹងផ្តោតទៅលើទំនាក់ទំនងសេដ្ឋកិច្ចនិងពាណិជ្ជកម្ម។ ទស្សនកិច្ចនឹងរួមបញ្ចូលការជួបជាមួយមេដឹកនាំចិនលោក Xi Jinping ហើយអ្នកវិភាគថានាយករដ្ឋមន្ត្រីថៃរូបនេះក៏នឹងស្វែងរកជំនួយពីចិនក្នុងការបង្កើនទំនុកចិត្តទេសចរចិនដើម្បីទៅទស្សនាប្រទេសថៃ។
ដំណើរទស្សនកិច្ចរបស់អ្នកស្រី Paetongtarn កើតមានឡើងខណៈមានការបារម្ភកាន់តែខ្លាំងក្នុងចំណោមអ្នកទេសចរចិនអំពីហានិភ័យនៃការធ្វើដំណើរទៅកាន់ប្រទេសថៃ។ កាលពីខែមករា តួកុនក្នុងទូរទស្សន៍របស់ចិនម្នាក់គឺលោក Wang Xing ត្រូវបានចាប់ពង្រត់ពីប្រទេសនៅអាស៊ីអាគ្នេយ៍មួយនេះ និងបង្ខំឱ្យធ្វើការនៅកន្លែងបោកបញ្ឆោតតាមអ៊ីនធឺណិត scam នៅប្រទេសមីយ៉ាន់ម៉ាដែលជាប្រទេសជិតខាង។
លោក Rahman Yaacob អ្នកស្រាវជ្រាវនៅកម្មវិធីអាស៊ីអាគ្នេយ៍នៃវិទ្យាស្ថាន Lowy Institute ក្នុងប្រទេសអូស្ត្រាលីថ្លែងថា៖«ប្រទេសចិនពិតជាមានការបារម្ភខ្លាំងចំពោះអ្វីដែលកំពុងកើតឡើងនៅប្រទេសថៃ ជាពិសេសកន្លែងបោកបញ្ឆោត scam ដូច្នេះទស្សនកិច្ចរបស់នាយករដ្ឋមន្ត្រីថៃ គឺដើម្បីធានាដល់ជនជាតិចិនថា ជនជាតិថៃនឹងធ្វើអ្វីគ្រប់យ៉ាងដែលពួកគេអាចធ្វើបានដើម្បីដោះស្រាយបញ្ហា scam នេះ»។
ក្នុងប៉ុន្មានសប្តាហ៍ចុងក្រោយនេះ មន្ត្រីពង្រឹងច្បាប់ថៃនិងចិនបានរួមកម្លាំងគ្នាជាសាធារណៈដើម្បីចុះបង្ក្រាបកន្លែងប្រតិបត្តិការ scam រាប់សិបកន្លែងដែលមាននៅតាមបណ្តោយព្រំដែនចិន ថៃ និងមីយ៉ាន់ម៉ា ដោយពួកគេបានចាប់បុរសម្នាក់ដែលសង្ស័យថាជាប់ពាក់ពាន់នឹងការចាប់ពង្រត់តួកុនចិនលោក Wang Xing។
ទាំងមន្ត្រីចិននិងថៃបានយល់ព្រមគ្នាថានឹងពង្រឹងកិច្ចសហប្រតិបត្តិការបន្ថែមទៀតនៅក្នុងការប្រយុទ្ធប្រឆាំងនឹងក្រុមបងធំ scam តាមអ៊ីនធឺណិតទាំងនេះ ដោយរួមមានការបង្កើតមជ្ឈមណ្ឌលសម្របសម្រួលនៅទីក្រុងបាងកក៕
នាយករដ្ឋមន្ត្រីថៃទៅប្រទេសចិន ខណៈភាពមិនប្រាកដប្រជាកាន់តែកើនឡើងក្នុងពិភពលោក
វេទិកាបញ្ចេញមតិ