តៃវ៉ាន់បានឱ្យដឹងនៅថ្ងៃចន្ទនេះថា ខ្លួនកំពុងឃ្លាំមើលយ៉ាងដិតដល់ ខណៈដែលចិនធ្វើសមយុទ្ធយោធានៅថ្ងៃទីបី។
យោធារបស់តៃវ៉ាន់បានឱ្យដឹងថា ចិនបានបញ្ជូនយន្ដហោះចម្បាំងរាប់សិបគ្រឿងនិងនាវាចម្បាំងចំនួន១១គ្រឿងឆ្ពោះទៅកាន់តៃវ៉ាន់ដែលជាផ្នែកមួយនៃសមយុទ្ធយោធារបស់ខ្លួនដែលបានចាប់ផ្ដើមកាលពីថ្ងៃសៅរ៍កាលពីសប្តាហ៍មុន។
សមយុទ្ធយោធារបស់ចិននេះត្រូវបានធ្វើឡើងដើម្បីឆ្លើយតបទៅនឹងជំនួបរវាងប្រធានាធិបតីតៃវ៉ាន់ជាមួយនឹងប្រធានរដ្ឋសភាសហរដ្ឋអាមេរិកលោក Kevin McCarthy និងសមាជិកសភាមួយចំនួននៃរដ្ឋ California កាលពីសប្ដាហ៍មុន។
យោធាចិនបាននិយាយនៅក្នុងសេចក្ដីថ្លែងការណ៍មួយថា សមយុទ្ធយោធានៅជុំវិញកោះតៃវ៉ាន់គឺជា«ការព្រមានដ៏ធ្ងន់ធ្ងរមួយទៅកាន់ការឃុបឃិតគ្នានិងការបង្ករឿងរបស់កងកម្លាំងផ្ដាច់ខ្លួនឯករាជ្យកោះតៃវ៉ាន់និងកងកម្លាំងពីខាងក្រៅ»។
យោធាចិនបាននិយាយទៀតថា «ប្រតិបត្តិការនេះគឺចាំបាច់ដើម្បីរក្សាអធិបតេយ្យជាតិនិងសុចរិតភាពដែនដីរបស់ចិន»។
ប្រធានាធិបតីតៃវ៉ាន់អ្នកស្រី Tsai Ing-wen បានថ្កោលទោសសមយុទ្ធយោធានេះដោយនិយាយថា តៃវ៉ាន់នឹងបន្ដធ្វើការជាមួយនឹងសហរដ្ឋអាមេរិកនិងបណ្ដាប្រទេសកាន់លទ្ធិប្រជាធិបតេយ្យដទៃទៀត ខណៈដែលកោះតៃវ៉ាន់ប្រឈមនឹង«ការពង្រីករបបផ្ដាច់ការដែលចេះតែបន្ដ»ពីចិន។
សហរដ្ឋអាមេរិកមានគោលនយោបាយ«ចិនតែមួយ» ដែលទទួលស្គាល់ថា រដ្ឋាភិបាលក្រុងប៉េកាំងចាត់ទុកតៃវ៉ាន់ជាផ្នែកមួយនៃទឹកដីរបស់ខ្លួន។ សហរដ្ឋអាមេរិកចាត់ទុកស្ថានភាពរបស់តៃវ៉ាន់ថាមិនទាន់ដោះស្រាយ និងបញ្ជូនជំនួយយោធាទៅកាន់កោះគ្រប់គ្រងដោយខ្លួនឯងមួយនេះដើម្បីជួយការពារកោះនេះ។
ប្រធានាធិបតីសហរដ្ឋអាមេរិកលោក Joe Biden ជារឿយៗបាននិយាយថា សហរដ្ឋអាមេរិកនឹងការពារយោធាតៃវ៉ាន់ប្រសិនបើចិនចង់ឈ្លានពាន ថ្វីត្បិតតែរដ្ឋាភិបាលក្រុងវ៉ាស៊ីនតោនបានរក្សាគោលនយោបាយចិនតែមួយរបស់ខ្លួនដែលមិនដែលផ្លាស់ប្ដូរក៏ដោយ៕
ព័ត៌មានមួយចំនួននៅក្នុងសេចក្ដីរាយការណ៍នេះត្រូវបានដកស្រង់ពីទីភ្នាក់ងារព័ត៌មាន The Associated Press ទីភ្នាក់ងារព័ត៌មាន Reuters និងទីភ្នាក់ងារព័ត៌មាន Agence France-Presse។
