ប្រធានរដ្ឋសភាសហរដ្ឋអាមេរិកលោក Kevin McCarthy បានប្តេជ្ញាផ្តល់ការគាំទ្រ«ដាច់ណាត់ គ្មានងាករេនិងរបស់គណបក្សទាំងពីរ»ដល់កោះតៃវ៉ាន់នៅក្រោយលោកបានធ្វើការចរចាកាលពីថ្ងៃពុធជាមួយប្រធានាធិបតីតៃវ៉ាន់លោកស្រី Tsai Ing-wen ក្នុងរដ្ឋ California។
លោកបាននិយាយនៅក្នុងសន្និសីទកាសែតរួមគ្នាមួយជាមួយលោកស្រី Tsai ថា៖ «ខ្ញុំមានជំនឿថាចំណងទាក់ទងគ្នារបស់យើងនៅពេលនេះខ្លាំងជាងពេលណាៗទាំងអស់ឬនៅចំណុចណាមួយនៃជីវិតខ្ញុំ»។
ជំនួបកាលពីថ្ងៃពុធមានរួមទាំងគណៈប្រតិភូសភាមកពីគណបក្សទាំងពីរផងដែរ។
លោកស្រី Tsai បាននិយាយថា«វត្តមានរបស់ពួកសមាជិករដ្ឋសភាអាមេរិកាំងទាំងនេះនិងការគាំទ្រគ្មានងាករេរបស់ពួកគេធានារ៉ាប់រងជាថ្មីដល់ប្រជារាស្ត្រតៃវ៉ាន់ថាយើងមិនមែននៅឯកោទេ។ ហើយយើងមិនមែននៅតែម្នាក់ឯងឡើយ»។
លោកស្រីក៏បានព្រមានថាការគំរាមកំហែងខាងយោធាពីប្រទេសចិន ដែលអះអាងថាតៃវ៉ាន់ជាផ្នែកមួយនៃដែនដីខ្លួន«មិនអាចមើលស្រាលបានទេ»។ លោកស្រីបានថ្លែងថាតៃវ៉ាន់ស្វះស្វែងឱ្យមាន«ភាពនៅដូចដើមដដែលដោយសន្តិភាព»និង«ប្រឹងប្រែងយ៉ាងខ្លាំង ជាដៃគូពឹងពាក់បានក្នុងពិភពលោក»។
កិច្ចចរចាគ្នានេះនាំឱ្យមានការជំទាស់ពីប្រទេសចិន។ រដ្ឋាភិបាលក្រុងប៉េកាំងបានប្រកាសអំពីកិច្ចប្រតិបត្តិការយាមល្បាតក្នុងប៉ែកខាងជើង-កណ្តាលច្រកសមុទ្រតៃវ៉ាន់។ ចំណែកឯកងទ័ពរំដោះប្រជាជនចិនបាននិយាយថាខ្លួនបានបញ្ជូននាវាពិឃាតពីរគ្រឿងនិងនាវាចម្បាំងមួយគ្រឿងទៅសមុទ្រចិនខាងកើតដើម្បីធ្វើសមយុទ្ធបាញ់គ្រាប់ពិត។
គេជឿថាកិច្ចប្រតិបត្តិការទាំងពីរនេះជាការតបតនឹងតៃវ៉ាន់ដោយសារលោកស្រី Tsai បានឈប់សំចតពីរដងក្នុងសហរដ្ឋអាមេរិកក្នុងពេលតិចជាងមួយសប្តាហ៍។
លោក McCarthy បាននិយាយប្រាប់ពួកអ្នកកាសែតថា៖ «នេះមិនមែនជាបំណងយើងក្នុងការបង្កើនភាពតានតឹងទេ។ យើងចង់បន្តកសាងនិងជំរុញលទ្ធិប្រជាធិបតេយ្យនិងសេរីភាពឱ្យរីកចម្រើន។ មិនគួរព្រួយបារម្ភទេ»៕
