មន្ត្រីរុស្ស៊ីនិងអ៊ុយក្រែនបានរាយការណ៍ថាមានការប្រយុទ្ធគ្នានៅក្នុងតំបន់ Sumy នៃប្រទេសអ៊ុយក្រែន ដោយរុស្ស៊ីបានរុលចូលនៅក្នុងតំបន់នោះដែលអាចមានលទ្ធភាពកាត់ផ្ដាច់ខ្សែផ្គត់ផ្គង់ដល់យោធាអ៊ុយក្រែន។
មន្ត្រីទាំងនោះបាននិយាយថា ការប្រយុទ្ធគ្នាក៏បានកើតឡើងផងដែរនៅក្នុងតំបន់ Novenke។
តំបន់ Sumy ស្ថិតនៅម្ខាងព្រំដែនពីតំបន់ Kursk របស់រុស្ស៊ី។ កងទ័ពអ៊ុយក្រែនបានធ្វើការវាយប្រហារលើតំបន់ Kursk នោះកាលពីខែសីហាឆ្នាំមុន។
កងទ័ពរុស្ស៊ីបានគ្រប់គ្រងផ្នែកនានានៃតំបន់ Sumy ក្នុងអំឡុងដំណាក់កាលដំបូងៗនៃការឈ្លានពានពេញទំហឹងរបស់ខ្លួនលើប្រទេសអ៊ុយក្រែនដែលបានចាប់ផ្ដើមកាលពីជាង ៣ ឆ្នាំមុន។
យោធាអ៊ុយក្រែនបានបញ្ជាក់នៅថ្ងៃចន្ទនេះថា ខ្លួនបានបាញ់ទម្លាក់ដ្រូនរុស្ស៊ី ១៣០ គ្រឿងកាលពីយប់មិញ ដែលដ្រូនទាំងនោះបានវាយប្រហារសំដៅលើតំបន់នានានៅទូទាំងប្រទេសអ៊ុយក្រែន។
មន្ត្រីនៅក្នុងទីក្រុង Poltava នៃប្រទេសអ៊ុយក្រែនបានរាយការណ៍ថាមានការខូចខាតអគារលំនៅដ្ឋានជាច្រើនខ្នង។
ក្រសួងការពារជាតិរុស្ស៊ីបានលើកឡើងនៅថ្ងៃចន្ទនេះថា ប្រព័ន្ធការពារដែនអាកាសរបស់ខ្លួនបានបាញ់ទម្លាក់ដ្រូនអ៊ុយក្រែន ៩ គ្រឿងនៅពីលើតំបន់ Samara, Voronezh, Oryol, Belgorod និង Kursk៕
ព័ត៌មានខ្លះសម្រាប់សេចក្តីរាយការណ៍នេះផ្តល់ដោយទីភ្នាក់ងារសារព័ត៌មាន AFP និង Reuters
