ប៉ូលិសហ្វីលីពីនបានចាប់ខ្លួនមនុស្សជាង៤៥០នាក់នៅក្នុងការវាយឆ្មក់មួយនៅកន្លែងមួយដែលត្រូវគេចោទថាជាកន្លែងលេងល្បែងអនឡាញដំណើរការដោយជនជាតិចិននៅក្នុងរដ្ឋធានីម៉ានីល។ នេះបើតាមគណៈកម្មការប្រយុទ្ធប្រឆាំងឧក្រិដ្ឋកម្មដែលមានអង្គការចាត់តាំង។
ការសួរចម្លើយដំបូងបង្ហាញថា ទីតាំងនៅជាយក្រុងនេះត្រូវបានដំណើរការជាមណ្ឌលឆបោកតាមអនឡាញ ដោយដៅគោលដៅចំពោះជនរងគ្រោះនៅប្រទេសចិននិងឥណ្ឌា ដែលចូលរួមនៅក្នុងការភ្នាល់កីឡា និងគម្រោងវិនិយោគផ្សេងៗ។ នេះបើតាមគណៈកម្មការនេះ ដែលបានឱ្យដឹងក្រោយការវាយឆ្មក់កាលពីថ្ងៃព្រហស្បតិ៍ ដោយមានការឃាត់ខ្លួនពលរដ្ឋចិនចំនួន១៣៧នាក់។ប្រធានគណៈកម្មការនេះគឺលោក Gilberto Cruz បានប្រាប់ទីភ្នាក់ងារសារព័ត៌មាន AFP នៅថ្ងៃសុក្រនេះថា «យើងបានចាប់ខ្លួនមេៗ៥នាក់ជាជនជាតិចិន» ដោយលោកថា ពួកគេទំនងអាចត្រូវចោទពីបទជួញដូរមនុស្ស។
កន្លែងប្រតិបត្តិការល្បែងហ្គេមអនឡាយរបស់ហ្វីលីពីនដែលហៅកាត់ថា POGOs ត្រូវបានហាមឃាត់ដោយប្រធានាធិបតីហ្វីលីពីនលោក Ferdinand Marcos កាលពីឆ្នាំមុន ប៉ុន្តែកន្លែងទាំងនេះត្រូវគេរាយការណ៍ថា ឥឡូវនេះជាកន្លែងលាក់បាំងដោយក្រុមឧក្រិដ្ឋកម្មមានអង្គការចាត់តាំង សម្រាប់ជួញដូរមនុស្ស លាងលុយ បោកប្រាស់តាមអនឡាញ ចាប់ជំរិតនិងសូម្បីប្រព្រឹត្តឃាតកម្ម៕
វេទិកាបញ្ចេញមតិ