អ្នកស្រី មូរ សុខហួរ អនុប្រធានបក្សប្រឆាំងបានចេញពីកម្ពុជា ក្រោមមូលហេតុបារម្ភថា នឹងមានការចាប់ខ្លួនអ្នកស្រី។ ការចាកចេញយ៉ាងប្រញាប់ប្រញាល់នេះកើតមានឡើងបន្ទាប់ពីលោកនាយករដ្ឋមន្រ្តី ហ៊ុន សែន បានប្រកាសថានឹងចាប់ខ្លួនមនុស្សបន្ថែមទៀត ពាក់ព័ន្ធនឹងទង្វើរបស់មេដឹកនាំគណបក្សប្រឆាំងលោក កឹម សុខា ដែលត្រូវបានចោទប្រកាន់ពីបទក្បត់ជាតិ។
អ្នកតាមដានស្ថានការណ៍នយោបាយ និងសិទ្ធិមនុស្សលើកឡើងថា ការចាកចេញរបស់ក្រុមមន្រ្តីបក្សប្រឆាំងគឺជាសញ្ញាណនៃការបែកខ្ញែករបស់គណបក្សប្រឆាំងកាន់តែខ្លាំង និងបង្ហាញពីការស្លាប់លទ្ធិប្រជាធិបតេយ្យនៅកម្ពុជា។
អនុប្រធានគណបក្សសង្គ្រោះជាតិ អ្នកស្រី មូរ សុខហួរ អះអាងថា អ្នកស្រី និងតំណាងរាស្រ្តគណបក្សប្រឆាំងផ្សេងទៀតសម្រេចចាកចេញពីកម្ពុជាដើម្បីសង្គ្រោះលទ្ធិប្រជាធិបតេយ្យនៅកម្ពុជា ជាជាងចាំឲ្យសមត្ថកិច្ចរបស់រដ្ឋាភិបាលលោក ហ៊ុន សែន ប្រើច្បាប់មិនត្រឹមត្រូវមកចាប់បញ្ជូនទៅឃុំក្នុងពន្ធនាគារ។
អ្នកស្រី មូរ សុខហួរ ថ្លែងបែបនេះ ក្រោយការចាកចេញពីកម្ពុជានៅព្រឹកថ្ងៃអង្គារ បន្ទាប់ពីលោកនាយករដ្ឋមន្រ្តី ហ៊ុន សែន កាលពីថ្ងៃទី២ ខែតុលា ប្រកាសថា នឹងបន្តចាប់ខ្លួនមនុស្សបន្ថែមទៀតដែលលោកបញ្ជាក់ថា ជាអ្នកដែលគាំទ្របរទេសដើម្បីផ្តួលរំលំរដ្ឋាភិបាល។ ការប្រកាសរបស់លោក ហ៊ុន សែន ធ្វើឡើង ក្រោយពេលលោក កឹម សុខា ប្រធានគណបក្សសង្គ្រោះជាតិត្រូវបានចាប់បញ្ជូនទៅឃុំខ្លួនក្នុងពន្ធនាគារ តាមការចោទពីបទក្បត់ជាតិ។
ថ្លែងប្រាប់ VOA នាយប់ថ្ងៃអង្គារតាមរយៈទូរស័ព្ទពីក្រៅប្រទេស អ្នកស្រី មូរ សុខហួរ លើកឡើងថា អ្នកស្រីបានសម្រេចចាកចេញពីកម្ពុជា ក្រោយពីលោកនាយករដ្ឋមន្រ្តីបានព្រមានចាប់ខ្លួនមនុស្សបន្ថែមទៀតដែលពាក់ព័ន្ធនឹងលោក កឹម សុខា។ អ្នកស្រីបន្ថែមថា រដ្ឋាភិបាលបានរៀបចំរួចជាស្រេចដើម្បីចាប់ខ្លួនតំណាងរាស្រ្ត រួមទាំងមន្រ្តីជាន់ខ្ពស់ផ្សេងទៀតរបស់គណបក្សសង្គ្រោះជាតិ ដូច្នេះអ្នកស្រីថា អ្នកស្រី និងក្រុមតំណាងរាស្រ្ត ព្រមទាំងមន្រ្តីជាន់ខ្ពស់គណបក្សសង្គ្រោះជាតិផ្សេងទៀត នឹងនៅក្រៅប្រទេសដើម្បីតស៊ូមតិ ទាមទារលទ្ធិប្រជាធិបយ្យនៅកម្ពុជា ជាជាងបណ្តោយឲ្យគេចាប់ខ្លួនទៅឃុំឃាំងដោយមិនស្របតាមច្បាប់។
អ្នកតំណាងរាស្រ្តមានសញ្ជាតិអាមេរិកាំងរូបនេះបញ្ជាក់ថា៖
«យើងដឹងហើយ ការចាប់ចងនេះគឺជាសេណារីយ៉ូ នៅក្នុងការធ្វើដូចម្តេចដើម្បីឲ្យអ្នកកាន់អំណាចបានកាន់អំណាចបន្តទៀត។ បើសិនជាគ្មានប្រជាធិបតេយ្យ បើសិនមានតែការគំរាមកំហែង ឮសូរតែចាប់ចង ចាប់ហើយនិងចង ដូច្នេះខ្ញុំយល់ថា យើងត្រូវតែរកវិធីសាស្រ្តផ្សេងដើម្បីជំរុញ ដើម្បីលើកស្ទួយ ដើម្បីសង្គ្រោះលទ្ធិប្រជាធិបតេយ្យនៅប្រទេសកម្ពុជាយើង»។
កាលពីថ្ងៃទី២ ខែតុលា លោក ហ៊ុន សែន នាយករដ្ឋមន្រ្តីដែលកាន់អំណាចជាង ៣០ឆ្នាំថ្លែងថា លោកនឹងមិនបញ្ចប់សំណុំរឿងពាក់ព័ន្ធនឹងអំពើក្បត់ជាតិ ដោយចាប់ខ្លួនមនុស្សតែម្នាក់នោះទេ។ លោកទំនងជាថ្លែងសំដៅលើលោក កឹម សុខា ប្រធានគណបក្សសង្គ្រោះជាតិ និងមន្រ្តីគណបក្សប្រឆាំងមួយចំនួនទៀត។ លោកបន្ថែមថា មន្រ្តីជាន់ខ្ពស់របស់គណបក្សប្រឆាំងមួយចំនួនបានធ្វើការអធិប្បាយដោយព្រហើនរួចមកហើយ ក្នុងខេត្តកំពង់ធំ ព្រះវិហារ និងសៀមរាប ដែលខេត្តទាំងនោះជាខេត្តដែលអ្នកស្រី មូរ សុខហួរ បានចុះទៅពង្រឹងសតិអារម្មណ៍ និងផ្សព្វផ្សាយពីស្ថានការណ៍នយោបាយ។
ថ្លែងក្នុងពិធីសម្ពោធរមណីយដ្ឋានរបស់ក្រុមហ៊ុនឯកជនមួយនៅខេត្តសៀមរាប លោក ហ៊ុន សែន បញ្ជាក់ថា៖
«យើងបាន និងកំពុងធ្វើសកម្មភាពបន្តទៅទៀត មិនមែនបញ្ចប់ត្រឹមចាប់មនុស្សម្នាក់ទេ។ សូមផ្តាំឲ្យហើយ! មិនមែនបញ្ចប់ត្រឹមចាប់ខ្លួនមនុស្សម្នាក់ទេ ព្រោះនេះជាការរៀបចំ និងធ្វើសកម្មភាពជាប្រព័ន្ធតែម្តង។ ដូច្នេះខ្ញុំនិយាយប៉ុណ្ណេះ អ្នកដទៃអាចយល់បាន ហើយកំពុងប្រើភាពជម្លើយ នៅតំបន់បីខេត្តរួចហើយ»។
ចាប់តាំងពីពេលដែលលោក កឹម សុខា ប្រធានគណបក្សសង្គ្រោះជាតិ ត្រូវបានចាប់ខ្លួន និងបញ្ជូនទៅឃុំក្នុងពន្ធនាគារ កាលពីដើមខែកញ្ញានេះ គេឃើញមន្រ្តីជាន់ខ្ពស់ និងតំណាងរាស្រ្តគណបក្សសង្គ្រោះជាតិជាច្រើនរូប បានចាកចេញពីប្រទេសកម្ពុជាជាបន្តបន្ទាប់។
លោក សុន ឆ័យ ប្រធានក្រុមតំណាងរាស្រ្តគណបក្សប្រឆាំង ប្រាប់ VOA កាលពីសប្តាហ៍មុនថា អ្នកតំណាងរាស្រ្តចំនួន២២រូប រួមទាំងមន្រ្តីជាន់ខ្ពស់គណបក្សសង្គ្រោះជាតិសំខាន់ៗមួយចំនួនទៀត បានចាកចេញពីកម្ពុជាទៅកាន់ប្រទេសផ្សេងៗគ្នា ដើម្បីពន្យល់អំពីស្ថានភាពនយោបាយនៅកម្ពុជាប្រាប់អ្នកគាំទ្រគណបក្សខ្លួននៅតាមបណ្តាប្រទេសទាំងនោះ។ លោកបានបន្ថែមថា អ្នកទាំងនោះនឹងត្រឡប់មកកម្ពុជាវិញនាដើមខែតុលានេះ។
ទោះជាយ៉ាងណា រហូតមកដល់ពេលនេះ មិនទាន់មានតំណាងរាស្រ្ត ឬមន្រ្តីជាន់ខ្ពស់រូបណាត្រឡប់មកកម្ពុជាវិញនៅឡើយ ក្នុងនោះរួមមានលោក អេង ឆៃអ៊ាង លោក យឹម សុវណ្ណ លោក គង់ សភា លោក ញ៉យ ចំរើន ជាដើមដែលជាអ្នកតំណាងរាស្រ្ត។ ចំណែកមន្រ្តីជាន់ខ្ពស់គណបក្សមានដូចជា លោក ហ៊ីង សុខសាន្ត ប្រធានក្រុមយុវជនគណបក្សប្រឆាំង កូនស្រីទាំងពីររបស់លោក កឹម សុខា គឺកញ្ញា កឹម មនោវិទ្យា និងកញ្ញា កឹម សម្មាធីតា ព្រមទាំងមន្រ្តីជាច្រើនរូបទៀត។
យ៉ាងណាក៏ដោយ អ្នកស្រី មូរ សុខហួរ បានប្រាប់ VOA បន្ថែមថា មន្រ្តី និងតំណាងរាស្រ្តគណបក្សប្រឆាំងដែលកំពុងស្ថិតនៅក្រៅប្រទេសទាំងនោះ នឹងត្រឡប់មកកម្ពុជាវិញ លុះត្រាតែមានការធានាឲ្យគណបក្សប្រឆាំងអាចចូលរួមក្នុងការបោះឆ្នោតដោយសេរី និងយុត្តិធម៌។ អ្នកស្រីក៏បានអំពាវនាវឲ្យមន្រ្តី ព្រមទាំងប្រជាពលរដ្ឋដែលគាំទ្រគណបក្សប្រឆាំងទាំងអស់ កុំអស់សង្ឃឹម ដោយថា អ្នកស្រី និងតំណាងរាស្រ្តដែលកំពុងនៅក្រៅប្រទេសផ្សេងទៀត កំពុងស្វែងរកដំណោះស្រាយពីសហគមន៍អន្តរជាតិ។
កន្លងមកគេសង្កេតឃើញថា រាល់ពេលដែលលោកនាយករដ្ឋមន្រ្តីប្រកាសថា នឹងចាប់ខ្លួននរណាម្នាក់ ឬក្រុមណាមួយ គេតែងឃើញជននោះត្រូវបានចាប់ខ្លួនភ្លាមៗ តួយ៉ាងដូចជាការប្រកាសឲ្យចាប់ខ្លួនលោក ហុង សុខហួរ សមាជិកព្រឹទ្ធសភា និងលោក អ៊ុំ សំអាន តំណាងរាស្រ្តគណបក្សប្រឆាំងជាដើម។ អ្នកទាំងពីរសុទ្ធតែត្រូវបានចាប់ខ្លួនពាក់ព័ន្ធនឹងរឿងផែនទីព្រំដែនកម្ពុជា-វៀតណាម ដែលការចាប់ខ្លួននោះកើតឡើង ក្រោយការប្រកាសរបស់លោក ហ៊ុន សែន បានបន្តិច។
លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់ VOA នាព្រឹកថ្ងៃពុធនេះថា រហូតមកដល់ពេលនេះមិនទាន់មានដីកាពីតុលាការ ឬការប្រកាសឲ្យចាប់ខ្លួនអ្នកស្រី មូរ សុខហួរ ឬជនណាម្នាក់ពាក់ព័ន្ធនឹងសំណុំរឿងរបស់លោក កឹម សុខា នោះទេ។ ទោះយ៉ាងណា លោកថា ទង្វើរបស់អ្នកស្រី មូរ សុខហួរ កន្លងមក ដូចជាការលើកស្លាកទាមទារឲ្យដោះលែងលោក កឹម សុខា ជាដើមនោះ គឺជាសកម្មភាពខុសច្បាប់។
លោកមានប្រសាសន៍ថា៖
«ជាការលើកផ្លាក ជាការដើរបំផុសបំផុលតាមស្នាក់ការរបស់គាត់ កន្លងមកឃើញមាននៅសៀមរាម មាននៅព្រះវិហារ មាននៅកំពង់ធំ និងមានបន្តទៅទៀតតាមខេត្ត។ ដូច្នេះពេលដែលមានប្រសាសន៍របស់សម្តេចនាយកនៅខេត្តសៀមរាបកាលពីម្សិលម្ង៉ៃ ជំទាវ មូរ សុខហួរ គាត់គោដំបៅខ្នង ស្មាទោសតាមពាក្យខ្មែរ ក៏រំសាយកន្ទុយ ក៏រត់ទៅ។ អត់ទាន់មានផែនការ ឬអត់ទាន់មានការចោទប្រកាន់ណាមួយពីតុលាការថា ត្រូវចាប់ខ្លួនទេ»។
ការចាកចេញជាបន្តបន្ទាប់របស់តំណាងរាស្ត្រគណបក្សប្រឆាំងនឹងមិនបង្អាក់ដល់សកម្មភាពនយោបាយរបស់គណបក្សសង្គ្រោះជាតិនៅថ្នាក់មូលដ្ឋាន ក៏ដូចជាក្នុងក្បាលម៉ាស៊ីនដឹកនាំផ្ទៃក្នុងគណបក្សទេ។ នេះបើយោងតាមការបញ្ជាក់របស់លោក ម៉ៅ មុនីវណ្ណ តំណាងរាស្ត្រមណ្ឌលខេត្តកំពង់ចាមនៃគណបក្សសង្គ្រោះជាតិ។
លោក ម៉ៅ មុនីវណ្ណ បានប្រាប់ VOA នៅថ្ងៃពុធនេះថា ការចាកចេញទៅក្រៅប្រទេសជាបន្តបន្ទាប់របស់ក្រុមតំណាងរាស្ត្រនោះគឺជាផ្នែកមួយនៃដំណើរឯកជន ហើយពួកគេមួយចំនួនបានចេញទៅ មុនការចាប់ខ្លួនលោក កឹម សុខា មេដឹកនាំគណបក្សប្រឆាំង។ លោកបញ្ជាក់ថា ការចាកចេញរបស់អ្នកស្រី មូរ សុខហួរ កាលពីពេលថ្មីៗនេះ ធ្វើឡើងបន្ទាប់ពីអ្នកស្រីទទួលបានសារព្រមានអំពីលទ្ធភាពដែលអាចនាំទៅរកការចាប់ខ្លួន។ យ៉ាងណាក្តី លោកនិយាយថា គណបក្សសង្គ្រោះជាតិនៅតែរឹងមាំ ទោះបីសមាសភាពថ្នាក់ដឹកនាំគណបក្សបានចេញពីប្រទេសក្តី។
សម្រាប់ជំហរលោកផ្ទាល់ លោក ម៉ៅ មុនីវណ្ណ អះអាងថា លោកនឹងបន្តស្ថិតក្នុងប្រទេស ដើម្បីរួមចំណែកការងារជាមួយក្រុមសកម្មជន មន្ត្រី និងថ្នាក់ដឹកនាំរបស់គណបក្ស នៅគ្រាដែលស្ថានការណ៍នយោបាយ មិនទាន់មានភាពធូរស្រាលវិញនោះ។
លោកបញ្ជាក់ថា៖
«ចំពោះខ្ញុំ ខ្ញុំបានសម្រេចចិត្តហើយថា ខ្ញុំនៅជាមួយនឹងសកម្មជន សកម្មនារីគណបក្ស ជាពិសេសគឺក្រុមប្រឹក្សាឃុំសង្កាត់៥០០៧នាក់ និងថ្នាក់ដឹកនាំដទៃទៀត។ ជាពិសេស ប្រធានគណបក្សលោកត្រូវជាប់នៅក្នុងមន្ទីរឃុំឃាំង ដូច្នេះខ្ញុំនៅបន្ត ការដឹកនាំ និរន្តរភាពគណបក្សបន្តទៅទៀត»។
លោក ប៉ុល ហំម អនុប្រធានគណបក្សសង្គ្រោះជាតិ ដែលកំពុងស្ថិតក្នុងប្រទេស បានបដិសេធមិនផ្តល់ការអធិប្បាយទេ។
អ្នកស្រី មូរ សុខហួរ តំណាងរាស្ត្រមណ្ឌលខេត្តបាត់ដំបង ត្រូវគេដឹងថា បានធ្វើកិច្ចការនយោបាយជាច្រើននៅថ្នាក់មូលដ្ឋាន ហើយចុងក្រោយនេះ អ្នកស្រីបានប្រកាសឲ្យសកម្មជនគណបក្សប្រឆាំងលើកស្លាកទាមទារឲ្យដោះលែងលោក កឹម សុខា ពីពន្ធនាគារ។ ក្រោយការប្រកាសនេះតែប៉ុន្មានថ្ងៃ អាជ្ញាធរកម្ពុជា បានចោទប្រកាន់ថា សកម្មភាពនេះជាផ្នែកមួយនៃចលនាបដិវត្តន៍ពណ៌។
លោក ម៉ៅ មុនីវណ្ណ បានបញ្ជាក់ឲ្យដឹងទៀតថា ការប្រកូកប្រកាសឲ្យលើកស្លាកទាមទារឲ្យដោះលែងលោក កឹម សុខា នោះ មិនទាក់ទងនឹងការចាកចេញរបស់អ្នកស្រី មូរ សុខហួរ នោះឡើយ។ លោកបន្ថែមថា សម្ពាធនយោបាយក្នុងប្រទេសបានបង្ខំឲ្យអ្នកស្រី ក៏ដូចជាតំណាងរាស្ត្រផ្សេងទៀត ចាកចេញពីប្រទេស។ លោកអះអាងផងដែរថា ទោះបីជាស្ថានភាពនយោបាយកម្ពុជាតានតឹងបែបណាក៏ដោយ ការសម្របសម្រួលគ្នានឹងអាចធ្វើឡើង ហើយថាសម្ពាធពីសហគមន៍អន្តរជាតិគ្រាន់តែជាផ្នែកមួយនៃដំណោះស្រាយប៉ុណ្ណោះ។
អ្នកស្រី មូរ សុខហួរ ស្ថិតក្នុងចំណោមតំណាងរាស្ត្រយ៉ាងហោចណាស់៧រូប ដែលនៅរងបណ្តឹងអាជ្ញា ពាក់ព័ន្ធនឹងបាតុកម្មហិង្សាកាលពីខែកក្កដា ឆ្នាំ២០១៤ ត្រង់ម្តុំស្ពាននាគ ជាប់ទីលានប្រជាធិបតេយ្យចាស់។
ក្រុមអ្នកវិភាគយល់ឃើញផ្សេងៗគ្នាអំពីការចាកចេញរបស់អ្នកស្រី មូរ សុខហួរ អនុប្រធានគណបក្សសង្គ្រោះជាតិ និងតំណាងរាស្ត្រផ្សេងទៀត។
លោក មាស នី អ្នកសិក្សាស្រាវជ្រាវពីការអភិវឌ្ឍសង្គម ថ្លែងថា ការចាកចេញរបស់ក្រុមមន្រ្តីគណបក្សប្រឆាំងគឺជាជម្រើសត្រឹមត្រូវ ប្រសិនបើពួកគេទៅស្វែងរកដំណោះស្រាយពីក្រៅប្រទេស។ ប៉ុន្តែលោកថា ប្រសិនបើពួកគេចាកចេញដោយគ្រាន់តែសម្ងំលាក់ខ្លួនមិនធ្វើអ្វីសោះនោះ វានឹងប៉ះពាល់ធ្ងន់ធ្ងរដល់ការគាំទ្រគណបក្សប្រឆាំង។
លោកបញ្ជាក់ថា៖
«បើសិនជាគ្រាន់តែចេញទៅហើយបាត់ស្ងាត់ឈឹងទៅ អាហ្នឹងបានន័យថា ការរត់ហ្នឹងជាការភ័យខ្លាច ជាជាងការទៅធ្វើការទូត។ ផលប៉ះពាល់វាអាចធ្វើឲ្យគណបក្សកាន់អំណាចគេសប្បាយចិត្ត។ អាហ្នឹងបើយើងនិយាយថាគ្រាន់តែទូងស្គរមួយ នាំគ្នារត់ចែកផ្លូវគ្នាអស់។ ដល់អីចឹងទៅវាធ្វើឲ្យគណបក្សកាន់អំណាចកាន់តែមានឱកាសវាយប្រហារមកលើគណបក្សសង្គ្រោះជាតិថា ជាគណបក្សកំសាក ជាអ្នកកំសាកអីអីចឹង»។
លោក Sebastian Strangio អ្នកនិពន្ធសៀវភៅ Hun Sen’s Cambodia បានប្រាប់ VOA តាមសារអេឡិចត្រូនិក ឬ Email ថា ក្រុមមន្ត្រីគណបក្សប្រឆាំងនឹងមានការលំបាកក្នុងការធ្វើយុទ្ធនាការពីក្រៅប្រទេស គ្រាដែលមេដឹកនាំជាន់ខ្ពស់គណបក្សមួយចំនួនកំពុងរស់នៅនិរទេសខ្លួនក្រៅប្រទេស លាក់ខ្លួន និងជាប់ក្នុងពន្ធនាគារ។ លោកបន្ថែមថា គណបក្សប្រឆាំងអាចពិបាកទាញការគាំទ្រពីរដ្ឋាភិបាលបរទេសមក ដាក់សម្ពាធលើរដ្ឋាភិបាលលោក ហ៊ុន សែន ដែលពួកគេ ជារឿយៗ បានធ្វើកាលពីពេលមុន ព្រោះថាបញ្ហាមនុស្សធម៌ជាច្រើនបានកើតឡើងក្នុងតំបន់ ដូចជាបញ្ហាជនជាតិ Rohingya នៅក្នុងប្រទេសភូមាជាដើម។
លោក Sebastian បានសរសេរតាមសារអេឡិចត្រូនិក ឬ Email ក្នុងន័យដើមថា៖
«រដ្ឋាភិបាលបរទេសជាច្រើននឹងថ្កោលទោសលោក ហ៊ុន សែន ដោយប្រើពាក្យសម្តី តែការចាត់វិធានការដែលមានប្រសិទ្ធភាពណាមួយនោះ ទំនងជាមិនអាចកើតមាននោះទេ»។
លោកថ្លែងបន្តថា ជាការប្រសើរសម្រាប់មេដឹកនាំគណបក្សសង្គ្រោះជាតិធ្វើយុទ្ធនាការពីក្នុងប្រទេស។ ប៉ុន្តែការសង្កត់សង្កិនរបស់រដ្ឋាភិបាលបានធ្វើឲ្យពួកគេសឹងតែគ្មានលទ្ធភាពធ្វើយុទ្ធនាការទេ។ លោកសង្កត់ធ្ងន់ថា បើគិតដល់ព្រឹត្តិការណ៍ថ្មីៗនេះ វាមិនប្រាកដថា គណបក្សប្រឆាំងអាចនឹងរស់រានមានជីវិតនៅមុនការបោះឆ្នោតនោះឡើយ។
លោក អ៊ា សុផល ជាអ្នកនិពន្ធសៀវភៅដែលមានចំណងជើងថា «ការពឹងផ្អែកជំនួយក្នុងប្រទេសកម្ពុជា៖ តើជំនួយបរទេសធ្វើឲ្យអន្តរាយលទ្ធិប្រជាធិបតេយ្យយ៉ាងដូចម្តេច?»។ លោកបានប្រាប់ VOA តាមរយៈសារអេឡិចត្រូនិចថា ការចាកចេញរបស់ក្រុមតំណាងរាស្ត្រ និងថ្នាក់ដឹកនាំគណបក្សប្រឆាំង គឺជារឿងអាក្រក់សម្រាប់គណបក្សនេះ។ លោកបញ្ជាក់ថា ការភ័យខ្លាចការចាប់ និងឃុំខ្លួនតាមអំពើចិត្តគឺជាដើមចមនៃការចាកចេញរបស់ពួកគេ។
អ្នកវិភាគនយោបាយកម្ពុជារូបនេះមើលឃើញថា គណបក្សសង្គ្រោះជាតិអាចនឹងរងការប្រេះស្រាំ គ្រាដែលក្រុមមន្ត្រី និងថ្នាក់ដឹកនាំនៃគណបក្សនេះសម្រុកចេញទៅក្រៅប្រទេសនោះ។
លោកបន្ថែមក្នុងន័យដើមថា៖
«កិច្ចការមួយចំនួនអាចធ្វើបានពីចម្ងាយ ប៉ុន្តែមិនមែនទាំងអស់នោះទេ។ វាអាចធ្វើឲ្យគណបក្សបែកបាក់។ វាអាចធ្វើឲ្យបុគ្គល ដែលគេមិនសូវស្គាល់ ចូលមកពាក់ព័ន្ធ ហើយបង្កើនបញ្ហា»។
លោកបានបន្ថែមថា គណបក្សសង្គ្រោះជាតិគឺជាគណបក្សមួយដ៏ធំ ដូចជានាវាមួយ ដូច្នេះមេក្រុមដឹកនាំកប៉ាល់នេះមិនត្រូវបោះបង់កប៉ាល់នេះចោលនោះឡើយ។ យ៉ាងណាក៏ដោយ លោកថា គណបក្សប្រឆាំងនៅមានពេលច្រើន ដើម្បីកែប្រែស្ថានការណ៍ ដែលនឹងមិនធ្វើឲ្យកប៉ាល់នេះលិចនោះទេ។
ដោយឡែក លោក Phil Robertson នាយករងអង្គការឃ្លាំមើលសិទ្ធិមនុស្ស Human Rights Watch ប្រចាំតំបន់អាស៊ី បានចេញសេចក្តីថ្លែងការណ៍មួយនារសៀលថ្ងៃពុធនេះ ដោយនិយាយថា ការគេចចេញរបស់អ្នកស្រី មូរ សុខហួរ មិនមានរឿងត្រូវភ្ញាក់ផ្អើលទេ ដោយសារមានការគំរាមកំហែងនានាពីលោក ហ៊ុន សែន ដែលជនផ្តាច់ការសម្បូរទ្រព្យសម្បតិ្តនោះ។
អ្នកតាមដានស្ថានភាពសិទ្ធិមនុស្សរូបនេះបានលើកឡើងថា គ្រប់ៗគ្នាពិតជាសង្ស័យថា លោក ហ៊ុន សែន អាចនឹងបញ្ជាឲ្យមានការបង្កអំពើហិង្សាដោយទាហាន និងប៉ូលិស ហើយថា លោកគ្រប់គ្រងតុលាការ ដែលជាអាយ៉ងរបស់លោកពេញទីនៅកម្ពុជា។ លោក Phil Robertson បានថ្លែងក្នុងសេចក្តីថ្លែងការណ៍ក្នុងន័យដើមថា៖
«ប្រសិនបើរាល់មេដឹកនាំគណបក្សសង្គ្រោះជាតិសំខាន់ៗត្រូវបានបង្ខំឲ្យចេញពីប្រទេស ដោយសារការចោទប្រកាន់ក្លែងក្លាយថា ពួកគេមានជាប់ពាក់ព័ន្ធនៅក្នុងការធ្វើបដិវត្តន៍ដ៏ស្រមើស្រម៉ៃប្រឆាំងនឹងរដ្ឋាភិបាលនោះ នោះវានឹងបញ្ជាក់ពីការស្លាប់នៃលទ្ធិប្រជាធិបតេយ្យនៅកម្ពុជា»។
លោក Phil Robertson បានបញ្ជាក់បន្ថែមថា លោក ហ៊ុន សែន ទំនងជាមានផែនការប្រើប្រាស់ការបំភិតបំភ័យ និងការបន្លាច ដើម្បីយកឈ្នះ នៅមុនពេលដែលសន្លឹកឆ្នោតមិនទាន់ទាំងត្រូវបានគេបោះផងនោះ៕
រាយការណ៍បន្ថែមដោយលោក ហ៊ុល រស្មី VOA
