លោក ស៊ុន ចន្ធី ប្រធានគណបក្សកម្លាំងជាតិបានសម្រេចចិត្តមិនប្តឹងទាស់ទៅតុលាការជាន់ខ្ពស់នៅក្នុងសំណុំរឿងរបស់លោក ដែលលោកត្រូវបានកាត់ទោសពីបទញុះញង់ ក្រោមហេតុផលថា លោកមិនមានជំនឿចិត្តលើតុលាការក្នុងការស្វែងរកយុត្តិធម៌ជូនរូបលោក។ នេះបើតាមមេធាវីការពារក្តីរបស់ប្រធានគណបក្សជំទាស់រូបនេះ។
កាលពីធ្នូ ឆ្នាំ២០២៤ លោក ស៊ុន ចន្ធី ត្រូវបានសាលាដំបូងរាជធានីភ្នំពេញ ផ្តន្ទាទោសឱ្យជាប់ពន្ធនាគាររយៈពេល ២ឆ្នាំ និងបានដកសិទ្ធិរបស់លោកមិនឱ្យបោះឆ្នោត និងដកសិទ្ធិមិនឱ្យឈរឈ្មោះបោះឆ្នោតជាស្ថាពរ និងពិន័យជាប្រាក់ ៤លានរៀល ក្រោមបទចោទប្រកាន់«ញុះញង់បង្កភាពវឹកវរធ្ងន់ធ្ងរដល់សន្តិសុខសង្គម»។ បទចោទនេះពាក់ព័ន្ធនឹងការថ្លែងរិះគន់របស់លោកក្នុងប្រទេសជប៉ុន ដែលលោកបានជួបជាមួយអ្នកគាំទ្រ ហើយនិយាយអំពីការរើសអើងខាងនយោបាយនៅកម្ពុជា និងភាពលម្អៀងខាងនយោបាយនៅក្នុងការទទួលបានបណ្ណក្រីក្រ។
លោក ជូង ជូងី មេធាវីការពារក្តីរបស់លោក ស៊ុន ចន្ធី ប្រាប់វីអូអេនៅថ្ងៃពុធថា លោក ស៊ុន ចន្ធី សម្រេចចិត្តមិនប្តឹងទាស់ទៅសាលាឧទ្ធរណ៍ និងតុលាការកំពូលនោះទេ។
លោកបញ្ជាក់ថា៖ «លោក ស៊ុន ចន្ធី គាត់សម្រេចមិនប្តឹងទៅតុលាការជាន់ខ្ពស់ទេ។ ហើយតាមគាត់បញ្ជាក់ប្រាប់ខ្ញុំថា គាត់មិនមានជំនឿថា ប្តឹងទៅតុលាការជាន់ខ្ពស់បានរួចខ្លួនទេ ដូច្នេះគាត់ប្រាប់ខ្ញុំថា គាត់សម្រេចមិនប្តឹងទេ»។
ការបញ្ជាក់របស់លោកមេធាវី ជូង ជូងី បន្ទាប់ពីមានលិខិតសរសេរដៃមួយច្បាប់ដែលត្រូវបានចែកចាយតាមបណ្តាញសង្គមហ្វេសប៊ុក ដែលមានការអះអាងថាជាអក្សររបស់លោក ស៊ុន ចន្ធី ដែលសរសេរចេញពីពន្ធនាគារខេត្តពោធិ៍សាត់ ទីដែលលោកត្រូវបានឃុំខ្លួន។
ក្នុងលិខិតដែលត្រូវបានចែកចាយតាមបណ្តាញសង្គមហ្វេសប៊ុកនោះ លោក ស៊ុន ចន្ធី រៀបរាប់ថា ការចាប់ខ្លួន និងការដាក់ពន្ធនាគាររូបលោកជា«ហេតុផលនយោបាយសុទ្ធសាធ»ដែលធ្វើឡើងក្រោមរូបភាព«បង្ក្រាបយ៉ាងឃោរឃៅ» ដើម្បីបំបាត់សំឡេងប្រឆាំងនៅកម្ពុជា។
ក្នុងលិខិតនោះ លោកបានរៀបរាប់ថា៖ «ខ្ញុំ[លោក ស៊ុន ចន្ធី] បានត្រៀមចិត្ត ត្រៀមកាយ ដោយបានដឹងជាមុនរួចទៅហើយថា នឹងមានគ្រោះថ្នាក់អាក្រក់កើតឡើងលើរូបខ្ញុំ ចាប់តាំងពីថ្ងៃដំបូងនៃការចេញមុខតស៊ូនយោបាយ ដើម្បីបុព្វហេតុ សេរីភាព និងយុត្តិធម៌ ដោយសារផ្លូវឆ្ពោះទៅគោលដៅ សេរីភាព យុត្តិធម៌ និងលទ្ធិប្រជាធិបតេយ្យពិតប្រាកដនៅកម្ពុជា គឺគ្មានក្រាលដោយកម្រាលព្រំផ្កាកូឡាបស្រស់នោះទេ។...ជាមួយគ្នានេះដែរ ខ្ញុំក៏មិនចាំបាច់ប្តឹងជំទាស់ទៅតុលាការគ្រប់ជាន់ថ្នាក់ផ្សេងទៀតឡើយ ដែលនាំឱ្យតុលាការទាំងនោះ ខាតពេលវេលាឥតប្រយោជន៍ ពីព្រោះខ្ញុំបានស្គាល់ច្បាស់ថា តុលាការសព្វថ្ងៃ គឺគ្មានឯករាជ្យ គ្មានយុត្តិធម៌ មហាពុករលួយ និងធ្វើតាមបញ្ជានៃអំណាចរបស់រដ្ឋាភិបាល ដើម្បីធ្វើការបង្ក្រាបយ៉ាងឃោរឃៅបំផុតទៅលើសកម្មជននយោបាយបក្សប្រឆាំង សកម្មជនសិទ្ធិមនុស្ស សកម្មជនសហជីព សកម្មជនបរិស្ថាន សកម្មជនរងគ្រោះដីធ្លី និងប្រព័ន្ធផ្សព្វផ្សាយឯករាជ្យជាដើម...»។
លោក ស៊ុន ចន្ធី ត្រូវបានអាជ្ញាធរក្រុងភ្នំពេញចាប់ខ្លួនកាលពីដើមខែឧសភា ឆ្នាំ២០២៤ នៅក្នុងព្រលានយន្តហោះអន្តរជាតិភ្នំពេញ គ្រាដែលលោកទើបមកពីប្រទេសជប៉ុន។
វីអូអេបានសុំការអត្ថាធិប្បាយពីអ្នកនាំពាក្យរដ្ឋាភិបាល លោក ប៉ែន បូណា តែលោកប្រាប់ឱ្យអ្នកសារព័ត៌មានវីអូអេសួរទៅតុលាការជំនួសវិញ។
វីអូអេមិនទាន់អាចសុំការឆ្លើយតបពី លោក អ៊ី រិន្ទ អ្នកនាំពាក្យតុលាការក្រុងភ្នំពេញបាននៅឡើយទេ។
លោក រ៉ុង ឈុន ទីប្រឹក្សាគណបក្សកម្លាំងជាតិ ប្រាប់វីអូអេថា លិខិតដែលត្រូវបានចែកចាយតាមបណ្តាញសង្គមនោះ ពិតជាសរសេរដោយ លោក ស៊ុន ចន្ធី ពិតប្រាកដមែន។ លោកបន្ថែមថា អ្វីដែល លោក ស៊ុន ចន្ធី មិនប្តឹងទាស់ទៅតុលាការជាន់ខ្ពស់ គឺដោយសារតែករណីភាគច្រើននៅពេលសាលាដំបូងរាជធានីភ្នំពេញចេញសាលក្រមបែបណា គឺតុលាការជាន់ខ្ពស់ ក៏នៅតែរក្សាការសម្រេចរបស់តុលាការជាន់ទាបដដែល ហើយភាគតិចណាស់ដែលតុលាការជាន់ខ្ពស់សម្រេចផ្ទុយពីតុលាការជាន់ទាប។
លោកថ្លែងថា៖ «អ្វីដែលគាត់មិនប្តឹងទាស់ទៅតុលាការគ្រប់ជាន់ថ្នាក់ដែលគាត់អះអាងនៅក្នុងលិខិតរបស់គាត់ ដោយសារគាត់មើលឃើញថាប្រព័ន្ធតុលាការ ដែលគាត់បង្ហាញការមិនទុកចិត្តពីព្រោះគាត់មើលឃើញថាថ្នាក់ក្រោម ក៏ដូចជាថ្នាក់លើ អ៊ីចឹងបើថ្នាក់ក្រោមសម្រេចម៉េចហើយ អាហ្នឹងថ្នាក់លើក៏សម្រេច គេហៅថារក្សាការសម្រេចរបស់ថ្នាក់ក្រោម»។
លោក រ៉ុង ឈុន មិនទាន់អាចបញ្ជាក់ថាតើ លោក ស៊ុន ចន្ធី នឹងឈប់ធ្វើនយោបាយទាំងស្រុង ឬយ៉ាងណានោះទេ ខណៈ លោក ស៊ុន ចន្ធី បានសម្រេចផ្ទេរសិទ្ធិឱ្យគណបក្ស រៀបចំសមាជដើម្បីជ្រើសរើសប្រធានគណបក្សថ្មី ជំនួសរូបលោក។
លោក រ៉ុង ឈុន បន្ថែមថា បើសិនជាមានដំណោះស្រាយនយោបាយណាមួយ នោះលោក ស៊ុន ចន្ធី នឹងទទួលបានសិទ្ធិបោះឆ្នោត និងសិទ្ធិឈរឈ្មោះឱ្យគេបោះឆ្នោតឡើងវិញ៕
វេទិកាបញ្ចេញមតិ