លោក ប៉ុល ទិត្យធានី អាយុ៤៩ឆ្នាំ ត្រូវចាប់និងឃុំខ្លួនបណ្តោះអាសន្ននៅថ្ងៃសុក្រនេះ ក្នុងស្រុកកំពង់ត្រឡាច ខេត្តកំពង់ឆ្នាំង ក្រោមបទចោទថា លោកធ្វើសកម្មភាពផ្តល់សេវាសុខាភិបាលខុសច្បាប់។ នេះបើយោងតាមការបញ្ជាក់របស់មន្ត្រីសិទ្ធិមនុស្ស និងសមាជិកគ្រួសាររបស់លោក។
អតីតហិរញ្ញិករបស់អតីតគណបក្សសង្គ្រោះជាតិប្រចាំខេត្តកំពង់ឆ្នាំងរូបនេះត្រូវចាប់ឃាត់ខ្លួន និងឃុំខ្លួនបណ្តោះអាសន្ន ស្របពេលដែលសាលាដំបូងខេត្តបាត់ដំបងបានកោះហៅអតីតសកម្មជននយោបាយរបស់អតីតគណបក្សសង្គ្រោះជាតិយ៉ាងហោចណាស់ចំនួន ៣៥ នាក់ឲ្យចូលបំភ្លឺតុលាការទាក់ទងនឹងការបំពានសេចក្តីសម្រេចរំលាយគណបក្សសង្គ្រោះជាតិដោយតុលាការកំពូល រីឯនៅខេត្តកំពង់ធំ ក្រុមនគរបាលបានកោះហៅអតីតមន្ត្រីគណបក្សនេះយ៉ាងហោចណាស់ចំនួន ៣៥ នាក់ផងដែរ។
លោកប៉ុល ទិត្យធានី ត្រូវបានកម្លាំងមានសមត្ថកិច្ចចាប់ខ្លួននៅឯកន្លែងលក់ដូររបស់ភរិយាលោកក្នុងផ្សារតាជេស ក្នុងឃុំតាជេស ខេត្តកំពង់ឆ្នាំង។ ក្រោយការចាប់ខ្លួននោះ លោកត្រូវបានបញ្ជូនទៅឃុំនៅពន្ធនាគារខេត្តកំពង់ឆ្នាំង។
លោកសំ ចន្ទគា មន្ត្រីឃ្លាំមើលសិទ្ធិមនុស្សរបស់សមាគមការពារសិទ្ធិមនុស្សអាដហុក (Adhoc) នៅខេត្តកំពង់ឆ្នាំង បានប្រាប់ VOA ថា កម្លាំងមានសមត្ថកិច្ចមិនបានបង្ហាញដីកាចាប់ខ្លួនលោក ប៉ុល ទិត្យធានី ដែលជាមនុស្សសំខាន់ម្នាក់ក្នុងជួរអតីតគណបក្សសង្គ្រោះជាតិនៅខេត្តកំពង់ឆ្នាំងនោះទេ។
មន្ត្រីសិទ្ធិមនុស្សរូបនេះមិនទាន់សន្និដ្ឋានបានថា ការចាប់ខ្លួននេះមានជាប់ពាក់ព័ន្ធនឹងហេតុផលនយោបាយ ឬយ៉ាងណានោះទេ ដោយសារមិនទាន់មានការអង្កេតច្បាស់លាស់។
«ជាទស្សនៈរបស់ខ្ញុំ បើរឿងនេះពាក់ព័ន្ធនឹងរឿងនយោបាយ ខ្ញុំគិតថា រដ្ឋាភិបាលគួរតែប្តូរយុទ្ធសាស្ត្រទៅវិញទៅ ហើយមកធ្វើល្អ ធ្វើឲ្យសង្គមកម្ពុជានេះ មានយុត្តិធម៌សង្គមឲ្យបានច្រើន បញ្ចៀសការលាបពណ៌ បញ្ចៀសការរើសអើងឲ្យពលរដ្ឋហ្នឹងចេះអធ្យាស្រ័យ ចេះស្រឡាញ់គ្នា ចេះអភិវឌ្ឍរួមគ្នា អភិវឌ្ឍអាហ្នឹងទើបមានសន្តិសុខ សនិ្តភាពពិតប្រាកដ»។
បណ្តាញព័ត៌មាននានាក្នុងស្រុកបានរាយការណ៍ដោយភ្ជាប់ជាមួយដីកាបញ្ជាឲ្យលោក ប៉ុល ទិត្យធានី ចូលខ្លួន។ ដីកានេះចេញដោយអយ្យកាអមសាលាដំបូងខេត្តកំពង់ឆ្នាំង។
តាមដីការបស់ព្រះរាជអាជ្ញា ទី មុនិន្ទ នៃសាលាដំបូងខេត្តកំពង់ឆ្នាំង លោកប៉ុល ទិត្យធានី ត្រូវបានចោទពីបទរំលោភច្បាប់ស្តីពីការគ្រប់គ្រងអ្នកប្រកបវិជ្ជាជីវៈសុខាភិបាល។ ដីកាដដែលបានតម្រូវឲ្យលោកប៉ុល ទិត្យធានី ដែលជាគ្រូបង្រៀននៅវិទ្យាល័យអគ្គធម្មពោធិ៍សាល ជា ស៊ីម កំពង់ត្រឡាច ចូលខ្លួននៅថ្ងៃទី ១៤ ខែមិថុនា ឆ្នាំ ២០១៩។ ប៉ុន្តែការចាប់ខ្លួនបានកើតឡើងមុនកាលកំណត់។
VOA មិនទាន់អាចសុំការអធិប្បាយពីលោកឈួរ ច័ន្ទឌឿន អភិបាលខេត្តកំពង់ឆ្នាំងបានទេ នៅថ្ងៃសុក្រនេះ។
អ្នកស្រី ហៃ ធារី វ័យ៥១ឆ្នាំ ភរិយាលោកប៉ុល ទិត្យធានី មានប្រសាសន៍ថា ស្វាមីអ្នកស្រីធ្លាប់បានទទួលការបណ្តុះបណ្តាលជំនាញពេទ្យយោធារយៈពេល ១៨ ខែតែអ្នកស្រីថា មុខរបរពេទ្យនេះមិនមែនជាអាជីពសំខាន់របស់ស្វាមីអ្នកស្រីនោះទេ។
អ្នកស្រីមិនទាន់ដឹងពីមូលហេតុផ្សេងទៀតនៃការចាប់ខ្លួនស្វាមីអ្នកស្រីទេ គឺគ្រាន់តែដឹងថា មានការចោទប្រកាន់ថា ស្វាមីអ្នកស្រីបានរំលោភលើការប្រកបវិជ្ជាជីវៈសុខាភិបាល។ យ៉ាងណាក្តី ក្រោយការចាប់ឃុំខ្លួនស្វាមីអ្នកស្រី អ្នកស្រីត្រូវបានមន្ត្រីតុលាការ និងប៉ូលិសប្រាប់ថា ស្វាមីអ្នកស្រីមិនចេះឱនលំទោនក្នុងនយោបាយ។
«គេនិយាយចោទយើងថា យើងនឹងធ្វើនយោបាយ ចង់និយាយថា យើងនឹងមិនឲ្យលំទោនជាមួយគេ»។
អ្នកស្រីហៃ ធារី បានឲ្យដឹងទៀតថា មុនពេលដែលស្វាមីអ្នកស្រីត្រូវចាប់ខ្លួននោះ ស្វាមីអ្នកស្រីត្រូវបានគណបក្សកាន់អំណាចព្យាយាមបញ្ចុះបញ្ចូលឲ្យចាកចេញពីគណបក្សប្រឆាំងជាច្រើនដងមកហើយ ដើម្បីចូលរួមជាមួយនឹងគណបក្សកាន់អំណាច។
លោកកែវ ថៃ អតីតប្រធានគណៈកម្មាធិការប្រតិបត្តិគណបក្សសង្គ្រោះជាតិ ប្រចាំខេត្តកំពង់ឆ្នាំង លើកឡើងថា ការចាប់ខ្លួនលោកប៉ុល ទិត្យធានី នេះបានធ្វើឲ្យអតីតមន្ត្រីសំខាន់មួយចំនួនទៀតរបស់គណបក្សប្រឆាំងនៅខេត្តកំពង់ឆ្នាំង មានការភិតភ័យ ហើយសូម្បីតែខ្លួនលោកផ្ទាល់ក៏អាចក្លាយជាគោលដៅនៃការចាប់ខ្លួនបន្ទាប់ទៀតដែរ៕
