ទោះបីជាសាលារាជធានីភ្នំពេញ ព្រមានមិនឲ្យមានការប្រមូលផ្តុំ ក្រោយពីមានកិច្ចប្រជុំដោះស្រាយវិវាទកាលពីថ្ងៃអង្គារ កម្មករនិយោជិតរាប់សិបនាក់ នៅបន្តធ្វើបាតុកម្មតវ៉ាទាមទារឲ្យមានដំណោះស្រាយលើវិវាទការងារជាមួយក្រុមហ៊ុន ណាហ្គាវើលដ៍ ដែលមានប្រតិបត្តិការកាស៊ីណូនៅប្រទេសកម្ពុជា។
បើតាមសេចក្តីប្រកាសព័ត៌មានរបស់សាលារាជធានីភ្នំពេញ ចុះកាលពីថ្ងៃទី២១ ខែធ្នូនេះ តំណាងសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ត្រូវផ្សព្វផ្សាយពីស្មារតីនៃកិច្ចប្រជុំចុងក្រោយនេះដល់កម្មករនិយោជិត «ឲ្យរំសាយការប្រមូលផ្តុំជាដាច់ខាត» ដើម្បីទុកពេលដោះស្រាយជាមួយអាជ្ញាធរ។ ហើយការរំសាយនេះ គឺទុកលទ្ធភាពឲ្យកម្មករនិយោជិតជាអ្នកសម្រេចចិត្ត។
ប៉ុន្តែនៅថ្ងៃពុធនេះ កម្មករមួយចំនួនបានថ្លែងក្នុងពេលធ្វើបាតកម្មនៅមុខកាស៊ីណូណាហ្គាវើលដ៍ថា ពួកគេមិនអាចបញ្ឈប់ការតវ៉ាបានទេ ល្គឹកណាពួកគេមិនបានដំណោះស្រាយ ស្របតាមការទាមទាររបស់ពួកគេរយៈពេលជិតមួយឆ្នាំមកនេះ។
កញ្ញា ម៉ឺន សៀកហៀង អតីតបុគ្គលិកផ្នែកកាស៊ីណូប្រចាំក្រុមហ៊ុនណាហ្គាវើលដ៍អស់រយៈពេលពីរឆ្នាំមកនេះ និងជាអ្នកចូលរួមបាតុកម្មខាងមុខក្រុមហ៊ុនណាហ្គាវើលដ៍ដែលស្ថិតនៅក្បែររដ្ឋសភាជាតិ បានប្រាប់វីអូអេថា កញ្ញា និងបាតុករដទៃ នឹងមិនបញ្ឈប់ការតវ៉ានោះទេ ប្រសិនបើមិនទទួលបានដំណោះស្រាយសមស្រប។
«បើក្រុមហ៊ុនអត់ព្រមដោះស្រាយឲ្យពួកខ្ញុំទេ ពួកខ្ញុំនៅតែបន្តការតវ៉ាអញ្ចឹង។ រហូតដល់ក្រុមហ៊ុនចេញមុខដោះស្រាយ»។
ក្នុងពេលធ្វើបាតុកម្មជុំទីប្រាំនៅថ្ងៃពុធនេះ បាតុករមួយចំនួន បានលើកបដា ដែលបង្ហាញ ការទាមទារឲ្យក្រុមហ៊ុនណាហ្គាវើលដ៍ត្រូវទទួលយកបុគ្គលិក៣៦៥នាក់ឲ្យបានចូលធ្វើការវិញ និងថា ក្រុមហ៊ុនណាហ្គាវើលដ៍ ត្រូវផ្តល់ប្រាក់ឈ្នួលស្មើៗគ្នាដល់បុគ្គលិកក្នុងស្រុកធៀបនឹងបុគ្គលិកបរទេស។
បាតុករមួយរូបទៀត គឺអ្នកស្រី ចាន់ សេរីសួគ៌ អាយុ ៣១ឆ្នាំ អតីតបុគ្គលិកផ្នែកសម្អាតសណ្ឋាគារប្រចាំក្រុមហ៊ុនណាហ្គាវើលដ៍អស់រយៈពេល ៧ឆ្នាំ បានរក្សាជំហរបន្តតវ៉ា ស្របពេលបង្ហាញពីការលំបាកមួយចំនួន បន្ទាប់ពីអ្នកស្រីបានបាត់បង់ការងារ។
«ច៎ា អស់រយៈពេល ៨ខែហើយដែលក្រសួងអត់ព្រមមកចរចាជាមួយសហជីព និងជាមួយក្រុមហ៊ុន។ ខ្ញុំមានទុក្ខលំបាកណាស់បង ធនាគារ ហើយនៅកូនតូច កូនខ្ញុំទើបបានតែមួយខួប។ គាត់បៅទឹកដោះគោបង។ រយៈពេល ៨ខែជាងដែលក្រុមហ៊ុនបញ្ឈប់យើងហ្នឹងគឺ ខ្ញុំមានផលលំបាកខ្លាំងមកបង ពីព្រោះអីនៅបន្ទុកកូនខ្ចីនៅឡើយ»។
បើតាមសេចក្តីប្រកាសព័ត៌មានដដែលរបស់សាលារាជធានីភ្នំពេញ ក្នុងពេលមានការប្រជុំរវាងភាគីពាក់ព័ន្ធរកច្រកបញ្ចប់វិវាទការងារនៅក្រុមហ៊ុនណាហ្គាវើលដ៍នោះ កម្មករនិយោជិត«ពុំបានរំសាយការប្រមូលផ្តុំគ្នាធ្វើការសម្តែងមតិដោយខុសច្បាប់តាមការស្នើសុំរបស់រដ្ឋបាលរាជធានីភ្នំពេញ ហើយបង្កឲ្យប៉ះពាល់ដល់សន្តិសុខ សណ្តាប់ធ្នាប់ និងរបៀបរៀបរយសាធារណៈ»។
អភិបាលរងរាជធានីភ្នំពេញលោក កើត ឆែ បានប្រាប់វីអូអេនៅថ្ងៃពុធនេះថា លោកសុំបង្វែរសំនួរពាក់ព័ន្ធនឹងការបន្តធ្វើបាតុកម្មទៅកាន់សហជីពតំណាងឲ្យកម្មករនយោជិត និងថា រដ្ឋបាលរាជធានីភ្នំពេញ នឹងបន្តប្រើវិធានការអប់រំក្នុងករណីមានបាតុកម្មបន្តទៅពេលខាងមុខពីសំណាក់កម្មករនយោជិតក្រុមហ៊ុនណាហ្គាវើលដ៍។
លោកបានថ្លែងថា៖ «នេះជាការងារដែល បើសិនជាសាលារាជធានីភ្នំពេញចង់ចាប់ខ្លួន យើងចាប់ខ្លួនតាំងពីដើមទីមកហើយ។ មិនមែនអញ្ចឹងទេ។ អញ្ចឹងប្អូនឯងមើលទៅ ច្បាប់ស្តីពីបាតុកម្មដោយសន្តិវិធីតើវិធានការច្បាប់ដែលត្រូវអនុវត្តមានអ្វីខ្លះ។ អញ្ចឹងរដ្ឋបាលរាជធានីភ្នំពេញមិនចេះប៉ះដៃយកដៃ យកជើងប៉ះជើងនោះទេ។ គឺយើងប្រើវិធានការអប់រំទាំងអស់។ អញ្ចឹងមកដល់ឥឡូវនេះ យើងប្រើវិធានការអប់រំដដែល»។
យ៉ាងណាក៏ដោយ លទ្ធផលប្រជុំនៅសាលារាជធានីភ្នំពេញកាលពីថ្ងៃអង្គារ បានបង្ហាញថា តំណាងសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានយល់ព្រមធ្វើបញ្ជីឈ្មោះកម្មករនិយោជិតចំនួន៣៦៥នាក់ ដោយមានការបែងចែកជាពីរ គឺ«យល់ព្រមទទួលយកសំណង ដើម្បីបញ្ឈប់ពីការងារ ប៉ុន្តែស្នើសុំគោលការណ៍ទូទាត់ ឲ្យបានត្រឹមត្រូវស្របតាមច្បាប់ស្តីពីការងារ» និង«អ្នកស្នើសុំចូលបម្រើការងារវិញ»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍និងជាតំណាងភាគីចរចាមួយរូប កញ្ញា ឈឹម ស៊ីថរ បាននិយាយថា កម្មករនិយោជិតនឹងបន្តការធ្វើកូដកម្មដោយសន្តិវិធី ស្របពេលកំពុងស្វះសែ្វងរកដំណោះស្រាយលើវិវាទជាមួយនឹងក្រុមហ៊ុនណាហ្គាវើលដ៍។
«បើសិនជាសាលារាជធានីភ្នំពេញយល់ឃើញថា ជាបាតុកម្មខុសច្បាប់។ លោកពិចារណាតាមគតិតាមមនសិការត្រឹមត្រូវទៅ ចាត់វិធានការដែលសមគួរនឹងចាត់វិធានការចុះ។ ដោយឡែកខាងកម្មករនិយោជិតគាត់បញ្ជាក់គោលជំហរដដែលថា នេះជាការធ្វើកូដកម្មដោយសន្តិវិធី»។
មេដឹកនាំសហជីពរូបនេះ បន្ថែមថា ការដោះស្រាយវិវាទការងារដែលផ្តើមចេញពីការបញ្ឈប់បុគ្គលិកជាង១៣០០នាក់នោះ មិនអាចធ្វើសម្រេចបានឆាប់ៗទេ ដោយលើកហេតុផលថា ក្រោយពីកិច្ចប្រជុំកាលពីថ្ងៃអង្គារនោះ កិច្ចប្រជុំបានត្រឹមផ្តោតតែមួយចំណុចប៉ុណ្ណោះ ពាក់ព័ន្ធនឹងបុគ្គលិកចំនួន៣៦៥នាក់ ដែលកំពុងទាមទារឲ្យបានត្រឡប់ចូលធ្វើការវិញ៕
