អ្នកតវ៉ាដែលជាអតីតបុគ្គលិក និងបុគ្គលិកណាហ្គាវើលដ៍ (NagaWorld) ប្រមាណ៥០នាក់នៅថ្ងៃច័ន្ទនេះបានដាក់ញត្តិទៅស្ថានទូតបរទេសមួយចំនួនដើម្បីសុំអន្តរាគមន៍ឲ្យជួយដោះលែងតំណាងសហជីព៨នាក់ដែលត្រូវបានចាប់ខ្លួននិងឃ្លាំមើលការតវ៉ារបស់ពួកគេ។
កាលពីព្រឹកថ្ងៃច័ន្ទ ពួកគេបានប្រមូលផ្តុំនៅខាងមុខស្ថានទូតអាមេរិកហើយបន្ទាប់មកធ្វើដំណើរទៅស្ថានទូតបារាំងនិងអង់គ្លេស។ ពួកគេមានគម្រោងដាក់ញត្តិទៅអង្គទូតបរទេសចំនួន១៤ក្នុងនោះមានស្ថានទូតកាណាដាអឺរ៉ុបអាល្លឺម៉ង់អូស្រ្តាលីជប៉ុននិងកូរ៉េជាដើម។
ក្នុងញត្តិដែលវីអូអេទទួលបាន បុគ្គលិកដែលបានចូលរួមតវ៉ាកាលពីពេលកន្លងមកលើកឡើងថាពួកគេបានតវ៉ាចាប់តាំងពីថ្ងៃទី១៨ខែធ្នូឆ្នាំ២០២១ដើម្បីទាមទារឲ្យទទួលយកកម្មករចូលធ្វើការវិញក្នុងនោះមានតំណាងសហជីពទាំងមូលផងដែរ។ ពួកគេបានចោទថាក្រុមហ៊ុនណាហ្គាវើលដ៍ជាបន្តបន្ទាប់បានបដិសេធការស្វែងរកដំណោះស្រាយតាមរយៈ«ការចរចាដោយស្មោះត្រង់»ជាមួយតំណាងរបស់ពួកគេ។ ពួកគេបញ្ជាក់ថា ក្រសួងការងារក៏បានឲ្យដឹងថានឹងមិនមានការដោះស្រាយណាមួយដើម្បីឲ្យកម្មករចូលធ្វើការបានវិញឡើយ។
បើតាមញត្តិនោះពួកគេធ្វើកូដកម្មដោយសន្តិវិធីនិងស្របតាមនីតិវិធីច្បាប់នានា ប៉ុន្តែតំណាង៨នាក់បែរជាត្រូវបានចាប់ខ្លួននិងចោទប្រកាន់ពីបទញុះញង់បង្កភាពវឹកវរអសន្តិសុខសង្គមទៅវិញ។ ពួកគេអំពាវនាវឲ្យអង្គទូតទាំងនោះលើកឡើងអំពីករណីរបស់ពួកគេនៅក្នុងកិច្ចប្រជុំជាន់ខ្ពស់ជាមួយរដ្ឋាភិបាលកម្ពុជា។
ពួកគេក៏អំពាវនាវឲ្យទូតបរទេសទាំងនោះរក្សានូវជំហរខ្លាំងក្លាមួយក្នុងការជំរុញឲ្យរដ្ឋាភិបាលគោរពសិទ្ធិមនុស្សនិងសិទ្ធិការងារក៏ដូចជាគោរពនូវកតិកាសញ្ញារបស់អង្គការអន្តរជាតិខាងការងារ(ILO)ផងដែរ។
អ្នកស្រី អ៊ុក សុភ័ក្រម៉ូលីកា អាយុ៣៤ឆ្នាំដែលជាអ្នកគ្រប់គ្រងផ្នែកបេឡានៅក្រុមហ៊ុនណាហ្គាវើលដ៍ប្រមាណ១៣ឆ្នាំមកហើយ ថ្លែងក្នុងពេលដាក់ញត្តិថាការតវ៉ារបស់បុគ្គលិកគឺជាវិវាទការងារសុទ្ធសាធដូច្នេះមិនគួរមានការលាបពណ៌និងចោទប្រកាន់ថ្នាក់ដឹកនាំថាពួកគេញុះញង់ឡើយ។
អ្នកស្រីថ្លែងថា៖«ឲ្យគាត់ជួយដោះស្រាយហើយនឹងពន្លឿននូវការដោះលែងពួកគាត់ទាំង៨នាក់ចេញមកវិញហើយនឹងដោះស្រាយឲ្យពួកខ្ញុំបុគ្គលិកកម្មករទាំងអស់ដែលពួកខ្ញុំគ្រាន់តែទាមទារសិទ្ធិការងារនៅកន្លែងធ្វើការ…។អ៊ីចឹងសូមឲ្យអង្គទូតទាំងអស់ជួយពិនិត្យមើលឡើងវិញនូវនីតិវិធីដែលពួកខ្ញុំដើរនៅក្នុងស្រុកនេះអស់ហើយតែនៅតែអត់មានដំណោះស្រាយដល់ពួកខ្ញុំដែលជាបុគ្គលិកកម្មករខ្មែរហ្នឹងទេ»។
អ្នកស្រីចោទក្រុមហ៊ុនណាហ្គាវើលដ៍ថាមានបំណងបំបាត់មិនឲ្យមានសហជីពនៅក្រុមហ៊ុនកាស៊ីណូមួយនេះ។
អ្នកស្រីបានបន្ថែមថា៖ «ហើយអ្វីដែលពួកខ្ញុំចង់បាននៅកន្លែងការងារគឺមិនមែនតែរឿងគុណលុយផ្តាច់កិច្ចសន្យាការងារគឺខ្ញុំត្រូវការក្រុមហ៊ុនណាហ្គាវើលដ៍ហ្នឹងទទួលស្គាល់តំណាងសហជីពរបស់ខ្ញុំហើយសហជីពរបស់ខ្ញុំដែលជាសហជីពឯករាជ្យហ្នឹងមានវត្តមាននៅក្នុងក្រុមហ៊ុនមួយហ្នឹង»។
អ្នកស្រីក៏អំពាវនាវឲ្យអង្គទូតនានាជួយសួរសុខទុក្ខរបស់តំណាងសហជីពដែលកំពុងជាប់ពន្ធនាគារផងដែរ។
ស្ថានទូតបារាំងបញ្ជាក់ថាស្ថានទូតបានទទួលញត្តិនោះហើយហើយ«ស្ថានទូតបារាំងបានតាមដានការធ្វើកូដកម្មនៅក្រុមហ៊ុនកាស៊ីណូនេះយ៉ាងដិតដល់។ដូចដៃគូសហភាពអឺរ៉ុបផ្សេងទៀតដែរប្រទេសបារាំងចាត់ទុកថាសេរីភាពធ្វើបាតុកម្មដោយសន្តិវិធីគឺជាសេរីភាពដ៏សំខាន់»។
វីអូអេមិនទាន់អាចទាក់ទងសុំការអត្ថាធិប្បាយពីស្ថានទូតអង់គ្លេសប្រចាំនៅកម្ពុជាបាននៅឡើយ។
បុគ្គលិកណាហ្គាវើលដ៍ដែលចូលរួមដាក់ញតិ្តកាលពីព្រឹកថ្ងៃច័ន្ទបានហាមមិនឲ្យបុគ្គលណាដែលមិនមានបណ្ណសម្គាល់ខ្លួនជាអ្នកសារព័ត៌មានចូលថតរូបឬវីដេអូដោយមិនមានការអនុញ្ញាតទេដោយសារកន្លងទៅការតវ៉ារបស់ពួកគេត្រូវបានជនមួយចំនួនមកថតរូបនិងវីដេអូមកលើពួកគេ។ យ៉ាងណាក្តីនៅពេលផ្តល់បទសម្ភាសន៍អ្នកសារព័ត៌មាននៅសួនច្បារខាងមុខស្ថានទូតសហរដ្ឋអាមេរិក គេឃើញមានការប៉ះសម្តីគ្នារវាងអ្នកតវ៉ានិងបុគ្គលមួយរូបដែលមិនមានកាតអ្នកសារព័ត៌មានហើយបានចូលមកថតរូប និងវីដេអូ។
យោងតាមអ្នកស្រី អ៊ុក សុភ័ក្រម៉ូលីកា ស្របពេលមានការដាក់ញត្តិទៅកាន់ស្ថានទូតបរទេសជាបន្តបន្ទាប់ក្រុមបុគ្គលិកណាហ្គាវើលដ៍នឹងនៅតែបន្តធ្វើកូដកម្មនៅផ្លូវខាងមុខរដ្ឋសភារហូតដល់មានការដោះលែងសហជីពដែលត្រូវបានចាប់ខ្លួននិងដំណោះស្រាយសមស្របដែលអាចទទួលបាន។
អ្នកនាំពាក្យក្រសួងការងារលោកហេង សួរបានឆ្លើយតបនឹងសំណួររបស់វីអូអេតាមរយៈសារតាមបណ្តាញទំនាក់ទំនង Whatsapp នៅថ្ងៃច័ន្ទនេះថាលោកសុំមិនធ្វើអត្ថាធិប្បាយលើសកម្មភាពដាក់ញត្តិនោះទេដោយសារមិនមានពាក់ព័ន្ធនឹងច្បាប់ការងារ។ លោកបញ្ជាក់ថារាល់វិវាទនៅប្រទេសណាក៏ដោយគឺតែងតែមានច្បាប់និងនីតិវិធីដោះស្រាយករណីវិវាទនោះ។
លោកបន្តថាវិវាទការងារជាមួយក្រុមហ៊ុនណាហ្គានេះអាចបញ្ចប់ពេលណាគឺអាស្រ័យលើ«ឆន្ទៈ»របស់កូដករនិងលើកឡើងថា ក្រសួងអាចធ្វើជាអ្នកសម្របសម្រួលឬអ្នកនាំពាក្យពីភាគីម្ខាងទៅភាគីម្ខាងតែប៉ុណ្ណោះប៉ុន្តែការយោគយល់អធ្យាស្រ័យឬលទ្ធភាពឆ្លើយតបគឺអាស្រ័យលើភាគីពាក់ព័ន្ធនីមួយៗ។
វីអូអេមិនទាន់អាចសុំការអធិប្បាយពីលោក Hein Dames នាយកគ្រប់គ្រងផ្នែកធនធានមនុស្សប្រចាំក្រុមហ៊ុនណាហ្គាវើលដ៍បានទេនៅថ្ងៃច័ន្ទនេះ។
កាលពីពេលកន្លងទៅកូដករនៅក្រុមហ៊ុនណាហ្គាវើលដ៍ (NagaWorld) បានច្រានចោលការកោះហៅរបស់ក្រសួងការងារឲ្យជួបចរចាដោះស្រាយវិវាទការងាររ៉ាំរ៉ៃរយៈពេលជិត៩ខែដោយលើកហេតុផលថាពួកគេមិនមានថ្នាក់ដឹកនាំសហជីពដែលបានទទួលការទុកចិត្តពីកម្មករនិយោជិតនៅក្រុមហ៊ុនឲ្យធ្វើជាអ្នកចរចាបញ្ចប់វិវាទនោះទេ។
កម្មករនិយោជិតនិងតំណាងសហជីពនៅក្រុមហ៊ុនណាហ្គាវើលដ៍បានចាប់ផ្តើមមានទំនាស់ជាមួយក្រុមហ៊ុនកាលពីចុងខែមេសាឆ្នាំ២០២១ពោលគឺនៅពេលកម្មករនិយោជិតជាង១.៣០០នាក់ត្រូវបានបញ្ឈប់ពីការងារហើយបុគ្គលិកអះអាងថាក្រុមហ៊ុនមិនផ្តល់ប្រាក់អត្ថប្រយោជន៍ផ្សេងៗដូចជាប្រាក់អតីតភាពការងារ។
ក្រុមហ៊ុនត្រូវតំណាងសហជីពចោទថាមានចេតនាបំបាត់សំឡេងតំណាងបុគ្គលិកដោយសារក្រុមហ៊ុនមិនព្រមបើកផ្លូវឱ្យថ្នាក់ដឹកនាំនិងតំណាងសហជីពនិងបុគ្គលិកចំនួន៣៦៥នាក់នៅក្រុមហ៊ុនបានវិលត្រឡប់មកកន្លែងការងារវិញ៕
