ក្រសួងមហាផ្ទៃណែនាំនិងព្រមានចាត់វិធានការផ្លូវច្បាប់លើអ្នកផលិតរូបភាព វីដេអូ និងមាតិកាដែលផ្សព្វផ្សាយល្បែងស៊ីសងគ្រប់ប្រភេទដែលធ្វើឱ្យប៉ះពាល់ដល់សន្ដិសុខ សណ្ដាប់ធ្នាប់សាធារណៈ និងសុវត្ថិភាពសង្គម។ នេះបើយោងតាមសារាចរណែនាំចុះផ្សាយនៅថ្ងៃពុធនេះ។
សារាចរណែនាំស្ដីពី«ការបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់»របស់ ក្រសួងមហាផ្ទៃលើកឡើងថា បណ្ដាញទំនាក់ទំនងសង្គម និងប្រព័ន្ធផ្សព្វផ្សាយមួយចំនួនបានផលិតនិងផ្សាយរូបភាព វីដេអូ និងមាតិកាល្បែងស៊ីសងខុសច្បាប់ដើម្បីអូសទាញប្រជាពលរដ្ឋឲ្យចូលលេងដោយផ្ទាល់ និងតាមប្រព័ន្ធអនឡាញ។
សារាចរណែនាំដដែលបានឲ្យដឹងក្នុងន័យដើមថា៖ «នៅក្នុងសកម្មភាពផ្សព្វផ្សាយ និងចែករំលែកបន្ត (Share) អំពីល្បែងស៊ីសងខុសច្បាប់ទាំងនេះ ក៏មានការចូលរួមពីបុគ្គលមានប្រជាប្រិយភាព និងអ្នកផលិតមាតិកាសង្គមមួយចំនួនផងដែរ ដែលជាហេតុធ្វើឲ្យសាធារណជនមានការភាន់ច្រឡំ ហើយបន្តចែកចាយរូបភាព វីដេអូ និងមាតិកាទាំងនោះ ធ្វើឲ្យប៉ះពាល់យ៉ាងធ្ងន់ធ្ងរដល់សន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម»។
សារាចរណែនាំនោះបន្ថែមថា ដើម្បីពង្រឹងការអនុវត្ដច្បាប់ និងសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ក្រសួងមហាផ្ទៃណែនាំឲ្យបញ្ឈប់រាល់ការផលិត និងចែកចាយរូបភាព វីដេអូ មាតិកា គេហទំព័រ គណនី ឬទំព័រក្នុងបណ្តាញសង្គមដែលមានខ្លឹមសារពាក់ព័ន្ធនឹងល្បែងស៊ីសងខុសច្បាប់ ទាំងផ្ទាល់ និងអនឡាញ។
ក្រសួងមហាផ្ទៃណែនាំឲ្យអាជ្ញាធរ និងអ្នកពាក់ព័ន្ធទាំងអស់ ត្រូវជំរុញការផ្សព្វផ្សាយ និងត្រូវចាត់វិធានការតឹងរ៉ឹងក្នុងការតាមដាន និងហាមឃាត់ការបង្កើត និងផ្សព្វផ្សាយរូបភាព និងខ្លឹមសារពាក់ព័ន្ធនឹងល្បែងស៊ីសងខុសច្បាប់គ្រប់ប្រភេទ។ ក្រសួងមហាផ្ទៃក៏នឹងចាត់វិធានការផ្លូវច្បាប់ចំពោះបុគ្គលណាដែលនៅតែបន្តប្រព្រឹត្ដសកម្មភាពដូចបានណែនាំ៕
វេទិកាបញ្ចេញមតិ