រដ្ឋាភិបាលឥណ្ឌូណេស៊ី កាលពីពេលថ្មីៗនេះ បានប្រកាសបិទគេហទំព័រនិងតំណភ្ជាប់នានាដែលអាចឱ្យប្រជាជនចូលលេងល្បែងអនឡាញបាន ដោយក្នុងនោះមានទាំងគេហទំព័រចេញពីប្រទេសកម្ពុជា។ នេះបើតាមសារព័ត៌មាន Bloomberg ចេញផ្សាយកាលពីថ្ងៃចន្ទ ដែលបានដកស្រង់សម្តីរបស់រដ្ឋមន្រ្តីក្រសួងទូរគមនាគមន៍ឥណ្ឌូណេស៊ី ដែលបានបញ្ជាឱ្យអ្នកផ្គត់ផ្គង់សេវាអ៊ីនធឺណិតទាំងអស់បិទខ្ទប់តំណភ្ជាប់នានា ដែលអាចចូលទៅលេងល្បែងបាន។
ការប្រកាសរបស់រដ្ឋាភិបាលឥណ្ឌូណេស៊ី ធ្វើឡើងបន្ទាប់ពីពួកគេព្រួយបារម្ភកាន់តែខ្លាំងអំពីការរីករាលដាលនៃល្បែងអនឡាញ ជាពិសេសករណីឧក្រិដ្ឋកម្ម និងការធ្វើអត្តឃាតខ្ពស់ដែលបណ្តាលមកពីការញៀនល្បែង និងការជំពាក់បំណុលក្នុងចំណោមប្រជាជនឥណ្ឌូណេស៊ី។
បើតាមសារព័ត៌មាន Bloomberg អាជ្ញាធរឥណ្ឌូណេស៊ីបានកាត់ផ្តាច់ការប្រើប្រាស់គេហទំព័រដែលប្រតិបត្តិការចេញពីប្រទេសកម្ពុជានិងពីទីក្រុង Davao នៃប្រទេសហ្វីលីពីន ដែលសង្ស័យមានទំនាក់ទំនងនឹងល្បែងស៊ីសងតាមអ៊ីនធឺណិត។
មកដល់បច្ចុប្បន្ននេះ អាជ្ញាធរឥណ្ឌូណេស៊ីបានបិទគេហទំព័រខុសច្បាប់ប្រមាណជា ២ លាន។ នេះបើតាមការចុះផ្សាយរបស់សារព័ត៌មាន។
អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជា លោក រស់ ភីរុណ ប្រាប់វីអូអេនៅថ្ងៃពុធនេះថា លោកបានទទួលព័ត៌មានពាក់ព័ន្ធនឹងការបិទគេហទំព័រដែលភ្ជាប់ទៅល្បែងអនឡាញនៅប្រទេសឥណ្ឌូណេស៊ី ហើយលោកថា អាជ្ញាធរកម្ពុជាកំពុងតាមដានដោយយកចិត្តទុកដាក់ចំពោះគេហទំព័រល្បែង ដែលប្រតិបត្តិការក្នុងប្រទេសកម្ពុជាផងដែរ។
លោកថ្លែងថា៖ «បច្ចុប្បន្ននេះ គ.ល.ក [គណៈកម្មការគ្រប់គ្រងល្បែងពាណិជ្ជកម្មកម្ពុជា]មិនទាន់ផ្តល់ការអនុញ្ញាតដល់ប្រតិបត្តិករល្បែងពាណិជ្ជកម្មណាមួយ ឱ្យធ្វើការផ្សាយពាណិជ្ជកម្មអំពីល្បែងពាណិជ្ជកម្មនៅឡើយទេ។ ចំពោះល្បែងតាមប្រព័ន្ធអនឡាញ គ.ល.ក មិនផ្តល់អាជ្ញាបណ្ណឱ្យដំណើរការនោះទេ។ ចំពោះការលបលួចដំណើរការអាជីវកម្មល្បែងអនឡាញ គ.ល.ក បានសហការគ្នាយ៉ាងជិតស្និទ្ធជាមួយនឹងអាជ្ញាធរមានសមត្ថកិច្ចពាក់ព័ន្ធ ដើម្បីស្រាវជ្រាវ និងធ្វើការបង្រ្កាបជាបន្តបន្ទាប់»។
កាលពីកន្លងទៅ គណៈកម្មការគ្រប់គ្រងល្បែងពាណិជ្ជកម្មកម្ពុជាបានចេញសេចក្តីណែនាំឱ្យសមត្ថកិច្ចពាក់ព័ន្ធត្រួតពិនិត្យ តាមដាន និងចាត់វិធានការផ្លូវច្បាប់ចំពោះការលួចលាក់ធ្វើអាជីវកម្ម និងបើកបនល្បែងស៊ីសងខុសច្បាប់ ដូចជាឆ្នោត កន្ទុយលេខដែលបានធ្វើឱ្យប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋនិងគោលនយោបាយភូមិឃុំសង្កាត់មានសុវត្ថិភាព។ គណៈកម្មការគ្រប់គ្រងល្បែងពាណិជ្ជកម្មកម្ពុជាបានរកឃើញការផ្សព្វផ្សាយពាណិជ្ជកម្មអំពីល្បែងកាស៊ីណូអនឡាញ និងល្បែងភ្នាល់អនឡាញខុសច្បាប់តាមទំព័រហ្វេសបុក និងប្រព័ន្ធតេឡេក្រាមចំនួន ៧៥ ទំព័រ ក្នុងខែមិថុនា ឆ្នាំ ២០២៤ នេះ។
អគ្គលេខាធិការដ្ឋានលើកឡើងថា៖ «ការផ្សាព្វផ្សាយនេះបានបង្កឱ្យមានផលប៉ះពាល់យ៉ាងខ្លាំងដល់សន្តិសុខ សណ្តាប់ធ្នាប់ សីលធម៌សង្គម និងជីវភាពរស់នៅរបស់ប្រជាពលរដ្ឋ»។ នេះបើយោងតាមព័ត៌មានដែលបង្ហោះនៅលើហ្វេសប៊ុករបស់គណៈកម្មការគ្រប់គ្រងល្បែងពាណិជ្ជកម្មកម្ពុជា។
រដ្ឋាភិបាលកម្ពុជាបានប្រកាសបិទល្បែងកាស៊ីណូអនឡាញចាប់តាំងពីដើមឆ្នាំ ២០២០ ដោយអនុញ្ញាតឱ្យមានតែកាស៊ីណូលេងល្បែងផ្ទាល់នៅនឹងកន្លែងតែប៉ុណ្ណោះ។ កាលនោះ ជនជាតិចិនដែលរស់នៅក្នុងខេត្តព្រះសីហនុដែលសំបូរទៅដោយកាស៊ីណូរាប់រយបានសម្រុកត្រឡប់ទៅប្រទេសខ្លួនវិញ។
បើតាមច្បាប់ ប្រជាជនកម្ពុជាមិនអាចលេងល្បែង ឬចូលលេងល្បែងនៅកាស៊ីណូបានឡើយ។
លោក យង់ គិមអេង ប្រធានមជ្ឈមណ្ឌលប្រជាជន ដើម្បីអភិវឌ្ឍន៍និងសន្តិភាព មើលឃើញថា អ្នករកស៊ីខាងល្បែងនៅតែអាចបន្តការងាររបស់ពួកគេ ដោយលួចលាក់ពីសមត្ថកិច្ច។
លោកថ្លែងថា៖ «បញ្ហាអស់ហ្នឹង ទំនងជាទីមួយអាចថាខាងអ្នកលេងល្បែងស៊ីសងគាត់មានវិធីសាស្រ្តខ្ពស់ជាងសមត្ថកិច្ច ក្នុងការលាក់ ក្នុងការពួនលេង។ ទីពីរ អាចមកពីមានមន្រ្តីខ្លះអាចទទួលបានប្រយោជន៍ផ្ទាល់ខ្លួន ក៏គាត់មិនធ្វើអន្តរាគមន៍។ ទីបីអាចមកពីបញ្ហាកត្តាផ្សេងៗ ដូចជាអ្នកដែលលេងជាអាជីពជាប្រចាំ អ្នកដែលធ្វើមេល្បែងហ្នឹងចេះតែប្រឹងប្រែងរកវិធីដើម្បីបន្តលេងល្បែងហ្នឹង បើកកន្លែងលេងល្បែងហ្នឹងដែលធ្វើឱ្យមានសកម្មភាពការលេងល្បែងហ្នឹងកើតមាន»។
លោកបន្ថែមថា មន្រ្តីអនុវត្តច្បាប់គួរតែពង្រឹងសមត្ថភាពខាងបច្ចេកវិទ្យាបន្ថែមទៀត ដើម្បីបង្កភាពងាយស្រួលក្នុងការបង្រ្កាបល្បែងស៊ីសងខុសច្បាប់តាមអនឡាញកាន់តែមានប្រសិទ្ធភាព។
លោកបញ្ជាក់ថា៖ «តើមន្រ្តីយើងមានសមត្ថភាពខាងបចេ្ចកវិទ្យាខ្ពស់ទេ? អាចនឹងព្យាយាមស្វែងរក ឬក៏អាចនឹងឱ្យមានការបណ្តុះបណ្តាលបន្ថែមពាក់ព័ន្ធនឹងការគ្រប់គ្រងល្បែងតាមអនឡាញ ក្នុងការប្រៀបធៀបបានថាជាល្បែងអនឡាញហ្នឹង បើអាចប្រៀបធៀបបានវាក៏ចូលរួមមួយចំណែកដែរ។ ហើយអ្នកដែលលេងចល័តចុះចល័តឡើងហ្នឹងគឺគាត់ងាយស្រួយរកទេ តែអ្នកដែលពិបាកគឺពួកអនឡាញ»។
លោក យង់ គិមអេង បន្ថែមថា បញ្ហាល្បែងជះឥទ្ធិពលខ្លាំងដល់សង្គមកម្ពុជា ជាពិសេសអ្នកដែលញៀននឹងល្បែងតែម្តងដែលអាចឱ្យពួកគេធ្លាក់ខ្លួនរហូតជំពាក់បំណុល ដោយមិនមានលទ្ធភាពសង ដែលជាការដាក់បន្ទុកលើរដ្ឋនិងបង្កឱ្យមានបញ្ហាអសន្តិសុខបន្តកើតមានកាន់តែច្រើន៕
វេទិកាបញ្ចេញមតិ