កាលពីថ្ងៃចន្ទ រុស្ស៊ីបានចោទប្រកាន់ប្រធានាធិបតីអ៊ុយក្រែនលោក Volodymyr Zelenskyy ថាមិនចង់បានសន្តិភាព ក្រោយពីមានការប៉ះទង្គិចពាក្យសម្តីគ្នារវាងមេដឹកនាំអ៊ុយក្រែនរូបនេះនិងប្រធានាធិបតីសហរដ្ឋអាមេរិកលោក Donald Trump មក។ នេះបើយោងតាមទីភ្នាក់ងារសារព័ត៌មាន AFP។
អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់ក្រុមអ្នកយកព័ត៌មានថា៖ «លោក [Zelenskyy] មិនចង់បានសន្តិភាពទេ។ នរណាម្នាក់គួរតែបង្ខំលោកឲ្យចង់បានសន្តិភាព។ បើអឺរ៉ុបធ្វើកិច្ចការនេះ សូមកោតសរសើរពួកគេផង»។
លោក Peskov បានហៅការប៉ះទង្គិចគ្នាជាពាក្យសម្តីខឹងសម្បាជាសាធារណៈរវាងលោក Trump និងលោក Zelenskyy ថាជា «ព្រឹត្តិការណ៍ដែលមិនធ្លាប់មានពីមុនមក»។ លោក Peskov បានបន្ទោសលោក Zelenskyy ដោយនិយាយថាលោក Zelenskyy «បង្ហាញកង្វះសមត្ថភាពការទូតទាំងស្រុង»។
លោក Peskov បានស្នើឲ្យសម្ព័ន្ធមិត្តរបស់អាមេរិកនៅអឺរ៉ុបធ្វើយ៉ាងណាសម្រួលអារម្មណ៍របស់លោក Trump ដោយលោកបាននិយាយថា «នរណាម្នាក់ត្រូវតែខិតខំសន្ទនាជាមួយអាមេរិកដើម្បីលុបបំបាត់ភាពសៅហ្មងដែលនៅតែមានក្នុងសេតវិមានក្រោយពីមានការពិភាក្សាជាមួយលោក Zelenskyy ហើយ»។
រុស្ស៊ីបានលើកឡើងដូច្នេះបន្ទាប់ពីសម្ព័ន្ធមិត្តអឺរ៉ុបរបស់អ៊ុយក្រែនបានជួបពិភាក្សាគ្នាក្នុងទីក្រុងឡុងដ៍នៃចក្រភពអង់គ្លេសអំពីការដោះស្រាយវិបត្តិអ៊ុយក្រែនកាលពីថ្ងៃអាទិត្យ ហើយលោក Zelenskyy បាននិយាយថាលោកនឹងធ្វើការជាមួយអឺរ៉ុបដើម្បីកំណត់លក្ខខណ្ឌសម្រាប់កិច្ចព្រមព្រៀងសន្តិភាពមួយដែលអាចទៅរួច៕
វេទិកាបញ្ចេញមតិ