រដ្ឋាភិបាលរុស្សីបាននិយាយនៅថ្ងៃអង្គារម្សិលមិញថា ខ្លួនសោកស្តាយដែលយន្តហោះរបស់សហភាពអឺរ៉ុប នឹងបើកវាងដែនអាកាសរបស់ប្រទេសបេឡារុស បន្ទាប់ពីមានការបង្ខំឲ្យចុះចតយន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ Ryanair ដែលមានដឹកសកម្មជនប្រឆាំងរបស់បេឡារុសម្នាក់នៅលើនោះ។
យន្តហោះដឹកអ្នកដំណើរមួយគ្រឿង ដែលធ្វើដំណើរចេញពីក្រុង Athens ប្រទេសក្រិកទៅកាន់ទីក្រុង Vilnius ប្រទេសលីទុយអានីនោះ ត្រូវបានបង្ខំឲ្យចុះចតក្នុងរដ្ឋធានី Minsk របស់ប្រទេសបេឡារុស បន្ទាប់ពីមានការគំរាមថា មានគ្រាប់បែកមួយ។
ការបង្ខំឲ្យយន្តហោះនេះចុះចតក្នុងប្រទេសបេឡារុស បានបង្កើតឲ្យមានកំហឹងយ៉ាងខ្លាំងពីប្រទេសជាច្រើននៅលើពិភពលោក ដោយក្រុមហ៊ុនអាកាសចរណ៍ក្នុងសហភាពអឺរ៉ុប បានសម្រេចបើកវាងដែនអាកាសប្រទេសបេឡារុស ហើយមេដឹកនាំសហភាពអឺរ៉ុប បានព្រមានពីការដាក់ទណ្ឌកម្មថ្មីៗប្រឆាំងនឹងប្រទេសនេះ។
អ្នកនាំពាក្យរដ្ឋាភិបាលរុស្សីលោក Dmitry Peskov បានប្រាប់ក្រុមអ្នកសារព័ត៌មានថា៖ «យើងគ្រាន់តែសម្តែងការសោកស្តាយប៉ុណ្ណោះ។ វាមានតម្លៃខ្លាំងណាស់ សម្រាប់ក្រុមហ៊ុនអាកាសចរណ៍ណា ដែលបើកវាងដែនអាកាសបេឡារុស ដែលជាប្រទេសធំគ្រាន់បើមួយដែរ ហើយស្ថិតចំកណ្តាលទ្វីបអឺរ៉ុប»។
លោកបន្ថែមទៀតថា៖ «ចុងក្រោយបំផុត ផែនការនេះ ធ្វើឲ្យអ្នកដំណើរអស់លុយច្រើន ហើយត្រូវស្ថិតក្នុងយន្តហោះដែលជិះផ្លូវវាងនោះបន្ថែមកន្លះម៉ោង ឬមួយម៉ោងទៀត»។
ប្រធានាធិបតីបេឡារុស លោក Alexander Lukashenko និងសម្ព័ន្ធមិត្តរបស់លោក កំពុងរងទណ្ឌកម្មរបស់អាមេរិកនិងសហភាពអឺរ៉ុប ចំពោះចំណាត់ការរបស់លោកទៅលើការធ្វើបាតុកម្មប្រឆាំង ដែលកើតមានពាសពេញផ្ទៃប្រទេស ដើម្បីប្រឆាំងនឹងលទ្ធផលបោះឆ្នោតប្រធានាធិបតី កាលពីខែសីហា ឆ្នាំ២០២០៕
