សហចៅក្រមស៊ើបអង្កេតនៃអង្គជំនុំជម្រះវិសាមញ្ញក្នុងតុលាការកម្ពុជា ឬសាលាក្តីខ្មែរក្រហម បានបញ្ចប់កិច្ចស៊ើបសួរលើលោកយឹម ទិត្យក្នុងសំណុំរឿង០០៤។ នេះបើយោងតាមសេចក្តីប្រកាសព័ត៌មានរបស់សាលាក្តីខ្មែរក្រហមចេញផ្សាយជាសាធារណៈនាថ្ងៃអង្គារនេះ និងតាមការបញ្ជាក់ពីអ្នកនាំពាក្យរបស់សាលាក្តី។
សេចក្តីប្រកាសព័ត៌មានរបស់តុលាការខ្មែរក្រហមចុះថ្ងៃទី១៣ ខែមិថុនានេះ បានឲ្យដឹងថា តុលាការបានធ្វើការស៊ើបសួរលើលោកយឹម ទិត្យអស់រយៈពេល៨ឆ្នាំ ទាក់ទងនឹងឧក្រិដ្ឋកម្មដែលត្រូវបានចោទប្រកាន់ថា បានប្រព្រឹត្តឡើងរវាងថ្ងៃទី១៧ ខែមេសា ឆ្នាំ១៩៧៥ដល់ថ្ងៃទី៦ ខែមករា ឆ្នាំ១៩៧៩។
លោកនេត្រ ភក្រ្តា អ្នកនាំពាក្យសាលាក្តីខ្មែរក្រហម ថ្លែងប្រាប់ VOA នៅថ្ងៃអង្គារនេះថា សហចៅក្រមស៊ើបអង្កេតបានធ្វើការទៅតាមនីតិវិធីរបស់តុលាការក្នុងការបិទកិច្ចស៊ើបសួរ ដែលមានមេធាវីការពារក្តីឲ្យជនសង្ស័យចូលរួម។ លោកថា គិតពីថ្ងៃប្រកាសនៃការបិទកិច្ចស៊ើបសួរនេះ ភាគីពាក់ព័ន្ធមានពេល១៥ថ្ងៃដើម្បីប្តឹងតវ៉ាសុំឲ្យមានកិច្ចស៊ើបសួរបន្ថែម។
«យោងតាមវិធានផ្ទៃក្នុងគឺគេទុកពេលវេលា១៥ថ្ងៃដើម្បីឲ្យភាគីពាក់ព័ន្ធនានាហ្នឹង គឺគាត់អាចដាក់ប្តឹងបន្ថែមទៀតដើម្បីឲ្យស្នើសុំឲ្យមានការស៊ើបអង្កេតបន្ថែម ឬមួយក៏យ៉ាងម៉េច អីចឹងទៅណា៎»។
អ្នកនាំពាក្យឲ្យសាលាក្តីកូនកាត់មួយនេះលើកឡើងថា សហចៅក្រមស៊ើបអង្កេតបានគោរពសិទ្ធិជនសង្ស័យ ព្រោះបានខិតខំពន្លឿនកិច្ចស៊ើបអង្កេតដើម្បីទុកពេលគ្រប់គ្រាន់ឲ្យជនសង្ស័យមានសិទ្ធិការពារភាពគ្មានទោសរបស់ខ្លួន។
កាលពីខែធ្នូ ឆ្នាំ២០១៥ សហចៅក្រមស៊ើបអង្កេតអន្តរជាតិនៅសាលាក្តីខ្មែរក្រហមបានសម្រេចដាក់លោកយឹម ទិត្យឲ្យស្ថិតក្រោមការពិនិត្យពីបទឧក្រិដ្ឋកម្មមួយចំនួនដែលត្រូវចោទថា បានប្រព្រឹត្តនៅក្នុងសម័យខ្មែរក្រហម។
លោកយឹម ទិត្យ ដែលជាអតីតកម្មាភិបាលខ្មែរក្រហមថ្នាក់កណ្តាល ត្រូវបានចោទប្រកាន់ពីបទឧក្រិដ្ឋជាច្រើន រួមមានអំពើប្រល័យពូជសាសន៍ខ្មែរក្រោម ឧក្រិដ្ឋកម្មប្រឆាំងមនុស្សជាតិ ដែលរួមទាំងការធ្វើទុក្ខម្នេញលើខ្មែរក្រោម និងជនជាតិវៀតណាម ហើយនឹងអំពីអមនុស្សធម៌ជាច្រើនទៀតដូចជាអាពាហ៍ពិពាហ៍ដោយបង្ខំជាដើម។
លោក ឡុង បញ្ញាវុធ ទីប្រឹក្សាគម្រោងយុត្តិធម៌នៅកម្ពុជា បានស្តីបន្ទោសដល់កង្វះថវិកាក្នុងសាលាក្តីខ្មែរក្រហម និងកង្វះឆន្ទៈនយោបាយដែលបានធ្វើឲ្យសាលាក្តីខ្មែរក្រហមខកខានមិនបានរកយុត្តិធម៌ដល់ជនរងគ្រោះក្នុងរបបខ្មែរក្រហម និងដើមបណ្តឹងរដ្ឋប្បវេណីឲ្យបានឆាប់នោះ។
«វាទៅដល់សហចៅក្រមស៊ើបអង្កេតអន្តរជាតិប្រកាសថា ដោយសារតែកង្វះថវិកា អីចឹងសំណុំរឿង ០០៣ និង០០៤ គាត់នឹងប្រកាសចំហរហូត។ អានេះ វាជារឿងមួយដែលប៉ះពាល់មែនទែនទៅលើដំណើរការយុត្តិធម៌នៅក្នុងសាលាក្តីខ្មែរក្រហម ជាពិសេសគឺអ្វីដែលសហចៅក្រមស៊ើបអង្កេតប្រកាសហ្នឹង វាមួយផ្នែកដែលប្រកាសថា ដោយសារតែកង្វះថវិកា ប៉ុន្តែបញ្ហាដែលសំខាន់គឺរឿងឆន្ទៈនយោបាយច្រើនជាង»។
លោក ឡុង បញ្ញាវុធ បន្តថា យុត្តិធម៌នឹងមិនអាចមានសម្រាប់ជនរងគ្រោះ ដើមបណ្តឹងរដ្ឋប្បវេណី ក៏ដូចជាជនជាប់ចោទ ប្រសិនបើតុលាការរក្សាទុកឲ្យសំណុំរឿង០០៣ និង០០៤នៅចំហបន្តទៀត បន្ទាប់ពីកិច្ចស៊ើបអង្កេតត្រូវបានធ្វើឡើងអស់រយៈជាច្រើនឆ្នាំមកនោះ។
«ម្យ៉ាងទៀតសម្រាប់ជនជាប់ចោទ ក៏អយុត្តិធម៌ដែរ ពីព្រោះអីសំណុំរឿងនៅបើកចំហរហូត ហើយឈ្មោះគាត់នៅតែជាឈ្មោះជនជាប់ចោទ ហើយបញ្ហាដែលសំខាន់ សាក្សីទាំងឡាយ ដែលបានចូលរួមនៅក្នុងហ្នឹង តើគេចាត់វិធានការការពារដូចម្តេច? ហើយការស៊ើបអង្កេតកន្លងមករយៈពេល៧ ឬ៨ឆ្នាំនេះ ទីបំផុតវាទៅជាអាសារបង់។ អានេះវាជារឿងមួយគួរឲ្យសោកស្តាយមែនទែន»។
រីឯលោកឡាត់ គី មន្ត្រីសិទ្ធិមនុស្សនៃសមាគមការពារសិទ្ធិមនុស្សអាដហុក ដែលឃ្លាំមើលដំណើរការកាត់ទោសខ្មែរក្រហម បានប្រាប់ VOA ថា កាលដើមឡើយមានប្រតិកម្មខាងនយោបាយខ្លាំងក្លាចំពោះការកសាងសំណុំរឿង០០៣ និង០០៤ តែសម្ពាធនោះចុះថមថយមកវិញ ដោយសារតុលាការបានធ្វើការដោយឈរលើវិជ្ជាជីវៈអព្យាក្រឹត្យរបស់ខ្លួន។ លោកមានការភ្ញាក់ផ្អើលសម្រាប់ការប្រកាសបិទកិច្ចស៊ើបសួរទាំងតក់ក្រហល់បែបនេះ ក្រោយកិច្ចស៊ើបអង្កេតត្រូវបានធ្វើឡើងអស់ពេល៨ឆ្នាំ។
យ៉ាងណាក៏ដោយ លោកឡាត់ គីងឿងឆ្ងល់ថា តើសហមេធាវីនាំមុខរបស់ដើមបណ្តឹងរដ្ឋប្បវេណី អាចមានពេលគ្រប់គ្រាន់សម្រាប់ជូនដំណឹងកូនក្តីចំពោះការបញ្ចប់កិច្ចស៊ើបសួរនេះឬយ៉ាងណា។ លោកបានឲ្យដឹងថា ជនរងគ្រោះ និងដើមបណ្តឹងរដ្ឋប្បវេណីតែងតែចង់ឃើញជនសង្ស័យត្រូវបាននាំយកមកកាត់ទោស។ ក៏ប៉ុន្តែ ការកាត់ទោសជនសង្ស័យបានឬយ៉ាងណានោះគឺអាស្រ័យលើការយល់ឃើញរបស់សហចៅក្រមស៊ើបអង្កេត។
«អ្នកណាមួយក៏ដឹងដែរអំពីបញ្ហាជនសង្ស័យទាំងអស់ សុទ្ធ[ជា] អ្នកដែលទទួលខុសត្រូវ ប៉ុន្តែគ្រាន់តែថា នេះវាជាវិជ្ជាជីវៈឯករាជ្យរបស់សហចៅក្រមស៊ើបអង្កេត។ អីចឹងបើកាលណាសហចៅក្រមស៊ើបអង្កេតយល់ឃើញបែបម៉េច អាហ្នឹងវាជាវិជ្ជាជីវៈឯករាជ្យរបស់ពួកគាត់ អីចឹងហើយបាទ។ ប៉ុន្តែគ្រាន់ថា ជាការកត់សម្គាល់ ទឹកចិត្តរបស់ប្រជាពលរដ្ឋគឺតែងតែចង់ផ្តន្ទាទោសដើម្បីផ្តល់យុត្តិធម៌ជូនពួកគាត់។ អានេះជាទស្សនៈរបស់ជនរងគ្រោះបាទ»។
សំណុំរឿង០០៤នេះ មានជនសង្ស័យពីររូបផ្សេងទៀតគឺ អ្នកស្រីអ៊ឹម ចែម និងលោកអោ អាន។ កាលពីខែកុម្ភៈកន្លងទៅ សហចៅក្រមស៊ើបអង្កេតសាលាក្ដីខ្មែរក្រហមបានសម្រេចទម្លាក់ការចោទ ប្រកាន់ប្រឆាំងអ្នកស្រីអ៊ឹម ចែម អតីតកម្មាភិបាលខ្មែរក្រហមថ្នាក់ស្រុកម្នាក់នៃរបបកម្ពុជាប្រជាធិបតេយ្យ។ អ្នកស្រីអ៊ឹម ចែមត្រូវបានចាត់ទុកថា មិនមែនជាមេដឹកនាំជាន់ខ្ពស់ ឬក៏ជាអ្នកទទួលខុសត្រូវខ្ពស់នៅក្នុងរបបខ្មែរក្រហមទេ។
ចំណែកតាអាន ឬ អោ អាន សាលាក្តីខ្មែរក្រហមក៏បានបញ្ចប់កិច្ចស៊ើបសួរផងដែរ។ ការប្រកាសបញ្ចប់កិច្ចស៊ើបសួរលើលោកអោ អាននេះធ្វើឡើងពីរលើក គឺនៅខែធ្នូ ឆ្នាំ២០១៦ និងខែមីនា ឆ្នាំ ២០១៧ ហើយឥឡូវនេះកំពុងរង់ចាំសេចក្តីសម្រេចនៅចំពោះមុខអង្គបុរេជំនុំជម្រះ។
ដោយឡែកសំណុំរឿង០០៣មានជនជាប់ចោទម្នាក់គឺលោកមាស មុត ដែលជាអតីតមេបញ្ជាការកងទ័ពជើងទឹកខ្មែរក្រហម។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហម បានឲ្យដឹងថា សំណុំរឿង០០៤មានដើមបណ្តឹងរដ្ឋប្បវេណី ប្រមាណ២០០៧នាក់ ហើយមានដើមបណ្តឹងរដ្ឋប្បវេណីជាង៦៤០នាក់ផ្សេងទៀត ស្ថិតក្នុងសំណុំរឿង០០៣។
អ្នកឃ្លាំមើលសាលាក្តីខ្មែរក្រហមស្ទាក់ស្ទើរចិត្តដើម្បីកំណត់ថា សាលាក្តីខ្មែរក្រហមអាចជាសាលាក្តីគំរូដល់សាលាក្តីជាតិ និងសាលាក្តីផ្សេងទៀត ព្រោះថា សាលាក្តីនៅបន្តរងសម្ពាធនយោបាយក្នុងកិច្ចស៊ើបអង្កេតរបស់ខ្លួន៕
