ចៅក្រមសហព័ន្ធម្នាក់នៅក្នុងរដ្ឋធានីវ៉ាស៊ីនតោនកាលពីថ្ងៃអង្គារម្សិលមិញបានបញ្ជាឱ្យរដ្ឋបាលរបស់លោកប្រធានាធិបតី Trump ផ្តល់ថវិកាជំនួយបរទេសដល់បុគ្គលិកជាប់កិច្ចសន្យានិងអង្គការទទួលជំនួយឥតសំណងនៅកំណត់ម៉ោង ១១:៥៩យប់ថ្ងៃពុធនេះ ដោយនិយាយថាមិនមានសញ្ញាថារដ្ឋបាលនេះបានចាត់វិធានការណាមួយដើម្បីអនុ វត្តទៅតាមបទបញ្ជាពីដំបូងរបស់លោកប្រធានាធិបតីដែលថាថវិកាទាំងនោះត្រូវបានបង្កកនោះទេ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
បទបញ្ជាចៅក្រមសហព័ន្ធសហរដ្ឋអាមេរិកបានកើតមានឡើងនៅក្នុងសវនការតាមទូរស័ព្ទមួយនៅក្នុងបណ្តឹងដែលបានធ្វើឡើងដោយបណ្តាអង្គការដែលមានកិច្ចសន្យាជាមួយនិងទទូលជំនួយមកពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិឬ USAID និងក្រសួងការបរទេស។ បទបញ្ជានោះអនុវត្តដល់ការងារដែលបានធ្វើមុនថ្ងៃទី១៣ ខែកុម្ភៈ នៅពេលដែលចៅក្រមរូបនោះបានចេញបទបញ្ជាដើម្បីទប់ជាបណ្តោះអាសន្នកាលពីដំបូងរបស់លោក។
វាជាលើកទី៣ដែលលោក Ali បានបញ្ជាឱ្យពួកមន្ត្រីរដ្ឋបាលបញ្ចេញថវិកាបរទេសដែលត្រូវបានផ្អឹបបន្ទាប់ពីលោកប្រធានាធិបតី Donald Trump បានបញ្ជាឱ្យផ្អាកជំនួយបរទេសទាំងអស់រយៈពេល ៩០ថ្ងៃ ដែលធ្វើឱ្យកិច្ចខំប្រឹងប្រែងជំនួយមនុស្សធម៌សាកលលោកចូលក្នុងភាពច្របូកច្របល់។
ដើមបណ្តឹងនៅក្នុងបណ្តឹងនោះបាននិយាយថាពួកគេ នឹងត្រូវបិទទ្វាទាំងស្រុង ប្រសិនបើពួកគេមិនបានទទួលប្រាក់នៅពេលឆាប់ៗនេះទេ។ ពួកគេចោទប្រកាន់ថារដ្ឋបាលរបស់លោក Trump បានរំលោភច្បាប់សហព័ន្ធនិងរដ្ឋធម្មនុញ្ញសហរដ្ឋអាមេរិកនៅក្នុងការបដិសេធពុំព្រមផ្តល់ថវិកានិងនៅក្នុងការរំលាយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិឬ USAID។
ទីភ្នាក់ងារផ្តល់ជំនួយបរទេសនេះកាលពីថ្ងៃអាទិត្យបាននិយាយថាបុគ្គលិកទាំងអស់របស់ខ្លួន លើកលែងតែបុគ្កលិកសំខាន់ៗ នឹងត្រូវដាក់ឱ្យឈប់ពីការងារហើយថាមុខងារចំនួន១ពាន់៦រយកន្លែងនៅក្នុងសហរដ្ឋអាមេរិកនឹងត្រូវលុបចោល៕
វេទិកាបញ្ចេញមតិ