សហរដ្ឋអាមេរិកបានសម្តែងការគាំទ្រយ៉ាងពេញទំហឹងកាលពីថ្ងៃអាទិត្យចំពោះគោលដៅសង្រ្គាមរបស់អ៊ីស្រាអែលនៅតំបន់ហ្កាហ្សា ដោយលោករដ្ឋមន្ត្រីការបរទេស Marco Rubio បាននិយាយថា ក្រុមហាម៉ាស់ «ត្រូវតែលុបបំបាត់ចោល» និង «មិនអាចបន្តជាយោធា ឬកងកម្លាំងរដ្ឋាភិបាលបានទេ»។
លោក Rubio បានជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu ក្នុងទីក្រុង Jerusalem នៅពេលចាប់ផ្តើមដំណើរទស្សនកិច្ចក្នុងតំបន់ ខណៈដែលដំណាក់កាលទី១ នៃបទឈប់បាញ់គ្នារវាងអ៊ីស្រាអែល និងក្រុមហាម៉ាស់នឹងផុតកំណត់ក្នុងរយៈពេលពីរសប្តាហ៍ទៀត ហើយផ្នែកទីពីរមិនទាន់ត្រូវបានចរចានៅឡើយទេ។
នៅក្នុងដំណើរលើកដំបូងរបស់លោកទៅកាន់តំបន់មជ្ឈិមបូព៌ាក្នុងនាមជាអ្នកការទូតកំពូលថ្មីរបស់សហរដ្ឋអាមេរិក លោក Rubio បានប្រាប់លោក Netanyahu ថា «ដរាបណា ក្រុមហាម៉ាស់ នៅតែជាកម្លាំងដែលអាចត្រួតត្រា ឬជាកម្លាំងដែលអាចគ្រប់គ្រង ឬជាកម្លាំងដែលអាចគំរាមកំហែងដោយការប្រើអំពើហិង្សា សន្តិភាពនឹងមិនអាចសម្រេចបានទេ» ។
លោក Rubio ទំនងជាប្រឈមមុខនឹងការប្រឆាំងជាបន្តពីបណ្តាប្រទេសអារ៉ាប់អំពីផែនការរបស់ប្រធានាធិបតីអាមេរិក លោក Donald Trump ក្នុងការផ្លាស់ទីជនជាតិប៉ាឡេស្ទីនចេញពីតំបន់ហ្កាហ្សា ទៅកាន់ប្រទេសជិតខាង ហើយបន្ទាប់មកឲ្យអ៊ីស្រាអែល ប្រគល់ទឹកដីតូចចង្អៀតតាមច្រាំងសមុទ្រមេឌីទែរ៉ាណេនេះទៅឱ្យសហរដ្ឋអាមេរិកដើម្បីធ្វើជាម្ចាស់ និងអភិវឌ្ឍឡើងវិញ។
ទាំងក្រុមសម្ព័ន្ធមិត្ត និងសត្រូវរបស់សហរដ្ឋអាមេរិកបានវាយប្រហារផែនការ នៅតំបន់ហ្កាហ្សារបស់លោក Trump ប៉ុន្តែលោក Netanyahu បានស្វាគមន៍ផែនការនេះ ដោយនិយាយថាលោក និង លោក Trump មាន «យុទ្ធសាស្ត្ររួម» សម្រាប់អនាគតរបស់តំបន់ហ្កាហ្សា៕
វេទិកាបញ្ចេញមតិ