បន្ទាប់ពីប្រធានាធិបតីសហរដ្ឋអាមេរិកលោក Donald Trump បានស្នើឱ្យលុបចោលកិច្ចព្រមព្រៀងឈប់បាញ់គ្នារវាងអ៊ីស្រាអែលនិងក្រុមហាម៉ាស់ ប្រសិនបើចំណាប់ខ្មាំងទាំងអស់មិនត្រូវបានដោះលែងនៅត្រឹមថ្ងៃសៅរ៍ខាងមុខទេនោះ។ មន្ត្រីម្នាក់របស់ក្រុមហាម៉ាស់បានព្រមានថាមធ្យោបាយតែមួយគត់សម្រាប់ពួកអ្នកចាប់ខ្លួនត្រូវបានដោះលែងគឺការគោរពលក្ខខណ្ឌនៃបទឈប់បាញ់គ្នា។
លោកប្រធានាធិបតី Trump បានធ្វើកំណត់សម្គាល់របស់លោកកាលពីថ្ងៃចន្ទបន្ទាប់ពីក្រុមហាម៉ាស់បានចោទប្រកាន់អ៊ីស្រាអែលពីការរំលោភបទឈប់បាញ់គ្នាហើយបានគំរាមកំហែងពន្យាពេលការដោះលែងចំណាប់ខ្មាំង៣នាក់ដែលមានគម្រោងដោះលែងនៅថ្ងៃសៅរ៍ខាងមុខនេះ។
លោកប្រធានាធិបតី Trumpបានប្រាប់ពួកអ្នកយកព័ត៌មាននៅឯសេតវិមានថា«បើតាមការព្រួយបារម្ភរបស់ខ្ញុំ បើចំណាប់ខ្មាំងទាំងអស់មិនត្រូវបានវិលត្រឡប់មកវិញនៅម៉ោង១២ថ្ងៃសៅរ៍ខាងមុខនេះទេ ខ្ញុំគិតថាវាជាពេលវេលាសមរម្យ ដែលខ្ញុំនឹងនិយាយថានឹងលប់ចោលបទឈប់បាញ់គ្នាហើយការសន្យាទាំងអស់ត្រូវទុកជាមោឃៈហើយអ្វីៗត្រូវលុបចោល»។
កាលពីថ្ងៃអង្គារម្សិលមិញ មន្ត្រីជាន់ខ្ពស់ក្រុមហាម៉ាស់លោក Sami Abu Zuhriបានប្រាប់ពួកអ្នកយកព័ត៌មានថាកំណត់សម្គាល់របស់លោក Trumpធ្វើឲ្យកាន់តែស្មុគស្មាញចំពោះបទឈប់បាញ់គ្នាដ៏ផុយស្រួយនេះ។
.
ក្រុមហាម៉ាស់បាននិយាយកាលពីថ្ងៃចន្ទថាមិនមានចំណាប់ខ្មាំងថែមទៀតនឹងត្រូវបានដោះលែងទេ រហូតទាល់តែមានការជូនដំណឹងបន្ថែម។ ក្រុមដែលសហរដ្ឋអាមេរិកនិងប្រទេសជាច្រើនផ្សេងទៀតបានចាត់ទុកជាអង្គការភេរវកម្មបានចោទប្រកាន់អ៊ីស្រាអែលពីការពន្យាពេលការវិលត្រឡប់របស់ជនជាតិប៉ាឡេស្ទីនដែលគ្មានទីកន្លែងរស់នៅទៅកាន់តំបន់ហ្កាហ្សាភាគខាងជើង ថ្វីបើមនុស្សរាប់ម៉ឺននាក់បានវិលត្រឡប់ទៅវិញហើយក៏ដោយ។
នៅក្នុងទីក្រុងប៉ារីស ប្រទេសបារាំង អគ្គលេខាងធិការអង្គការសហប្រជាជាតិលោក Antonio Guterres បានអំពាវនាវឱ្យក្រុមហាម៉ាស់គោរពទៅតាមផែនការនៃការដោះលែងចំណាប់ខ្មាំង៕
ក្រុមហាម៉ាស់ថាការគោរពបទឈប់បាញ់គ្នាជាវិធីតែមួយគត់ដើម្បីដោះលែងពួកចំណាប់ខ្មាំង
វេទិកាបញ្ចេញមតិ