ពលរដ្ឋឥណ្ឌូណេស៊ី៨៤នាក់ត្រូវបានសង្គ្រោះពីមណ្ឌលឆបោកអនឡាយនៅក្នុងប្រទេសមីយ៉ាន់ម៉ា ហើយរំពឹងថានឹងធ្វើមាតុភូមិនិវត្តន៍នៅក្នុងថ្ងៃសុក្រនេះ ក្រោយពីមានការបង្ក្រាបលើមណ្ឌលឆបោកក្នុងពេលថ្មីៗនេះ។ នេះបើតាមការផ្សាយរបស់ទីភ្នាក់ងារសារព័ត៌មាន AP។
ពលរដ្ឋឥណ្ឌូណេស៊ីស្ថិតនៅក្នុងចំណោមមនុស្សជាង៧.០០០នាក់ដែលត្រូវបានគេបង្ខាំងទុកនៅក្រុង Myawaddy នៅព្រំដែនមីយ៉ាន់ម៉ា ក្រោយពីមានការបង្ក្រាបលើមណ្ឌលឆបោកដោយប្រទេសថៃ មីយ៉ាន់ម៉ានិងចិន។ រថយន្តក្រុងពីរគ្រឿងដែលបានដឹកពលរដ្ឋឥណ្ឌូណេស៊ី ទាំងនោះបានមកដល់ទីក្រុង Mae Sot នៅព្រំដែនរបស់ថៃ ដែលនៅទីនោះអ្នកធ្វើដំណើរត្រូវបានគេពិនិត្យសុខភាពនិងបញ្ជាក់អត្តសញ្ញាញ។
មនុស្សរាប់ម៉ឺននាក់ត្រូវគេជឿថាត្រូវបានគេល្បួងឱ្យទៅធ្វើការនៅប្រទេសមីយ៉ាន់ម៉ា កម្ពុជា និងឡាវ ដើម្បីប្រព្រឹត្តអំពើឆបោកតាមអនឡាយលើមនុស្សជុំវិញពិភពលោក តាមរយៈការបោកបញ្ឆោតរឿងស្នេហា ការវិនិយោគមិនពិត និងការលេងល្បែងស៊ីសងខុសច្បាប់។ អ្នកធ្វើការទាំងនោះជាច្រើនក៏ត្រូវបានគេបោកឱ្យមកធ្វើការនៅមណ្ឌលឆបោកទាំងនោះ។
ក្រសួងការបរទេសឥណ្ឌូណេស៊ីបញ្ជាក់ថា ពលរដ្ឋឥណ្ឌូណេស៊ីទាំង៨៤នាក់នោះដែលរួមមានបុរស៦៩នាក់និងស្ត្រី១៥នាក់ មានសុខភាពល្អ ហើយត្រូវបានបញ្ជូនតាមជើងយន្តហោះទៅកាន់រដ្ឋធានីហ្សាការតានៅថ្ងៃសុក្រនេះ។
ការបង្ក្រាបលើមណ្ឌលឆបោកនៅមីយ៉ាន់ម៉ានេះកើតមានឡើងក្រោយជំនួបរវាងនាយករដ្ឋមន្ត្រីថៃអ្នកស្រី Paetongtarn Shinawatra និងប្រធានាធិបតីចិនលោក Xi Jinping កាលពីដើមខែកុម្ភៈ ដោយបន្ទាប់មកថៃបានកាត់ផ្តាច់ចរន្តអគ្គិសនីនិងបណ្តាញអ៊ីនធឺណិតនៅតាមតំបន់ព្រំដែនរបស់ខ្លួនជាមួយមីយ៉ាន់ម៉ាដែលមានមណ្ឌលឆបោកទាំងនោះ៕
ពលរដ្ឋឥណ្ឌូណេស៊ី៨៤នាក់ដែលត្រូវបានសង្គ្រោះពីមណ្ឌលឆបោកនៅមីយ៉ាន់ម៉ាត្រឡប់ទៅមាតុភូមិវិញ
វេទិកាបញ្ចេញមតិ