ខណៈប៉ូលិសខ្មែរកំពុងតែស៊ើបអង្កេតករណីចុះបង្រ្កាបជួយសង្រ្គោះជនបរទេស២៣០ នាក់ មន្រ្តីសិទ្ធិមនុស្សក្នុងប្រទេសកម្ពុជាបានជំរុញឲ្យអាជ្ញាធរកម្ពុជាស៊ើបអង្កេតករណីប្រើប្រាស់ទីតាំងកម្ពុជានៅក្នុងទីក្រុងប៉ោយប៉ែត ខេត្តបន្ទាយមានជ័យដើម្បីប្រព្រឹត្តអំពើបោកបញ្ឆោត។
កាលពីថ្ងៃសៅរ៍ ទី ២២ ខែកុម្ភៈ ឆ្នាំ ២០២៥ អាជ្ញាធរកម្ពុជាបានសហការជាមួយអាជ្ញាធរថៃក្នុងការបង្រ្កាបទីតាំងអគារមួយកន្លែងក្នុងទីក្រុងប៉ោយប៉ែត ដោយរកឃើញជនបរទេស ២៣០ នាក់ ដែលត្រូវបានរាយការណ៍ថាជាជនរងគ្រោះនៃអំពើឆបោក។
សារព័ត៌មានថៃឈ្មោះ Bangkok Post បានចុះផ្សាយកាលពីថ្ងៃទី ២៣ ខែកុម្ភៈ ឆ្នាំ ២០២៥ ថា នគរបាលកម្ពុជាបានជួយសង្គ្រោះជនបរទេសចំនួន ២១៥ នាក់ ក្នុងនោះ ១០៩ នាក់ជាជនជាតិថៃ ចេញពីបរិវេណឆបោកក្នុងក្រុងប៉ោយប៉ែត បន្ទាប់ពីមានការសហការគ្នាជាជំហានៗរវាងថៃ និងកម្ពុជា ដើម្បីប្រយុទ្ធប្រឆាំងនឹងក្រុមឆបោក។
ស្នងការនគរបាលខេត្តបន្ទាយមានជ័យលោក សិទ្ធិ ឡោះ លើកឡើងថា អាជ្ញាធរកម្ពុជាកំពុងតែស៊ើបអង្កេតនិងស្រាវជ្រាវលើករណីបង្ក្រាបបទល្មើសឆបោកតាមអនឡាញនេះ។
លោក សិទ្ធិ ឡោះ ឲ្យដឹងថា លោកនៅមិនទាន់អាចផ្តល់ព័ត៌មានអ្វីបន្ថែមបាននៅឡើយទេជុំវិញករណីនេះ។
លោកបញ្ជាក់ថា៖ «អាហ្នឹងវាអត់មានរងគ្រោះទេ មានតែខាងខ្មែរយើងធ្វើកិច្ចសហប្រតិបត្តិការបង្ក្រាប ទីតាំងដែលមានការសង្ស័យថា លួចបើកអនឡាញដោយខុសច្បាប់នៅលើទឹកដីខ្មែរ។ ជម្រាបជូនបានប៉ុណ្ណឹង។ អារឿងរងគ្រោះ សង្គ្រោះគ្មានទេ»។
ក្នុងចំណោមជនបរទេស ២១៥ នាក់នោះ ក្រៅពីជនជាតិថៃចំនួន ១០៩ នាក់ មានជនជាតិបាគីស្ថានចំនួន ៥០ នាក់ ឥណ្ឌា ៤៨ នាក់ ចិនតៃវ៉ាន់ ៥ នាក់និងឥណ្ឌូណេស៊ី ៣ នាក់។ នេះបើតាមសារព័ត៌មានថៃ។ សារព័ត៌មានបញ្ជាក់ថាទីតាំងដែលត្រូវចុះបង្រ្កាបនោះត្រូវបានគ្រប់គ្រងដោយក្រុមជនជាតិចិន។
ប្រតិបត្តិការបង្រ្កាបនេះធ្វើឡើងបន្ទាប់ពីកិច្ចប្រជុំបន្ទាន់កាលពីថ្ងៃសុក្ររវាងលោក Pol Gen Thatchai Pitaneelaboot អគ្គអធិការនគរបាលភូមិន្ទថៃ និងមន្ត្រីនគរបាលជាន់ខ្ពស់កម្ពុជា ដើម្បីពិភាក្សាអំពីផែនការប្រតិបត្តិការ ដើម្បីលុបបំបាត់ក្រុមឆបោកតាមមជ្ឈមណ្ឌលហៅទូរស័ព្ទ ឬហៅថា Call Center។
វីអូអេមិនទាន់អាចសុំការអត្ថាធិប្បាយពីលោក សុខ សុមនា អ្នកនាំពាក្យអគ្គនាយកដ្ឋានអន្តោប្រវេសន៍កម្ពុជាបាននៅឡើយទេ។
នាយកទទួលបន្ទុកទូទៅនៃអង្គការការពារសិទ្ធិមនុស្សលីកាដូ លោក អំ សំអាត ជំរុញឲ្យអាជ្ញាបន្តស៊ើបអង្កេត ដើម្បីស្វែងរកអ្នកពាក់ព័ន្ធ និងត្រូវស៊ើបអង្កេតថា តើទីតាំងនោះជាអគារជួលដែលមានម្ចាស់ជួលខ្មែរឬយ៉ាងណា។
លោកថ្លែងថា៖ «ករណីនេះកើតនៅទឹកដីកម្ពុជាទៀត។ អ៊ីចឹងយើងឃើញថា មានសមត្ថកិច្ចថៃមានអី គេចូលមកធ្វើការបង្ក្រាបនៅលើទឹកដីកម្ពុជា។ អ៊ីចឹងត្រូវមានកិច្ចសហប្រតិបត្តិការល្អទៅលើរឿងនេះ ហើយស្វែងរកអ្នកដែលពាក់ព័ន្ធជាមួយនឹងអគារដែលជួលទៅដល់ជនបរទេសដែលប្រព្រឹត្តបទល្មើសនិងអនុវត្តទៅតាមផ្លូវច្បាប់ឲ្យបាន»។
បើតាមលោក អំ សំអាត បើបញ្ហានេះនៅតែបន្តកើតឡើង នោះវាប៉ះពាល់ខ្លាំងដល់កម្ពុជា រួមមានវិស័យទេសចរណ៍ ការវិនិយោគ និងសន្តិសុខសង្គម។
គួរបញ្ជាក់ថា ជាបន្តបន្ទាប់ ប្រទេសកម្ពុជាត្រូវបានរាយការណ៍ថា ក្លាយជាកន្លែងបោកបញ្ឆោតតាមប្រព័ន្ធអ៊ីនធឺណិត (Scam) ដោយប្រើប្រាស់កម្លាំងពលកម្មបរទេស រហូតមានសេចក្តីរាយការណ៍អំពីការបង្ខាំងទុកពួកគេមិនឲ្យមានសេរីភាព ការធ្វើទារុណកម្ម និងការជំរិតទារប្រាក់ជាដើម។ ឧក្រិដ្ឋជនដែលភាគច្រើនជាជនបរទេសបានជួលអគារ ឬទីតាំងពីអ្នកជំនួញដែលជាជនជាតិខ្មែរដើម្បីប្រព្រឹត្តអំពើទាំងនោះ។
បើតាមរបាយការណ៍របស់អង្គការសហប្រជាជាតិទទួលបន្ទុកសិទ្ធិមនុស្ស (UNHCHR) ដែលចេញផ្សាយកាលពីចុងខែសីហា ឆ្នាំ ២០២៣ នៅក្នុងប្រទេសកម្ពុជា មនុស្សប្រមាណជា ១០ ម៉ឺននាក់ ដែលជាជនបរទេសត្រូវបានបង្ខំឲ្យធ្វើការងារឆបោកតាមប្រព័ន្ធអនឡាញនៅក្នុងប្រទេសកម្ពុជា។ ករណីឆបោកតាមប្រព័ន្ធអនឡាញនេះក៏បានកើតឡើងនៅក្នុងប្រទេសចំនួន ៥ ក្នុងតំបន់អាស៊ីអាគ្នេយ៍រួមមានកម្ពុជា ថៃ ឡាវ មីយ៉ាន់ម៉ា និងហ្វីលីពីន៕
វេទិកាបញ្ចេញមតិ