អតីតប្រធានាធិបតីហ្វីលីពីនលោក Rodrigo Duterte បានត្រូវគេប្រគល់កាលពីថ្ងៃពុធទៅឱ្យមន្ទីរឃុំឃាំងរបស់តុលាការឧក្រិដ្ឋកម្មអន្តរជាតិ ICC បន្ទាប់ពីការចាប់ខ្លួនលើដីកាដែលចោទប្រកាន់លោកពីបទឧក្រិដ្ឋកម្មប្រឆាំងនឹងមនុស្សជាតិ ចំពោះការបង្ក្រាបប្រឆាំងថ្នាំញៀនដ៏ប្រល័យដែលលោកបានមើលការខុសត្រូវ ខណៈពេលលោកកំពុងកាន់អំណាច។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
តុលាការបានបញ្ជាក់នៅក្នុងសេចក្តីថ្លែងការណ៍ថា៖«ជាវិធានការនៃការប្រុងប្រៀបជាមុន»ជំនួយវេជ្ជសាស្ត្រមានគ្រប់គ្រាន់នៅឯចំណតអាកាសយានដ្ឋានសម្រាប់លោក Duterte ទៅតាមដំណើរការបទដ្ឋាននៅពេលដែលជនសង្ស័យមកដល់»។
អតីតប្រធានាធិបតីអាយុ៧៩ឆ្នាំរូបនេះបានទៅដល់ចំណតអាកាសយានដ្ឋាន Rotterdam ក្រុងឡាអេប្រទេសហូឡង់ កាលពីព្រឹកថ្ងៃពុធតាមជើងហោះហើរពីទីក្រុងម៉ានីល បន្ទាប់ពីការចាប់ខ្លួនលោកតាមដីការបស់តុលាការ ICC កាលពីថ្ងៃអង្គារ ដូចដែលត្រូវបានប្រកាសដោយប្រធានាធិបតីនៅពេលបច្ចុប្បន្នលោក Ferdinand Marcos។ ក្រុមអង្គការសិទ្ធិមនុស្សនិងក្រុមគ្រួសារជនរងគ្រោះបានសរសើរការចាប់ខ្លួនលោក Duterte នេះ។
ក្នុងពេលប៉ុន្មានថ្ងៃនេះ លោកនឹងត្រូវបង្ហាញខ្លួនមុនដំបូងនៅជាទីកន្លែងដែលតុលាការនឹងបញ្ជាក់នូវអត្តសញ្ញាណរបស់លោក ពិនិត្យថាលោកយល់ពីការចោទប្រកាន់ប្រឆាំងនឹងលោក និងកំណត់កាលបរិច្ឆេទសម្រាប់សវនាការដើម្បីវាយតម្លៃថា តើពួករដ្ឋអាជ្ញាមានភស្តុតាងគ្រប់គ្រាន់ដើម្បីបញ្ជូនលោកទៅកាត់ទោសពេញលេញដែរឬទេ។
ប្រសិនបើរឿងក្តីរបស់លោកទៅតុលាការហើយត្រូវបានកាត់ឱ្យជាប់ទោស លោក Duterte អាចប្រឈមការជាប់ពន្ធនាគារអស់មួយជីវិត។ យន្តហោះតូចមួយគ្រឿងដែលដឹកលោក Duterte អាចត្រូវគេមើលឃើញនៅពេលដែលវាបានបើកទៅមុខយឺតៗចូលក្នុងរោងមួយ ជាទីកន្លែងដែលរថយន្តក្រុង២គ្រឿងកំពុងរង់ចាំ។ រថយន្តសង្គ្រោះបន្ទាន់មួយគ្រឿងក៏បានបើកទៅជិតរោងដាក់យន្តហោះនោះដែរ ហើយមានបុគ្គលិកពេទ្យបានស្ថិតនៅខាងក្នុងនោះ។
អ្នកស្រី Emily Soriano ម្តាយរបស់ជនរងគ្រោះនៃការបង្ក្រាបថ្នាំញៀនបាននិយាយថាអ្នកស្រីចង់ឱ្យពួកមន្ត្រីច្រើនថែមទៀតប្រឈមយុត្តិធម៌។ អ្នកស្រីបាននិយាយថា៖«លោក Duterte មានសំណាងហើយដែលលោកបានឆ្លងកាត់ដំណើការកាត់ទោសតាមនីតិវិធីច្បាប់នេះ ក៏ប៉ុន្តែ កូនរបស់យើងដែលត្រូវបានគេសម្លាប់មិនបានទទួលដំណើរការតាមនីតិវិធីច្បាប់នេះទេ»៕
វេទិកាបញ្ចេញមតិ