អតីតប្រធានាធិបតីហ្វីលីពីនលោក Rodrigo Duterte ត្រូវបានប៉ូលិសចាប់ខ្លួននៅអាកាសយានដ្ឋានអន្តរជាតិទីក្រុងម៉ានីល នៅថ្ងៃអង្គារនេះ តាមដីការបស់តុលាការព្រហ្មទណ្ឌអន្តរជាតិ (ICC) ពាក់ព័ន្ធនឹងសំណុំរឿងឧក្រិដ្ឋកម្មប្រឆាំងនឹងមនុស្សជាតិដែលប្ដឹងប្រឆាំងនឹងលោក។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP ដែលយោងលើការបញ្ជាក់របស់រដ្ឋាភិបាលហ្វីលីពីន។
លោក Duterte ត្រូវបានចាប់ខ្លួន បន្ទាប់ពីបានត្រឡប់មកពីទីក្រុងហុងកុងវិញ ហើយប៉ូលិសបាននាំលោកទៅឃុំខ្លួនតាមដីការបស់តុលាការ ICC។ តុលាការនេះបានស៊ើបអង្កេតករណីសម្លាប់ទ្រង់ទ្រាយធំដែលបានកើតឡើងនៅក្រោមការបង្ក្រាបដ៏ប្រល័យរបស់លោកលើគ្រឿងញៀនខុសច្បាប់។ នេះបើតាមការបញ្ជាក់នៅក្នុងសេចក្ដីថ្លែងការណ៍របស់ខុទ្ទកាល័យប្រធានាធិបតីហ្វីលីពីនលោក Ferdinand Marcos ។
ការិយាល័យប៉ូលិសអន្តរជាតិប្រចាំក្រុងម៉ានីលបានទទួលសំណៅផ្លូវការមួយនៃដីកាចាប់ខ្លួននេះពីតុលាការ ICC ហើយសេចក្ដីជូនដំណឹងអំពីដីកាចាប់ខ្លួននេះត្រូវបានបង្ហាញជូនលោក Duterte។ នេះបើតាមការបញ្ជាក់របស់រដ្ឋាភិបាលហ្វីលីពីន។
គេនៅមិនទាន់ដឹងច្បាស់ភ្លាមៗនៅឡើយទេថា តើប៉ូលិសបញ្ជូនលោក Duterte ទៅទីណា។ រដ្ឋាភិបាលហ្វីលីពីនថាលោក Duterte ដែលមានវ័យ ៧៩ ឆ្នាំនេះ មានសុខភាពល្អនិងត្រូវបានពិនិត្យសុខភាពដោយគ្រូពេទ្យរបស់រដ្ឋាភិបាល៕
វេទិកាបញ្ចេញមតិ