លោក ហ៊ុន សែន អតីតនាយករដ្ឋមន្ត្រីនិងជាប្រធានព្រឹទ្ធសភា ថ្លែងនៅថ្ងៃអង្គារនេះថា លោក ហ៊ុន ម៉ាណែត អាចនឹងបាត់បង់តំណែងជានាយករដ្ឋមន្ត្រីកម្ពុជាប្រសិនបើដើរខុសពីគោលនយោបាយរបស់គណបក្សប្រជាជនកម្ពុជា។
លោក ហ៊ុន សែន ថ្លែងបែបនេះនៅក្នុងពិធីសម្ពោធអគារសិក្សា និងសមិទ្ធផលនានា នៅវត្តព្រះឥន្ទសាមគ្គីធម៌ នៅស្រុកអង្គស្នួល ខេត្តកណ្តាល នាថ្ងៃទី ១១ ខែកុម្ភៈ ឆ្នាំ ២០២៥។ លោកបន្ថែមថា នេះជាសារឆ្លើយតបទៅកាន់មនុស្សមួយចំនួន ដែលចោទសួរថា «ពេលណាលោក ហ៊ុន ម៉ាណែត ដើរចេញពីស្រមោលឪពុក»។
លោក ហ៊ុន សែន ថ្លែងថា៖ «សូមផ្តាំទៅអ្នកដែលចូលចិត្តនិយមនិយាយអំពីបញ្ហាតើពេលណា ម៉ាណែត ដើរចេញពីស្រមោលរបស់ឪពុក? ក្រុមបន្តវេណពេលណាដើរចេញពីស្រមោលនៃគណបក្សប្រជាជន? No way! [គ្មានផ្លូវទេ!] ព្រោះប្រព័ន្ធបោះឆ្នោតនេះអនុញ្ញាតឲ្យអ្នកឯងសម្រេចកិច្ចការក្នុងរង្វង់នៃក្របខណ្ឌគោលនយោបាយរបស់គណបក្សប្រជាជន»។
លោក ហ៊ុន សែន បន្តថា នាយករដ្ឋមន្ត្រីមិនអាចដើរហួសបន្ទាត់នយោបាយរបស់គណបក្សប្រជាជនកម្ពុជាបានទេ ហើយបើនាយករដ្ឋមន្ត្រីដឹកនាំប្រទេសផ្ទុយពីគោលនយោបាយរបស់គណបក្ស នោះនឹងត្រូវដកចេញពីតំណែង។
លោកថ្លែងថា៖ «នេះគ្រាន់តែជាការជូនសារតិចតួចបង្រៀនអំពីរដ្ឋបាលសាធារណៈដែលមានចរិកទូលំទូលាយសម្រាប់អ្នកសរសេរមួយចំនួនពីខាងក្រៅប្រទេស ហើយនិងអ្នកខ្លះដែលផ្តល់មតិថា ទាល់តែ ហ៊ុន ម៉ាណែត ធ្វើសកម្មភាពផ្ទុយជាមួយឪពុកទើបចាត់ទុកថាជាមនុស្សសេរី។ វាមិនដែលម៉ែអាណា គេឲ្យធ្វើអ៊ីចឹង។ ហ៊ានតែសាកធ្វើមើល៎ កុំថាឡើយអ្នកណាផ្សេង សូម្បីតែកូនបង្កើត ក៏ដកចេញពីតំណែងដែរ។ និយាយឲ្យច្បាស់ជាមួយគ្នា អ៊ីចឹងហ្មង»។
បើតាមលោក ហ៊ុន សែន រាជរដ្ឋាភិបាលត្រូវតែយកកម្មវិធីនយោបាយរបស់គណបក្សទៅអនុវត្ត ប៉ុន្តែគណបក្សមិនជ្រៀតជ្រែកកិច្ចការរបស់រដ្ឋាភិបាលនោះទេ។
លោក ហ៊ុន ម៉ាណែត កូនប្រុសច្បងរបស់លោក ហ៊ុន សែន បានឡើងកាន់តំណែងជានាយករដ្ឋមន្ត្រីកម្ពុជាជំនួសឪពុក កាលពីខែសីហា ឆ្នាំ ២០២៣។ អ្នកនយោបាយប្រឆាំងនិងអង្គការអន្តរជាតិមួយចំនួន ដូចជាអង្គការឃ្លាំមើលសិទ្ធិមនុស្សអន្តរជាតិ Human Rights Watch កត់សម្គាល់ថា លោក ហ៊ុន ម៉ាណែត បានបន្តដើរតាមលំអានរបស់ឪពុកលោក ដោយបង្កើនការប្រើប្រាស់ច្បាប់ដែលមានលក្ខណៈគាបសង្កត់ និងប្រព័ន្ធតុលាការ ក្នុងការបំបិទសំឡេងអ្នករិះគន់ និងក្រុមអ្នកការពារសិទ្ធិមនុស្ស។
លោក មាស នី អ្នកវិភាគនយោបាយប្រាប់វីអូអេថា ការរៀបចំប្រទេសអាស្រ័យលើការសម្រេចចិត្តរបស់ថ្នាក់ដឹកនាំថា តើចង់ឃើញប្រទេសកម្ពុជានាថ្ងៃមុខ វិវត្តទៅដោយការដឹកនាំប្រទេសតាមបែបតជំនាន់ ឬដឹកនាំប្រទេសតាមបែបលទ្ធិប្រជាធិបតេយ្យពិតប្រាកដ។
លោកប្រាប់វីអូអេថា៖ «ប្រទេសមួយៗ វាមិនអាចនឹងត្រឹមត្រូវ ១០០% សូម្បីតែនៅសហរដ្ឋអាមេរិកក៏វាគង់តែនៅមានភាពចន្លោះខ្លះដែរ គ្រាន់ថា យើងកុំឲ្យភាពចន្លោះប្រហោងនៅឆ្ងាយពីស្អីដែលជាការចែងដោយច្បាប់ខ្លាំងពេកអ៊ីចឹង ដូចជាប្រព័ន្ធយុត្តិធម៌ថាត្រូវធ្វើម៉េចដើម្បីឲ្យពលរដ្ឋមានភាពកក់ក្តៅជាមួយប្រព័ន្ធយុត្តិធម៌វិញ។ អ្នកនយោបាយយើងឲ្យមានក្រមសីលធម៌ក្នុងការធ្វើនយោបាយ ឲ្យមានភាពប្រសើរឡើង អីអ៊ីចឹងទៅ។ អាហ្នឹងខ្ញុំគិតថា ពលរដ្ឋពេញចិត្តហើយ»។
លោក មាស នី បន្ថែមថា ក្នុងដំណើរការប្រជាធិបតេយ្យជាធម្មតាតែងតែមានការផ្លាស់ប្តូរថ្នាក់ដឹកនាំប្រទេសតាមរយៈការបោះឆ្នោត។ លោកថា សម្រាប់ពលរដ្ឋកម្ពុជាតែងចង់ឃើញអ្នកនយោបាយអនុវត្តតាមរដ្ឋធម្មនុញ្ញកម្ពុជាឲ្យបានពេញលេញ៕
វេទិកាបញ្ចេញមតិ