មន្ត្រីសិទ្ធិមនុស្សជំរុញឱ្យកម្ពុជាមានកិច្ចសហការល្អជាមួយភាគីថៃក្នុងការស៊ើបអង្កេតឃាតកម្មបាញ់សម្លាប់លោក លិម គិមយ៉ា អតីតអ្នកនយោបាយគណបក្សប្រឆាំងដែលត្រូវបានឃាតករបាញ់សម្លាប់កាលពីថ្ងៃទី៧ ខែមករា ឆ្នាំ២០២៥ លើទឹកដីថៃ ដើម្បីលាតត្រដាងការណ៍ពិត និងដើម្បីកុំឱ្យប៉ះពាល់មុខមាត់រដ្ឋាភិបាល។
ការជំរុញនេះស្របពេលដែលកូនប្រុសរបស់លោក លិម គិមយ៉ា គឺលោក លិម តូម៉ាស៍ ប្រាប់វិទ្យុបារាំងនាពេលថ្មីៗនេះថា ទាល់តែចាប់ខ្លួនជនសង្ស័យជាជនជាតិខ្មែរចំនួន ២នាក់ ដែលរួមមានលោក លី រតនរស្មី អតីតទីប្រឹក្សារបស់លោក ហ៊ុន សែន និងលោក ពេជ្រ គឹមស្រ៊ិន ប្អូនប្រុសរបស់អ្នកនយោបាយខ្មែរម្នាក់ឱ្យទៅតុលាការថៃ ទើបអាចបំភ្លឺការណ៍ពិតជុំវិញឃាតកម្មឪពុករបស់លោកបាន។
លោក នី សុខា ប្រធានសមាគមការពារសិទ្ធិមនុស្សអាដហុកលើកឡើងថា ករណីឃាតកម្មលោក លិម គិមយ៉ា ដែលមានសញ្ជាតិបារាំង អាជ្ញាធរកម្ពុជាត្រូវបង្កើនកិច្ចសហការល្អជាមួយភាគីថៃក្នុងការស៊ើបអង្កេត និងស្វែងរកជនពាក់ព័ន្ធមកសាកសួរ ដើម្បីបង្ហាញការណ៍ពិត ត្បិតករណីឃាតកម្មនេះមិនមែនកើតឡើងលើទឹកដីកម្ពុជា ប៉ុន្តែជនសង្ស័យជាជនជាតិខ្មែរ។ លោកបន្ថែមថា ករណីនេះក៏កំពុងរងការរិះគន់ និងការចោទប្រកាន់ថា ជនសង្ស័យមួយចំនួនធ្លាប់មានទំនាក់ទំនងជាមួយថ្នាក់ដឹកនាំប្រទេសថែមទៀត។
លោកប្រាប់វីអូអេថា៖ «ចង់មិនចង់ បើសិនជាអាជ្ញាធរកម្ពុជាមិនបានបង្ហាញអំពីជំហរកិច្ចសហប្រតិបត្តិការមួយឱ្យបានល្អ ដើម្បីធ្វើយ៉ាងណាផ្តល់ជនសង្ស័យទាំងអស់ហ្នឹង ដើម្បីឱ្យមានការសាកសួរចម្លើយឱ្យបានច្បាស់លាស់ទេ នោះវាធ្វើឱ្យមានការជះឥទ្ធិពលមិនល្អមកដល់ប្រទេសកម្ពុជាយើងចំពោះករណីឃាតកម្មហ្នឹង»។
ករណីឃាតកម្មលោក លិម គិមយ៉ា ប្រទេសបារាំងកំពុងតាមដានយ៉ាងយកចិត្តទុកដាក់លើការស៊ើបអង្កេតឃាតកម្មនេះផងដែរ។ អ្នកនយោបាយមកពីគណបក្សប្រឆាំង និងអង្គការអន្តរជាតិមួយចំនួនបានដាក់ការសង្ស័យថា រដ្ឋាភិបាលកម្ពុជាជាអ្នកនៅពីក្រោយការបាញ់សម្លាប់នេះ។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ ក៏បានលើកឡើងស្រដៀងគ្នាផងដែរថា ការសហការល្អរវាងអាជ្ញាធរកម្ពុជា និងអាជ្ញាធរថៃក្នុងការស៊ើបអង្កេតករណីបាញ់សម្លាប់អតីតអ្នកនយោបាយគណបក្សប្រឆាំង និងស្វែងរកអ្នកពាក់ព័ន្ធមកផ្តន្ទាទោស គឺជារឿងចាំបាច់ ដើម្បីកុំឱ្យមានការចោទប្រកាន់ណាមួយមកលើកម្ពុជា។
លោកប្រាប់វីអូអេថា៖ «បើសិនជាមានជនដែលពាក់ព័ន្ធជាមួយការបាញ់សម្លាប់នេះ ហើយរត់ទៅប្រទេសណាមួយ អាហ្នឹងវាត្រូវមានកិច្ចសហប្រតិបត្តិការដូចកម្ពុជាធ្លាប់ធ្វើកន្លងមកអ៊ីចឹង ដែលបញ្ជូនជនជាតិថៃ ដែលជាជនដៃដល់ក្នុងការបាញ់សម្លាប់លោក លិម គិមយ៉ា ត្រឡប់ទៅប្រទេសថៃវិញ។ អ៊ីចឹងបើសិនជាមានជនពាក់ព័ន្ធដទៃទៀតអាហ្នឹងវាអាស្រ័យទៅលើកិច្ចសហបប្រតិបត្តិការនៃបណ្តាប្រទេសនីមួយៗ»។
លោក អំ សំអាត បន្ថែមថា ដើម្បីធានាយុត្តិធម៌សម្រាប់ជនរងគ្រោះ គឺសមត្ថកិច្ចថៃក៏ត្រូវតែមានភស្តុតាង និងសាក្សីច្បាស់លាស់ ដើម្បីតាមស្វែងរកជនសង្ស័យផ្សេងទៀត។
លោក លិម តូម៉ាស៍ កូនប្រុសពៅរបស់លោក លិម គិមយ៉ា ប្រាប់វិទ្យុបារាំងកាលពីសប្តាហ៍មុន ដោយចាត់ទុកឃាតកម្មនេះថា ជារឿងនយោបាយច្រើនជាងរឿងគំនុំផ្ទាល់ខ្លួន។ លោកជឿថា ទាល់មានតែការចាប់ខ្លួនជនសង្ស័យ ជាជនជាតិខ្មែរទាំង២នាក់ គឺលោក លី រតនរស្មី និងលោក ពេជ្រ គឹមស្រ៊ិន ឱ្យទៅតុលាការថៃ ទើបអាចបំភ្លឺការណ៍ពិតជុំវិញឃាតកម្មនៅកណ្តាលទីក្រុងបាងកក កាលពីថ្ងៃទី៧ ខែមករា ឆ្នាំ២០២៥។
លោក លី រតនរស្មី អតីតសកម្មជនគណបក្សជំទាស់ ធ្លាប់មានតួនាទីជាទីប្រឹក្សារបស់ លោក ហ៊ុន សែន ប្រធានគណបក្សប្រជាជនកម្ពុជា និងបច្ចុប្បន្នជាប្រធានព្រឹទ្ធសភា។ ចំណែកលោក ពេជ្រ គឹមស្រ៊ិន ជាប្អូនប្រុសរបស់លោក ពេជ្រ ស្រស់ ប្រធានគណបក្សយុវជនកម្ពុជា។
រហូតមកដល់ពេលនេះ គេមិនទាន់ដឹងនៅឡើយទេថា ភាគីថៃបានស្នើឱ្យភាគីកម្ពុជាចាប់ខ្លួនជនសង្ស័យទាំងពីររូបនោះទៅឱ្យភាគីថៃ ដូចការចាប់បញ្ជូនខ្មាន់កាំភ្លើងដែលបាញ់លោក លិម គិមយ៉ា យ៉ាងណានោះទេ។ គេក៏មិនទាន់ដឹងនៅឡើយទេ ថាតើអាជ្ញាធរកម្ពុជានឹងឃាត់ខ្លួនជនសង្ស័យទាំងពីរនោះ ឬយ៉ាងណា។
វីអូអេពុំទាន់អាចសុំការអត្ថាធិប្បាយពីលោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ និងលោក ទូច សុខៈ អ្នកនាំពាក្យក្រសួងមហាផ្ទៃបាននៅឡើយទេ។
វីអូអេក៏មិនទាន់អាចសុំការបញ្ជាក់ពីលោក ជុំ សន្ទរី អ្នកនាំពាក្យក្រសួងការបរទេសកម្ពុជាបានដែរ។
ករណីបាញ់សម្លាប់លោក លិម គិមយ៉ា ក្នុងទឹកដីថៃ ត្រូវបានលោកនាយករដ្ឋមន្រ្តី ហ៊ុន ម៉ាណែត បដិសេធថា មិនជាប់ពាក់ព័ន្ធនឹងរដ្ឋាភិបាលកម្ពុជា ហើយរដ្ឋាភិបាលមិនមែននៅពីក្រោយឃាតកម្មនេះទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់វីអូអេថា អ្វីដែលអាចទុកចិត្តបាន គឺការស៊ើបអង្កេតដែលចេញពីអាជ្ញាធរថៃ។
លោកបញ្ជាក់ថា៖ «បញ្ហាសំខាន់គេយកលទ្ធផលនៃការស៊ើបអង្កេតរបស់សមត្ថកិច្ចថៃ អាហ្នឹងជាបានការណ៍។ អ៊ីចឹងយើងដឹងហើយថា សមត្ថកិច្ចប៉ូលិសថៃបានសន្និដ្ឋានរួចហើយថា ការធ្វើអំពើឃាតកម្មលើលោក លិម គិមយ៉ា មិនពាក់ព័ន្ធនឹងរឿងនយោបាយទេ វាជាកំហឹងបុគ្គល។ បាទ! កំហឹងបុគ្គលហ្នឹង គេមិនបានបញ្ជាក់ច្បាស់ទៀត អាហ្នឹងបើប្អូនឯងចង់ដឹងច្បាស់ ទៅសួរប៉ូលិសថៃ អាហ្នឹងបានគេដឹងច្បាស់។ យើងមិនអាចយកមតិរបស់បុគ្គលផ្សេងៗ ក្រៅរង្វង់នៃអំពើឃាតកម្មនេះ យកមកធ្វើជាបានការណ៍ទេ»។
វីអូអេមិនទាន់អាចទាក់ទងសុំការអត្ថាធិប្បាយពីស្ថានទូតថៃប្រចាំនៅកម្ពុជា បាននៅឡើយទេ។
គួររំឭកថា ក្រោយការបាញ់សម្លាប់លោក លិម គិមយ៉ា ទាំងកណ្តាលថ្ងៃនៅទីប្រជុំជនមួយកន្លែងក្នុងទីក្រុងបាងកក មានការចែករំលែកព័ត៌មានអំពីជនសង្ស័យម្នាក់ទៀតដែលគេថតបាននៅក្នុងកាមេរ៉ាសុវត្ថិភាពឈ្មោះ ពេជ្រ គឹមស្រ៊ិន ដែលត្រូវបានគេមើលឃើញថា ជាអ្នកឱ្យសញ្ញា និងរូបភាពដល់ជនដៃដល់។ ជនសង្ស័យនោះបានធ្វើដំណើរតាមរថយន្តក្រុងពីខេត្តសៀមរាបមកទីក្រុងបាងកកជាមួយជនរងគ្រោះដែរ៕
វេទិកាបញ្ចេញមតិ